महाराष्ट्राच्या राजकारणात पुन्हा खळबळ उडाली आहे. काँग्रेस प्रदेशाध्यक्ष नाना पटोले यांनी महायुती सरकारवर लोकशाही गुदमरल्याचा जोरदार आरोप केला आहे.
महाराष्ट्राच्या राजकीय रणभूमीवर काँग्रेस प्रदेशाध्यक्ष नाना पटोलेंनी महायुती सरकारवर जोरदार तोफ डागली आहे. सत्ताधारी गटाने इंग्रज आणि निजामांच्या क्रूरतेलाही मागे टाकत जनतेच्या स्वातंत्र्याला कोंडीत पकडल्याचा त्यांचा आरोप आहे. जनसुरक्षा कायद्याच्या नावाखाली विरोधकांना नक्षलवादी ठरवण्याचा खेळ सुरू असल्याची टीका केली. त्यांनी सत्तेच्या दुरुपयोगावर बोट ठेवले आहे. ओबीसी आणि मराठा समाजाच्या हक्कांवर गदा आणणाऱ्या धोरणांना उघड्यावर आणत, पटोलेंनी राजकीय वातावरण तापवले आहे.
आगामी स्थानिक स्वराज्य संस्थांच्या निवडणुकीसाठी काँग्रेस स्थानिक नेत्यांच्या निर्णयांना प्राधान्य देणार असल्याचे पटोलेंनी ठासून सांगितले. परिस्थितीचा आढावा घेऊन कार्यकर्त्यांशी चर्चा करून धोरण ठरवण्याचा पक्षाचा अट्टहास आहे. नागपूरच्या ओबीसी मोर्चातील अनुपस्थितीबद्दल स्पष्टीकरण दिले. जवळच्या कार्यकर्त्याच्या निधनामुळे अंत्यसंस्काराला उपस्थित राहण्यासाठी उशीर झाल्याने मोर्चाला जाता आले नसल्याचे त्यांनी स्पष्ट केले. मनोज जरांगे यांना राजकीय नेता न मानता, त्यांनी भाजपच्या बहुजन विश्वासघातावर लक्ष केंद्रीत केले आहे.
Congress : पदवीधर रणांगणात जिल्ह्यानिहाय समन्वयकांची टीम सज्ज
लोकशाहीचा कुचंबणारी सत्ता
महायुती सरकारने जनसुरक्षा कायद्याचा गैरवापर करत व्यक्तिस्वातंत्र्याची पायमल्ली केल्याचा पटोलेंचा थेट हल्ला आहे. इंग्रज काळातही विरोधी मतांना जागा होती. पण आज भाजपने अघोषित आणीबाणी लादल्याची त्यांची जहरी टीका आहे. नक्षलवादी ठरवून आवाज दाबण्याचा हा संकल्प निजामांनाही लाजवेल, असे ते म्हणतात. ओबीसी आणि मराठा समाजाच्या आरक्षणाच्या जखमांवर मीठ चवरीत, भाजपने सामाजिक न्यायाला हरताळ फासल्याचा आरोप करत पटोलेंनी सत्ताधाऱ्यांना धारेवर धरले.
देवेंद्र फडणवीसांनी 2014 मध्ये मराठा समाजाला 16 टक्के आरक्षणाचे वचन देऊन धोका दिल्याचा मुद्दा पटोलेंनी उचलला. ओबीसींचा विश्वासघात करणाऱ्या भाजपला याचे परिणाम भोगावे लागतील. हा इशारा देत त्यांनी मराठा-ओबीसी भांडण पेटवून महाराष्ट्र अदानीच्या हवाली करण्याचा सत्ताधारी डाव उधळला. विधानसभेत या प्रश्नांची उत्तरे न दिल्यास फडणवीसांचे राजकीय वस्त्रहरण करण्याची धमकी देत, पटोलेंनी रणनाद घुमवला आहे.
महागाई, बेरोजगारी आणि शेतकऱ्यांच्या दुरवस्थेत नापास ठरलेल्या महायुतीला जनतेचा रोष भोगावा लागेल, असा पटोलेंचा ठाम विश्वास आहे. बेईमानी आणि पैशाच्या जोरावर सत्तेत आलेल्या महायुतीविरुद्ध जनतेचा संताप असल्याचे सांगितले. ते काँग्रेसला स्थानिक निवडणुकीत प्रचंड संधी असल्याचा दावा करतात. सूर्यप्रकाशासारखे सत्य उघड होईल. काँग्रेस महाराष्ट्रात विजयाचा झेंडा फडकवेल, असा त्यांचा विश्वास राजकीय लाट उभारतो. पटोलेंच्या या तिखट भूमिकेने महायुतीच्या तंबूत खळबळ उडाली आहे.
