नागपूरमध्ये घरगुती एलपीजी सिलिंडरचा गैरवापर करून काळ्या बाजारात विक्री करणाऱ्या टोळीचा पर्दाफाश झाला आहे. पोलिसांनी छापा टाकून दोघांना अटक केली असून 25 सिलिंडर आणि इतर साहित्य जप्त करण्यात आले आहे.
शहरात घरगुती एलपीजी सिलिंडरचा गैरवापर करून काळ्या बाजारात विक्री करणाऱ्या टोळीवर पोलिसांनी मोठी कारवाई केली आहे. कपिल नगर पोलिसांनी नारी रोड येथील दीपक टायर चौक परिसरात गुप्त माहितीच्या आधारे छापा टाकत गैरकायद्याने व्यावसायिक सिलिंडरमध्ये गॅस भरून विकणाऱ्या दोघांना रंगेहाथ पकडले. या कारवाईत एकूण 25 सिलिंडर, विशेष नॉझल, इलेक्ट्रॉनिक वजनकाटे असा 3 लाख 76 हजारांचा मुद्देमाल जप्त करण्यात आला.
गुन्हेगारी स्वरूपाचा हा प्रकार नागपूर शहराच्या सुरक्षेच्या पार्श्वभूमीवर गंभीर समजला जात आहे. नागरीकांच्या जिवाशी खेळणाऱ्या या प्रकाराला पोलिसांनी उघडकीस आणले आहे. अटक केलेले आरोपी हे मूळचे राजस्थानातील असून नागपूरमध्ये वास्तव्यास होते. दोघांनी एलपीजी सिलिंडरच्या वितरणाच्या आड गैरकृत्याचा मोठा साखळीव्यवसाय उभारला होता.
डिलिव्हरी बॉयचा सहभाग
मोहनसिंह जगदीशसिंह ( वय 24) आणि विष्णुकुमार कुलदीपसिंह रेहर ( वय 22) अशी अटक करण्यात आलेल्या आरोपींची नावे आहेत. दोघेही नागपूरच्या सिव्हिल लाईन्स भागातील एका एचपी गॅस एजन्सीत डिलिव्हरी बॉय म्हणून कार्यरत होते. त्यांनी घरगुती वापरासाठी असलेल्या सिलिंडरमधून खास नॉझलच्या साहाय्याने व्यावसायिक सिलिंडरमध्ये गॅस हस्तांतर करण्याचा बिनधास्त व्यवसाय सुरू केला होता. या माध्यमातून दररोज काही किलो गॅस चोरून काळ्या बाजारात विक्री केली जात होती.
आरोपी शहरात भाड्याने घेतलेल्या घरात या अवैध धंद्याचे केंद्र चालवत होते. एजन्सी व्यवस्थापनाच्या आड या गुन्ह्याची ही साखळी उभी राहिल्याचा संशय पोलिसांनी व्यक्त केला आहे. यामुळे संबंधित गॅस एजन्सीवरही कारवाई होण्याची शक्यता असून चौकशीचे चक्र वेगाने फिरवले जात आहे.
वितरण व्यवस्थेचा दुरुपयोग
कारवाईत पोलिसांनी 17 एचपी, 7 भारत गॅस आणि 1 इंडेन असे एकूण 25 सिलिंडर जप्त केले. यासोबतच गॅस ट्रान्स्फर नॉझल आणि इलेक्ट्रॉनिक वजनकाटाही मिळवण्यात आले. नागपूर शहरात एलपीजी वितरण प्रणालीतील त्रुटींचा गैरफायदा घेत हे प्रकार सुरू होते. यावर ही कारवाई शिक्कामोर्तब करते. अत्यावश्यक वस्तूंच्या सुरक्षेच्या दृष्टीने हा प्रकार अत्यंत गंभीर आहे. भविष्यातील दुर्घटनांना आमंत्रण देणारा आहे.
पोलीस उपनिरीक्षक योगेश नळटे यांच्या तक्रारीवरून गुन्हा दाखल करण्यात आला आहे. ही कारवाई पोलीस उपनिरीक्षक अमोल ढोकणे यांच्या मार्गदर्शनाखाली पार पडली आहे. या प्रकरणाचा अधिक सखोल तपास सुरू आहे.
विधिमान्य यंत्रणांवर प्रश्नचिन्ह
घडलेल्या घटनेतून नागपूरच्या प्रशासकीय यंत्रणांच्या गाफीलपणाचे दर्शन घडते. एलपीजीसारख्या अत्यावश्यक आणि धोकादायक वस्तूंच्या वितरणावर योग्य नियंत्रण नसेल तर अशा प्रकारची घातक चुकांमध्ये वाढ होईल. नागपूर पोलिसांनी केलेली ही कारवाई अन्य भागांतील अशा प्रकारच्या अवैध व्यवहारांचीही पोलखोल होईल, अशी अपेक्षा नागरिकांमध्ये व्यक्त होत आहे. प्रशासनाने आता संबंधित यंत्रणेला जबाबदारीवर धरून ती नीट कार्यरत करणे आवश्यक आहे. जनतेच्या सुरक्षेला सर्वात जास्त महत्व देणे गरजेचे आहे.
