नागपुरात फहीम खानच्या कारवाईनंतर आता दुसरा आरोपी युनूस अब्दुल हाफीजच्या अनधिकृत घरावरही महापालिकेच्या अतिक्रमण विरोधी पथकाने बुलडोझर चालवला आहे.
उपराजधानीत उसळलेल्या हिंसाचाराने संपूर्ण शहरात भीतीचे वातावरण निर्माण झाले होते. या घटनेनंतर प्रशासनाने तातडीने हालचाली सुरू केल्या आणि मुख्य आरोपी फहीम खानवर कठोर कारवाईचा बडगा उगारला. फहीम खानवर देशद्रोहाचा गुन्हा दाखल करण्यात आला आहे. मात्र आता त्याच्या अडचणी आणखी वाढल्या आहेत.
हिंसेत फक्त फहीम खानच नाही, तर नागपूर हिंसाचार प्रकरणातील आणखी एक आरोपी युनूस अब्दुल हाफीजलाही प्रशासनाच्या कारवाईला सामोरे जावे लागणार आहे. नागपूरच्या महाल भागात असलेल्या युनूस अब्दुल हाफीजच्या इमारतीवरही नागरी अधिकाऱ्यांनी हातोडा चालवण्यास सुरुवात केली आहे.
ठोस पाऊल
नागपूर महानगरपालिकेने त्याच्या अनधिकृत बांधकामावर कारवाई करण्यासाठी नोटीस पाठवली होती. यामुळे फहीम खानच्या घरावर बुलडोझर चालविण्यात आले आहे. नागपूर शहरात यामुळे मोठी खळबळ उडाली आहे, कायद्याचा धाक निर्माण करण्याचा प्रशासनाचा प्रयत्न असल्याचे बोलले जात आहे.
नागपूर महानगरपालिकेने 24 मार्च रोजी फहीम खानच्या अनधिकृत घरावर कारवाई केली, आणि त्याच दरम्यान, युनूस अब्दुल हाफीजच्या घरावरही बुलडोझरची प्रक्रिया सुरू करण्यात आली. नागपूरच्या नागरिकांमध्ये या घटनांची मोठी चर्चा आहे. कायदा आणि सुव्यवस्थेच्या मुद्द्यावर कठोर पावले उचलली जात असल्याचे स्पष्ट होत आहे.
अनधिकृत बांधकाम
फहीम खान नागपूरच्या यशोधरानगर भागातील संजय बाग कॉलनीत राहतो. त्याने आपल्या घराजवळ तब्बल 900 चौरस फूट जागेवर अनधिकृत बांधकाम केल्याचे समोर आले आहे. याच कारणाने नागपूर महानगरपालिकेने त्याला नोटीस बजावली होती. फहीम खानवर धार्मिक भावना भडकवल्याचा गंभीर आरोप आहे. पोलिसांनी त्याला अटक केल्यानंतर आता महानगरपालिका देखील त्याच्या विरोधात कडक कारवाई करत आहे. नागपूरमध्ये कायद्याचा धाक निर्माण करण्यासाठी ही पावले उचलली जात असल्याचे प्रशासनाने स्पष्ट केले आहे.
सध्या नागपूर शहरात परिस्थिती हळूहळू सामान्य होत आहे, मात्र या कारवाईनंतर शहरातील वातावरण पुन्हा तापण्याची शक्यता वर्तवली जात आहे. पुढील काही दिवसांत प्रशासन आणखी कठोर निर्णय घेण्याची शक्यता असल्याने संपूर्ण नागपूर शहराचे या प्रकरणाकडे लक्ष लागले आहे.
