कुरणखेड पंचायत समितीचे आरक्षण जाहीर झाल्यापासून राजकीय वातावरण पुन्हा तापले आहे. विविध समाजातील युवक-युवतींनी या जागेसाठी आपला दावेदारपणा दाखवला आहे.
कुरणखेड पंचायत समितीचे आरक्षण जाहीर झाल्यापासून राजकीय वातावरण पुन्हा एकदा तापले आहे. जागा सर्वसाधारणसाठी राखीव असल्यामुळे विविध समाजातील युवकांनी आपला दावेदारपणा दाखवला आहे. पूर्वीच्या पंचवार्षिकात राजकीय सीनियर नेत्यांचे वर्चस्व आहे. अशातच आता युवा नेतृत्वाच्या उदयाने परिसरात नवीन राजकीय चर्चा रंगतदार झाली आहे.
कुरणखेड जिल्हा परिषद सर्कल अंतर्गत येणाऱ्या या पंचायत समितीमध्ये युवक-युवतींच्या उमेदवारीवर सर्वांचे लक्ष लागले आहे. राजकीय समीकरणात बदल घडत आहेत. यामुळे युवा नेतृत्वासाठी एक सुवर्णसंधी उभी राहिली आहे. पूर्वी अनेक वेळा वंचित बहुजन आघाडीचे उमेदवार विजयी झाले. मात्र मागील पंचवार्षिकात भारतीय जनता पार्टीच्या सुषमा प्रशांत ठाकरे यांनी जोरदार विजय मिळवून राजकीय नकाशावर एक नवीन ठसा उमटवला होता.
युवा चेहऱ्यांची दावेदारी
भारतीय जनता पार्टीतर्फे अनेक युवा चेहर्यांची दावेदारी चर्चेत आहे. माजी पंचायत समिती सदस्य व जिल्हा सचिव सुषमा प्रशांत ठाकरे, ग्रामपंचायत सदस्य व भाजपा तालुका सचिव अमन महल्ले. तसेच युवा मोर्चा जिल्हा सचिव सुयोग देशमुख यांचा सहभाग संभाव्य उमेदवारीत दिसून येतो. या युवा नेतृत्वाला संधी मिळाल्यास परिसरातील विकासकामांना नवा गती मिळेल, अशी चर्चा सुरू आहे. भाजपच्या या युवा कार्यकर्त्यांनी रणनीतीबद्ध तयारी करून राजकीय मैदानी लढाईसाठी आपली ताकद दाखवली आहे.
वंचित बहुजन आघाडीच्या युवा कार्यकर्त्यांमध्येही दावेदारी जोरदार आहे. युवा सामाजिक कार्यकर्ता मिलिंद भिमराव मोहोड, तंटामुक्ती अध्यक्ष जशीमुद्दीन खतीब, तालुका उपाध्यक्ष शेख जमील आणि पक्षाचे निष्ठावान शेख रसुल या युवा चेहऱ्यांची नावे चर्चेत आहेत. त्याचबरोबर राष्ट्रवादी काँग्रेस कडूनही युवा नेतृत्वाला संधी मिळवून देण्याची तयारी दिसून येत आहे. या राजकीय स्पर्धेत विविध पक्षांच्या युवा चेहऱ्यांनी आपली ताकद दाखवण्याची तयारी केली आहे.
कुरणखेड परिसरात सध्या युवा नेतृत्वावर केंद्रित राजकीय चर्चा जोरात आहे. आगामी पंचवार्षिक निवडणुकीत कोणता पक्ष युवा चेहऱ्याला संधी देतो. कोणते युवा नेतृत्व पुढे येते, यावर सर्वांचे लक्ष लागले आहे. राजकीय समीकरणे, पक्षीय धोरणे आणि युवाशक्ती यांचे संतुलन ठरवेल की मूर्तिजापूरमध्ये नव्या पिढीची सत्ता रंगतदार असेल की जुन्या नेतृत्वाने आपले वर्चस्व कायम राखले.
