नगर परिषद निवडणुकीची रणधुमाळी आता रंगतदार झाली आहे. अशात वाशीम जिल्ह्यातील राजकीय वर्तुळात वेगळीच घटना घडली आहे.
अधिकृत नाव जाहीर झालेली नसतानाही वाशीम जिल्ह्यात एकाने नगराध्यक्ष पदासाठी उमेदवारी अर्ज दाखल केला आहे. शिवसेना उद्धव बाळासाहेब ठाकरे पक्षाचे उपजिल्हा प्रमुख नागोराव ठेंगडे यांनी थेट अध्यक्ष पदासाठी उमेदवारी अर्ज दाखल केला आहे. याप्रकारामुळे राजकीय वर्तुळात खळबळ उडाली आहे. वाशिम जिल्ह्यासाठी अद्यापही शिवसेना उद्धव बाळासाहेब ठाकरे पक्षाने उमेदवारांच्या नावांची घोषणा केलेली नाही. याशिवाय महाविकास आघाडीतील कोणत्याही पक्षाने अद्याप उमेदवार जाहीर केलेले नाहीत.
नगरसेवक किंवा नगराध्यक्ष पदासाठी अद्यापही महाविकास आघाडीने कोणताही निर्णय घेतलेला नाही. अशात नागोराव ठेंगडे यांनी थेट नगराध्यक्ष पदासाठी अर्ज दाखल करीत खळबळ उडवून दिली आहे. वाशिम नगर परिषदेच्या अध्यक्षपदासाठी त्यांनी अर्ज दाखल केला आहे. ठेंगडे यांनी वाशिम शहरात मोठं शक्ती प्रदर्शन केलं. रॅली काढत त्यांनी नगराध्यक्ष पदासाठी उमेदवारी अर्ज दाखल केला. उमेदवारी अर्ज दाखल करण्यासाठी त्यांनी रॅली काढत निवडणूक निर्णय अधिकारी कार्यालय गाठले. त्यानंतर आपला अर्ज सादर केला. शिवसेना उद्धव बाळासाहेब ठाकरे पक्षाच्या वतीने अर्ज दाखल करीत असल्याचे त्यांनी स्पष्ट केले.
जिल्हाध्यक्षांशी चर्चा
नागोराव ठेंगडे यांनी उमेदवारी अर्ज दाखल केल्यानंतर प्रसार माध्यमांशी संवाद साधला. आपण पक्षाच्या जिल्हाध्यक्षांशी चर्चा केली. वरिष्ठ नेत्यांसोबत चर्चा झाल्यानंतरच आपण अर्ज दाखल करीत असल्याचे त्यांनी स्पष्ट केले. आपल्याला लवकरच पक्षाकडून एबी फॉर्म मिळेल असा विश्वासही त्यांनी ठामपणे व्यक्त केला. आपण शिवसेना उद्धव बाळासाहेब ठाकरे पक्षाशी एकनिष्ठ आहोत. त्यामुळे आपल्याला पक्षाकडून संधी देण्यात येईल, असेही ठेंगडे यांनी स्पष्ट केले. दुसरीकडे ठेंगडे यांची ही कृती पक्षाला आव्हान देणारी असल्याची टीकाही होत आहे.
महाविकास आघाडीकडून अधिकृत उमेदवारांच्या नावांची घोषणा लवकरच होण्याची शक्यता आहे. मात्र अशात ठेंगडे यांनी घाई केल्याचे बोलले जात आहे. ठेंगडे यांच्या या कृतीमुळे त्यांचा पक्षावर किंवा उद्धव ठाकरे यांच्यावर विश्वास नाही का? असा प्रश्न उपस्थित केला जात आहे. वाशिम जिल्ह्यातील राजकीय गुंतागुंत या घटनेनंतर वाढली आहे. ठेंगडे यांच्या समवेत जिल्हा प्रमुख सुरेश मापारी यांच्यासह पक्षाचे पदाधिकारी उपस्थित होते. त्यामुळे वाशिम जिल्ह्यातील शिवसेना ठेंगडे यांच्या पाठीशी असल्याचे चित्र आहे. मात्र उमेदवारी जाहीर होण्यापूर्वी ठेंगडे व शिवसेनेच्या स्थानिक पदाधिकाऱ्यांनी हे पाऊल उचलले आहे. त्यामुळे महाविकास आघाडीतून अन्य कोणी इच्छुक आहे काय, असा प्रश्न उपस्थित होत आहे.
