अकोल्यात शिवसेनेच्या संघटनात खळबळजनक आणि निर्णायक घडामोडी घडल्या आहेत. आगामी स्थानिक स्वराज्य संस्था निवडणुकीच्या पार्श्वभूमीवर शिंदे गटाने मोठी राजकीय खेळी खेळत संघटन पातळीवर ‘गेमचेंजर’ पावले उचलली आहेत.
भाजपातील बाळापुर मतदारसंघाचे माजी आमदार आणि अकोला जिल्ह्याचे वजनदार नेते नारायणराव गव्हाणकर यांनी 20 मे रोजी मुंबईत शिवसेना एकनाथ शिंदे गटात प्रवेश केला. त्यानंतर गव्हाणकर यांना तात्काळ जिल्हाप्रमुख पदाची जबाबदारी देण्यात आली. ही झपाट्याने झालेली नियुक्ती राजकीय वर्तुळात मोठ्या चर्चेचा विषय ठरली आहे. गव्हाणकर यांच्याकडे आता अकोट व बाळापूर या महत्त्वाच्या तालुक्यांचे संघटनात्मक नेतृत्व असेल.
दरम्यान, अकोला जिल्हा परिषदेचे माजी सभापती आणि समर्पित नेतृत्व म्हणून ओळखले जाणारे चंद्रशेखर पांडे यांनाही शिवसेनेने जिल्हाप्रमुखपद बहाल केले आहे. मूर्तिजापूर तालुक्याची धुरा पांडे यांच्या हाती देण्यात आली आहे. हे दोन्ही नेते शिवसेनेच्या जिल्हा संघटनेत आता निर्णायक भूमिका बजावणार आहेत. या दोन नव्या नियुक्त्यांमुळे अकोला जिल्ह्यात जिल्हाप्रमुखांची संख्या चारवर पोहोचली आहे. यापूर्वी श्रीरंग पिंजरकर आणि अश्विन नवले या नेत्यांकडे ही जबाबदारी होती. मात्र नव्या बदलांनंतर त्यांच्याकडील काही तालुक्यांचा प्रभार वजा करण्यात आला आहे. आता जिल्हा संघटनेत एक ‘शक्ती चौकट’ उभी राहिली आहे.
अधिक मजबूत
या संघटनात्मक फेरबदलांमुळे शिवसेनेतील संपर्क नेते गोपीकिशन बाजोरिया यांचे नेतृत्व अधिक ठळकपणे समोर आले आहे. काही पदाधिकाऱ्यांनी त्यांच्या विरोधात सूर लावण्याचा प्रयत्न केला असला, तरी पक्षश्रेष्ठींनी बाजोरिया यांच्यावर विश्वास ठेवत गव्हाणकर-पांडे यांची नियुक्ती त्यांच्या पुढाकारातून पूर्ण केली. गव्हाणकर यांनीही मुंबईत बाजोरिया यांच्या मार्गदर्शनाखाली उपमुख्यमंत्री एकनाथ शिंदे यांची भेट घेऊन पक्षप्रवेश केला. त्यानंतर लगेचच त्यांच्याकडे जिल्ह्याच्या दोन्ही महत्त्वाच्या तालुक्यांची जबाबदारी सोपवण्यात आली.
या घडामोडींवर बोलताना बाजोरिया म्हणाले, पक्षाच्या विचारधारेनुसार काम करणाऱ्यांचा सन्मान केला जातो. तक्रारी व कुरघोड्यांपेक्षा कामगिरी महत्त्वाची आहे. गव्हाणकर आणि पांडे यांची निवड हीच त्याचे उत्तम उदाहरण आहे, असे बाजोरिया म्हणाले. गव्हाणकर यांच्या अनुभवाची सांगड पांडे यांच्यासारख्या कार्यक्षम नेतृत्वाशी घालून शिवसेनेने अकोला जिल्ह्यात ‘शक्तिशाली चौकट’ उभी केली आहे. ही नव्याने सजलेली जिल्हा टीम आगामी स्वराज्य संस्था निवडणुकीत निर्णायक भूमिका बजावेल, असा विश्वास शिवसैनिकांमध्ये निर्माण झाला आहे.
राजकीय घडामोडी
बाळापुर, अकोट आणि मूर्तिजापूरसारख्या महत्त्वाच्या भागांवर आता शिंदे गटाची राजकीय पकड अधिक मजबूत होण्याची शक्यता आहे. जिल्हा परिषद, पंचायत समिती आणि नगर पालिकांमध्ये भगवा फडकवण्याचा निर्धार नव्या नेतृत्वातून ठळकपणे उमटत आहे. त्यात नारायण गव्हाणकर यांनी शिंदे गटात प्रवेश केल्याने भाजपात आणि कार्यकर्त्यांमध्ये खळबळ उडाली आहे. गव्हाणकर यांना पाठिंबा येणाऱ्या कार्यकर्त्यांना कसे बांधून ठेवावे, यासाठी भाजपला कसोटी करावी लागणार आहे. या सर्व घडामोडींमधून शिवसेना एकनाथ शिंदे गटाचा ठसा अकोल्यात कसा उमटणार, हे आता येणारा काळच सांगेल.
