नागपूर महापालिकेने उड्डाणपूलाखालील जागांमध्ये बास्केटबॉल कोर्ट, ग्रीन जिम आणि स्केटिंग रिंग विकसित करून शहराच्या सौंदर्यात भर घातली आहे.
नागपूर हे केवळ संत्र्यांचं शहर नाही, तर आता क्रीडा-संस्कृतीचा नवा श्वास घेणारी सृजनशील नगरी म्हणूनही नावारूपाला येत आहे. नागपूर महानगरपालिकेने शहरातील उड्डाणपूलाखालील मृत जागांमध्ये नवजीवन ओतण्याचे धाडसी पाऊल उचलले आहे. या जागा पूर्वी ओसाड, उपेक्षित आणि दुर्लक्षित होत्या. पण आता त्या क्रीडा, सौंदर्य आणि सार्वजनिक उपयोगाच्या दृष्टीने नव्याने सजल्या आहेत.
मोबाईलच्या पडद्यामागे हरवलेल्या पिढीला मैदानी खेळांकडे वळवण्याचा हा एक सर्जनशील आणि समाजोपयोगी प्रयत्न ठरतो आहे. सुदृढ आरोग्य, मानसिक ताजेपणा आणि समाजात परस्परसंवाद वाढवण्यासाठी खेळाचे महत्त्व लक्षात घेता, महापालिकेचा हा उपक्रम केवळ शहरी नियोजनाचाच भाग राहिला नाही, तर तो आता नागपूरच्या संस्कृतीचा अभिन्न भाग बनू लागला आहे.
Praveen Tewatiya : गोळ्या अंगावर झेलल्या तेव्हा मराठीचे ठेकेदार कुठे होते?
सौंदर्याचे नवे रूप
दिघोरी उड्डाणपुलाखाली बांधण्यात आलेले बास्केटबॉल कोर्ट, स्केटिंग रिंग आणि सुशोभीकरण केलेले ग्रीन स्पेस ही नव्या नागपूरची ओळख ठरत आहेत. या ठिकाणी केवळ क्रीडा नव्हे, तर सार्वजनिक विश्रांतीसाठी आवश्यक असलेल्या सोयीसुविधाही पुरवण्यात आल्या आहेत. रुग्णालयांच्या आसपासच्या ठिकाणी नातेवाईकांसाठी प्रतीक्षा क्षेत्र तयार करणे ही एक सामाजिक जाणीव दर्शवणारी बाब ठरते.
नरेंद्रनगर उड्डाणपुलाखाली तयार करण्यात येणाऱ्या नव्या क्रीडांगणाने युवकांना खेळासाठी प्रशस्त आणि सुस्थित जागा मिळाली आहे. सक्करदऱ्याच्या परिसरात रंगीबेरंगी स्तंभकला, इंद्रधनुष्य छत्र्या आणि हिरवळ या ठिकाणी सौंदर्य आणि शांतता यांचे सुरेख संमीलन साधले आहे. नागपूरच्या बहुसंख्य नागरिकांसाठी ही ठिकाणं आता निवांत क्षणांची, सृजनशीलतेची आणि आरोग्यवर्धक दिनचर्येची नवी केंद्रे ठरत आहेत.
संदेशाचं सुंदर संमीलन
जयप्रकाशनगर मेट्रो स्टेशनच्या भिंतीवर साकारण्यात आलेल्या भित्तीचित्रांमध्ये महिलांचे जीवन, सायकल संस्कृती आणि नागपूरचा वाघ व संत्रा यांची प्रतीके कलाकारांनी अतिशय कलात्मकतेने मांडली आहेत. मेट्रो स्टेशनची भिंत केवळ भिंत राहिली नाही. ती आता नागपूरच्या सांस्कृतिक ओळखीचा भिंतीवरचा आरसा ठरली आहे.
उड्डाणपुलांचे स्तंभ झाडांच्या रचनेत साकारले गेले आहे. त्यामुळे शहरात हिरवळ आणि निसर्गाची जाणीव वाढते आहे. यामुळे नागपूरच्या रस्त्यांना केवळ वाहतुकीचं नव्हे तर सौंदर्याचंही एक परिमाण लाभत आहे. हे परिवर्तन नागपूरच्या शहरी सौंदर्यशास्त्रात एक महत्त्वाचा टप्पा ठरतो.
शहराची नवी ओळख
मेहंदीबाग परिसरातील उड्डाणपुलाखाली करण्यात आलेल्या लँडस्केपिंगमुळे या घनदाट वस्तीत राहणाऱ्या नागरिकांना नवे आनंददायी वातावरण लाभले आहे. वयोवृद्ध, लहान मुलं, तसेच मध्यमवयीन नागरिक यांच्यासाठी विश्रांती आणि करमणुकीची ही जागा आता शहरी फुफ्फुसासारखी वाटते. नागपूरच्या शहरी विकासात या हरित ठिकाणांचा वाटा केवळ सौंदर्यापुरता मर्यादित न राहता सामाजिक आरोग्यदृष्ट्याही महत्त्वाचा ठरतो.
दहीबाजार परिसरात उड्डाणपुलाखाली विकसित करण्यात आलेले शांततामय क्षेत्र दुकानदार आणि ग्राहक दोघांनाही आवश्यक असलेली विश्रांती प्रदान करते. गर्दीच्या, धावपळीच्या बाजारात हा भाग आता एक हळुवार थांबा ठरतो. स्तंभांची झाडांसारखी रचना आणि हिरवळ यामुळे हा परिसर सौंदर्याने भरलेला आहे. त्याला नागपूरच्या लोकजीवनात आता एक स्थान मिळालं आहे.
नागपूर महानगरपालिकेच्या या उपक्रमांमुळे शहरात नवा शहरीपणा जन्म घेत आहे. तो फक्त सिमेंट-काँक्रिटमध्ये अडकलेला नाही, तर तो माणसांच्या भावविश्वाशी जोडलेला आहे. खेळणी मैदाने, म्युरल आर्ट, हरित कोपरे आणि सार्वजनिक सोयी यांमुळे नागपूर आता एक सुसंस्कृत, समृद्ध आणि समरस नगरी बनू लागली आहे.
