महाराष्ट्रातील राजकीय समीकरण सध्या स्थानिक स्वराज्य संस्थांच्या निवडणुकीसाठी जाहीर झालेल्या आरक्षण सोडतीमुळे मोठ्या प्रमाणावर बदलताना दिसत आहे.
राज्यातील स्थानिक स्वराज्य संस्थांच्या निवडणुकीचा बिगुल वाजताच राजकीय वातावरण ढवळून निघाले. प्रत्येक पक्षाने आपली रणनीती आखण्यास सुरुवात केली, उमेदवारांची चाचपणी सुरू झाली आणि कार्यकर्त्यांमध्ये उत्साह संचारला. पण, नगरपरिषदेच्या आरक्षण सोडतीने सगळ्यांच्याच स्वप्नांना नवे वळण दिले आहे. या सोडतीने पुरुष नेत्यांचे स्वप्न भंगले. तर महिलांना सत्तेच्या केंद्रस्थानी आणले आहे. मूर्तीजापूर नगरपरिषदेच्या 12 प्रभागांमध्ये तब्बल13 जागा महिलांसाठी राखीव ठेवण्यात आल्या आहेत. यामुळे यंदा नगराध्यक्षपदावर महिला विराजमान होण्याची शक्यता प्रबळ झाली आहे.
प्रभाग रचनेनंतर जाहीर झालेल्या आरक्षण सोडतीने राजकीय समीकरणे बदलली आहेत. आरक्षणाच्या सोडतीने अनेक नेत्यांचे स्वप्न धुळीला मिळाले आहे. विशेषतः नगराध्यक्षपदासाठी महिलांसाठी जागा राखीव ठेवल्याने राजकीय पक्षांमध्ये योग्य उमेदवार शोधण्याची धडपड सुरू झाली आहे. प्रत्येक पक्षात उमेदवारीसाठी इच्छुकांची रीघ लागली होती. पण आरक्षणाच्या जाहीरनाम्याने अनेकांचा हिरमोड झाला. यामुळे यंदा मूर्तिजापूर नगरपरिषदेच्या नगराध्यक्षपदावर महिला नेतृत्वाची मुद्रा उमटण्याची शक्यता आहे. पक्षातील दिग्गज नेत्यांनी आपापल्या पद्धतीने मोर्चेबांधणी सुरू केली असली, तरी आरक्षणाच्या या नव्या खेळीने त्यांच्या रणनीतींना नवे वळण मिळाले आहे.
Municipal Elections : आरक्षण सोडतीचा धक्का, यवतमाळमध्येही महिलांचा डंका
नव्या नेतृत्वाची संधी
मूर्तिजापूर नगर परिषदेच्या प्रभाग रचनेनुसार, प्रत्येक प्रभागात आरक्षणाची सोडत जाहीर झाली आहे. प्रभाग क्रमांक 1-अ मध्ये अनुसूचित जातीच्या महिलांसाठी जागा राखीव आहे. तर 1-ब मध्ये सर्वसाधारण जागा आहे. प्रभाग 2-अ मध्ये अनुसूचित जमातीच्या महिलांसाठी, तर 2-ब मध्ये सर्वसाधारण जागा आहे. प्रभाग 3-अ मध्ये नागरिकांचा मागास प्रवर्ग (ओबीसी) आणि 3-ब मध्ये सर्वसाधारण महिलांसाठी जागा राखीव आहे. प्रभाग 4-अ मध्ये ओबीसी महिलांसाठी, तर 4-ब मध्ये सर्वसाधारण जागा आहे. प्रभाग 5-अ मध्ये ओबीसी आणि 5-ब मध्ये सर्वसाधारण महिलांसाठी जागा आहे. प्रभाग 6-अ मध्ये अनुसूचित जाती, तर 6-ब मध्ये सर्वसाधारण महिलांसाठी जागा राखीव आहे. प्रभाग 7-अ मध्ये ओबीसी आणि 7-ब मध्ये सर्वसाधारण महिलांसाठी.
प्रभाग 8-अ मध्ये अनुसूचित जाती आणि 8-ब मध्ये सर्वसाधारण महिलांसाठी जागा राखीव आहे. प्रभाग 9-अ मध्ये ओबीसी महिलांसाठी, तर 9-ब मध्ये सर्वसाधारण जागा आहे. प्रभाग 10-अ मध्ये अनुसूचित जातीच्या महिलांसाठी, तर 10-ब मध्ये सर्वसाधारण जागा आहे. प्रभाग 11-अ मध्ये ओबीसी महिलांसाठी, तर 11-ब मध्ये सर्वसाधारण जागा आहे. प्रभाग 12-अ मध्ये ओबीसी महिलांसाठी, 12-ब मध्ये सर्वसाधारण आणि 12-क मध्ये सर्वसाधारण महिलांसाठी जागा राखीव आहे.या आरक्षण सोडतीमुळे मूर्तिजापूरच्या राजकारणात नवे रंग भरले आहेत. महिलांसाठी राखीव जागांचे प्रमाण जास्त असल्याने राजकीय पक्षांना योग्य उमेदवार निवडताना कसोटी लागणार आहे. अनेक नेत्यांचे नगराध्यक्षपदाचे स्वप्न भंगले असले, तरी यामुळे नव्या नेतृत्वाला संधी मिळण्याची शक्यता आहे. पक्षातील कार्यकर्त्यांमध्येही उत्साह आहे. कारण यंदा महिलांच्या नेतृत्वाला प्राधान्य मिळणार आहे.
