नागपूरच्या मध्य मतदारसंघातील काँग्रेस नेते बंटी शेळके विधानसभा निवडणुकीत हरल्यावर काही काळ अनॲक्टिव्ह राहिले. पण आता ते पुन्हा सक्रिय भूमिकेत दिसून येत आहेत.
नागपूरच्या राजकीय आखाड्यात पुन्हा एकदा रणधुमाळी सुरू झाली आहे. सहा वर्षांच्या प्रतीक्षेनंतर महानगरपालिका निवडणुकीचा बिगूल वाजला असून, प्रत्येक पक्षाने कंबर कसली आहे. प्रभाग रचनेच्या घोषणेनंतर ही लढाई आणखी तीव्र झाली आहे. मध्य नागपूरच्या राजकीय रणभूमीवर, जिथे संघाचे मुख्यालय आहे, तिथे सत्तेची लढाई नेहमीच चुरशीची राहिली आहे. 2024 विधानसभा निवडणुकीत काँग्रेसचे बंटी उर्फ ऋषिकेश शेळके यांनी भाजपच्या प्रवीण दटके यांच्याशी अटीतटीचा सामना केला होता. पण, शेवटच्या क्षणी प्रवीण दटके यांनी 12 हजारांहून अधिक मतांनी विजय मिळवत मध्य नागपूरचा गड अभेद्य ठेवला.
बंटी शेळके यांना पराभवाचा धक्का सहन करावा लागला. त्यांचा डंका वाजेल अशी अपेक्षा असलेल्या मध्य नागपूरच्या जनतेला निराशा हाती लागली. या पराभवानंतर बंटी शेळके काही काळ शांत राहिले. पण आता, महापालिका निवडणुकीच्या पार्श्वभूमीवर, त्यांनी पुन्हा मैदानात उतरण्याची तयारी सुरू केली आहे. कार्यकर्त्यांच्या भेटी, पक्षप्रमुखांशी चर्चा आणि रणनीती आखण्यात ते जोमाने गुंतले आहेत. मध्य नागपूरच्या गल्लीबोळातून पुन्हा एकदा बंटी दादांचा आवाज घुमू लागला आहे. हरलेली बाजी जिंकायची आहे, असा निर्धार त्यांच्या कृतीतून दिसतो. पण प्रश्न असा आहे, की संघाच्या गडावर काँग्रेसचा झेंडा फडकवण्यासाठी बंटी शेळके यशस्वी ठरतील का? मध्य नागपूरचा इतिहास पाहता, भाजपने हा गड नेहमीच राखला आहे.
Flyover closure : अमरावतीकरांनो, पर्यायी मार्गांची तयारी करा
भाजपचा गड भेदणे
2024 लोकसभा आणि विधानसभा निवडणुकीतही त्यांनी आपली ताकद दाखवली. पण, बंटी शेळके यांच्यासाठी ही लढाई सोपी नाही. त्यांच्या पाठीशी असलेला मोठा मतदारवर्ग, विशेषतः तरुण आणि सामान्य नागरिक, त्यांना पाठबळ देताना दिसतात. प्रियंका गांधी यांनी विधानसभेत शक्तिप्रदर्शन करताना बंटी शेळके यांना पाठिंबा दिला होता. आता महापालिका निवडणुकीतही काँग्रेस मोठा डाव खेळण्याच्या तयारीत आहे. बंटी शेळके यांनी गेल्या पराभवातून धडा घेतला असून, यंदा ते अधिक आक्रमक पवित्र्यात दिसत आहेत. नागपूरच्या गल्लीबोळातून फिरताना बंटी शेळके यांचा उत्साह आणि कार्यकर्त्यांचा जोश पाहण्यासारखा आहे. हा गड हिसकावण्याची हीच ती वेळ आहे, असं अनेकांचे म्हणणे आहे.
महापालिका निवडणुकीत प्रभाग रचनेमुळे मतदारसंघातील समीकरणं बदलली असली, तरी बंटी शेळके यांच्या समर्थकांचा विश्वास ढळलेला नाही. त्यांच्या रणनीतीत स्थानिक मुद्द्यांना प्राधान्य देण्याचा आणि मतदारांशी थेट संवाद साधण्याचा समावेश आहे. मध्य नागपूरच्या मतदारांना स्वच्छ पाणी, चांगले रस्ते आणि रोजगाराच्या संधी यासारख्या मूलभूत समस्यांवर बंटी शेळके यांच्याकडून मोठ्या अपेक्षा आहेत. पण, भाजपचा अभेद्य गड भेदण्यासाठी बंटी शेळके यांना कसून मेहनत करावी लागणार आहे. प्रवीण दटके यांनी विधानसभेत दाखवलेली ताकद आणि संघटनेची पकड यंदाही काँग्रेससाठी आव्हान ठरू शकते. तरीही, बंटी शेळके यांचा आत्मविश्वास आणि कार्यकर्त्यांचा जोश पाहता, ही लढाई सोपी नसेल, पण रंगतदार नक्कीच असेल.
मध्य नागपूरच्या जनतेला आता प्रश्न पडला आहे. बंटी शेळके यंदा कमबॅक करून इतिहास रचणार का, की भाजप पुन्हा एकदा आपले वर्चस्व सिद्ध करणार? याचं उत्तर येत्या महापालिका निवडणुकीच्या निकालातून मिळेल.
