भाजपचे प्रदेशाध्यक्ष रवींद्र चव्हाण यांच्या नागपूर दौऱ्याकडे अनेकांचे लक्ष होते. मात्र हा दौरा अत्यंत घाईचा ठरला आहे.
विदर्भातील भाजप नेत्यांचे प्रदेशाध्यक्ष रवींद्र चव्हाण यांच्या नागपूर दौऱ्याकडे लक्ष होते. मात्र चव्हाण यांचा दौरा अत्यंत घाईचा झाला आहे.त्याबाबत चव्हाण यांचाही नाईलाज झाला आहे. त्यामुळे चव्हाण उपराजधानीत आलेत, पण इच्छा असूनही कोणाला फारसे काही न देता परत गेले, असेच म्हणावे लागणार आहे. विदर्भातील काही जिल्ह्यांमध्ये भाजपमध्ये धुसफूस सुरू आहे. विशेषत: चंद्रपूर, अकोला, अमरावती, बुलढाणा येथील पदाधिकाऱ्यांच्या तक्रारींचे प्रमाण वाढले आहे. विशेषत: अकोला जिल्ह्यातून आलेल्या तक्रारींनी तर ‘गिनीज बुक ऑफ वर्ल्ड रेकॉर्ड’मध्ये नाव नोंदवायचे की काय, असे ठरविलेले दिसत आहे. अकोल्याच्या भाजपमध्ये प्रचंड लाथाडी आहे. त्यामुळेच अकोला पश्चिम मतदारसंघात पक्षाचा लाजीरवाणा पराभव झाला. तोंड काढायलाही जागा उरली नाही, असा हा पराभव आहे.
अकोल्यातील तक्रारींची संख्या वाढल्याने अकोल्यासह विदर्भातील अनेक पदाधिकाऱ्यांची भेट रवींद्र चव्हाण घेणार होते. यात काही मोठ्या नेत्यांच्या नावांचाही समावेश होता. मात्र अचानक त्यांच्या नागपूर दौऱ्यात फेरबदल झाला. चव्हाण हे अत्यंत घाईत ‘ऑरेंज सिटी’त दाखल झालेत. काही मोजक्या नेत्यांची भेट यावेळी त्यांची झाली. त्यामुळे नाराजांना पडलेले चेहरे घेऊनच परत जावे लागणार आहे. चव्हाण नागपुरात आल्याने उपराजधानीत मात्र उत्साह दिसला. इतर जिल्ह्यांप्रमाणे नागपुरात भाजपमध्ये वाद नाहीत.
लक्ष गरजेचे
सद्य:स्थितीत राज्यात नगर परिषद आणि नगर पंचायतीची निवडणूक होत आहे. त्यानंतर जिल्हा परिषद, पंचायत समितीची निवडणूक होईल, असं सांगण्यात येत आहे. नवीन वर्षात कदाचित महापालिका निवडणुकीचा बार उडेल असे चित्र आहे. त्यामुळे मार्च 2026 पर्यंत निवडणुकीचा माहौल राहणार आहे. जिल्हा परिषद आणि महापालिका निवडणुकीपूर्वी सगळ्या नाराजांना सोबत घेण्याचे काम भाजप करणार आहे. चंद्रपूर, अकोला, अमरावती येथील भाजप नेत्यांना चव्हाण यांना ऐकून घ्यावे लागणार आहे. अमरावतीमधील काही निलंबित पदाधिकाऱ्यांना भाजपने पक्षात परत घेतले आहे. अकोल्यात मात्र अद्याप असे काही झालेले नाही. चंद्रपुरात उघड गटबाजी नसली, तरी वस्तुस्थिती लपून राहिलेली नाही.
पक्षातील सगळ्या नाराजांना सोबत घेत चव्हाणांना संभाव्य ‘डॅमेज मॅनेजमेंट’ करावे लागणार आहे. भाजपमधील अनेकांना चव्हाण यांच्याकडून मोठ्या अपेक्षा आहेत. मात्र यंदा नागपूरच्या दौऱ्यात त्यांना वेळेच्या अभावाचा सामना करावा लागत आहे. अशात ‘मुझे कुछ कहना है’ असं म्हणत नागपूरकडे रवाना झालेल्यांना फारसा काही लाभयोग दिसला नाही. महापालिका निवडणुकीपूर्वी सगळं काही रवीभाऊ मॅनेज करतील, असं सांगण्यात येत आहे. विदर्भात अकोला, अमरावती, नागपूर, चंद्रपूर येथे महापालिका निवडणूक आहे. या सर्व महापालिकांवर सत्ता मिळविणे भाजपसाठी महत्वाचे आहे. ही घडी प्रदेशाध्यक्ष म्हणून चव्हाण कसे बसवितात, याकडं सगळ्यांचं लक्ष आहे.
