नागपूर पोलिसांच्या ‘ऑपरेशन यू टर्न’ मोहिमेमुळे शहराच्या रस्त्यांना नवा सुरक्षिततेचा श्वास मिळाला आहे. अपघात कमी झाले, शिस्त वाढली आणि नागपूर सुरक्षित शहराकडे वाटचाल करत आहे.
नागपूरच्या रस्त्यांवर आता अपघातांचा धुरळा थांबला आहे. शिस्त आणि सुरक्षिततेचा नवा सूर ऐकू येतोय, याचं सगळं श्रेय जातं नागपूर शहर पोलिसांच्या ऑपरेशन यू टर्नला. पोलीस आयुक्त डॉ. रवींद्र सिंगल यांच्या नेतृत्वाखाली 10 जुलै 2025 पासून सुरू झालेल्या या मोहिमेने रस्ते अपघातांमुळे होणाऱ्या मृत्यूंना 60 ने कमी करून एक नवा सुरक्षा पॅटर्न रचला आहे. बेफाम ड्रायव्हर्सना कायदा आणि शिस्तीचा ‘सिग्नल’ देत, नागपूर पोलिसांनी रस्त्यांना ‘सुरक्षिततेचं रनवे’ बनवलं आहे. ही मोहीम केवळ नियम लागू करण्यापुरती मर्यादित नसून, नागपूरकरांच्या आयुष्यात ‘सेफ ड्राइव्ह, हॅपी लाइव्ह’ चा मंत्र रुजवण्याचा एक यशस्वी प्रयत्न आहे.
जानेवारी ते ऑगस्ट 2024 च्या तुलनेत 2025 मध्ये प्राणघातक अपघात 253 वरून 195 वर घसरले, तर गंभीर जखमींची संख्या 436 वरून 417 पर्यंत खाली आली. या आकडेवारीने पोलिसांच्या कठोर अंमलबजावणी आणि जनजागृतीच्या प्रयत्नांना सुरक्षिततेची सलामी मिळाली आहे. रात्रीच्या नाकाबंदीपासून ते बेकायदेशीर वाहनांवरील कारवाईपर्यंत, नागपूर पोलिसांनी रस्त्यांवर शिस्तीचा झेंडा फडकावला आहे. या मोहिमेमुळे केवळ रस्ते सुरक्षित झाले नाहीत, तर शहरातील गुन्हेगारीलाही नो एंट्रीचा बोर्ड लागला आहे. नागपूर आता सुरक्षित शहराच्या दिशेने वेगाने वाटचाल करत आहे.
अपघातप्रवण क्षेत्रांचा मेकओव्हर
शहरातील 33 ठिकाणी संध्याकाळी 7 ते पहाटे 2 पर्यंत नाकाबंदी करून पोलिसांनी ड्रंकन ड्रायव्हर्सला ‘चेकमेट’ दिलं आहे. रोज 1 हजारहून अधिक वाहनचालकांची तपासणी करत, 2 हजार 500 व्यक्तींवर मद्यप्राशन करून वाहन चालवल्याबद्दल कारवाई झाली. त्यांची वाहने जप्तीच्या जाळ्यात अडकली. या कठोर उपायांनी रस्त्यांवर ‘सोबर ड्राइव्ह’ची लहर निर्माण झाली आहे. नागपूरभर विशेष पथके तैनात करून अतिवेग, चुकीच्या बाजूने ड्रायव्हिंग आणि ओव्हरलोडिंगला ब्रेक लावला गेला आहे. रोज साठहून अधिक व्यक्तींवर BNS कलम 281 अंतर्गत कारवाई होऊन वाहने जप्त होतात. ज्यामुळे बेफाम वाहनचालकांना शिस्तीचा धडा मिळाला आहे. अल्पवयीनांना वाहन चालवू देणाऱ्या पालकांवर मोटार वाहन कायद्याच्या कलम 199अ अंतर्गत कारवाई होत आहे. रोज 10 आणि आतापर्यंत पन्नासहून अधिक पालकांना ‘सुरक्षा पाठ’ शिकवला गेला आहे. ज्यामुळे रस्त्यांवर ‘किड ड्रायव्हर्स’ची संख्या कमी झाली आहे.
Municipal Elections : अकोला जिल्हा परिषदेवर ठाकरे गटाची वर्चस्वासाठी लढाई
अपघातप्रवण क्षेत्रांना झिगझॅग बेरिकेड्स, फलक आणि ब्लिंकर्सने सुरक्षिततेचं मेकओव्हर दिलं गेलं आहे. हे उपाय प्रवाशांना सतर्क करत अपघातांना ‘प्रिव्हेंटिव्ह पंच’ देतात. नागपूर महानगरपालिकेच्या सहकार्याने पार्किंग आणि नो-पार्किंग झोन निश्चित करून वाहतूक कोंडीला ‘गुडबाय’ केलं आहे. तसेच, 25 हून अधिक बेकायदेशीर फूड ट्रक्सवर मोटार वाहन कायद्यांतर्गत कारवाई करून रस्त्यांना ‘क्लीन लूक’ दिला गेला. इनर रिंग रोडवर खासगी बस पार्किंगवर बंदी घालून 45 बसांवर BNS कलमांतर्गत कारवाई झाली. वाहतूक पोलिसांना स्मार्ट बूथमधून सक्रिय ठेवून आणि अनुपस्थितांवर शिस्तभंगाची कारवाई करून पोलिसांनी ‘विश्वासाचा व्हिक्ट्री सिग्नल’ दिला आहे. ऑपरेशन यू टर्नने रस्ते अपघात, मृत्यू आणि बेफाम वाहनचालकांना ‘यू टर्न’ घ्यायला लावलं आहे. पार्किंग शिस्तबद्ध झाली, बेकायदेशीर वाहने हटली आणि नागपूरकरांना रस्त्यांवर ‘सुरक्षिततेचा सूर’ अनुभवायला मिळतोय.
