नरखेड येथील रेल्वे मार्गाला निर्माण होऊन अनेक वर्ष ओलांडून गेली आहेत. अद्यापही या मार्गाला प्रवासी गाड्यांची काम करता जाणवत आहे.
विदर्भातील महत्त्वाच्या रेल्वे मार्गांपैकी एक असलेल्या नरखेड रेल्वे मार्गावर प्रवासी गाड्यांची कमतरता जाणवत आहे. या मार्गावर मोठ्या प्रमाणावर मालगाड्या धावत असल्याने प्रवाशांचे हाल होत आहेत. स्थानिक नागरिक, विद्यार्थी आणि नियमित प्रवास करणाऱ्या प्रवाशांना योग्य सोयी-सुविधा मिळाव्यात, यासाठी अनेकदा मागणी करण्यात आली आहे. मात्र अद्यापही प्रशासनाकडून समाधानकारक प्रतिसाद मिळालेला नाही. नरखेड रेल्वे मार्गाला निर्माण होऊन अनेक वर्ष झाली आहे. परंतु आजही या रेल्वे मार्गाला प्रवासी गाड्यांची प्रतीक्षा आहे.
सध्या नरखेड मार्गावर बहुसंख्य मालगाड्याच धावत आहेत. त्यामुळे प्रवासी गाड्यांचा वेग मंदावला आहे किंवा काही गाड्या थेट बंद करण्यात आल्या आहेत. अनेक वेळा प्रवाशांना लांबच्या मार्गाने प्रवास करावा लागत आहे, परिणामी वेळेचा आणि पैशाचा अपव्यय होत आहे. विद्यार्थ्यांना महाविद्यालये आणि शाळांमध्ये वेळेवर पोहोचण्यास अडचणी येत आहेत, तर रोजंदारीवर काम करणाऱ्या मजुरांनाही याचा मोठा फटका बसत आहे.
स्थानीय प्रवाशांची मागणी
नरखेड आणि आजूबाजूच्या परिसरातील नागरिक, व्यापारी आणि शासकीय कर्मचारी यांच्यासाठी या मार्गावर प्रवासी गाड्या वाढवण्याची नितांत गरज आहे. स्थानिक प्रवाशांनी रेल्वे प्रशासनाकडे प्रवासी गाड्यांची संख्या वाढवण्याची मागणी वारंवार केली आहे, मात्र अद्याप कोणताही ठोस निर्णय झालेला नाही. त्यामुळे नरखेड रेल्वे मार्ग केवळ मालगाड्यांच्या वाहतुकीसाठी निर्माण केला का? असा प्रश्न उपस्थित होत आहे.
स्थानिक आमदार, खासदार आणि काही सामाजिक कार्यकर्त्यांनी प्रवाशांच्या समस्येकडे लक्ष वेधण्याचा प्रयत्न केला असला, तरीही आजतागायत फक्त आश्वासनांची बरसात होत आहे. प्रवासी वाहतूक सुरळीत होण्यासाठी रेल्वे प्रशासनाने ठोस पाऊले उचलण्याची गरज आहे.
उपाययोजना आणि अपेक्षा
रेल्वे प्रशासनाने त्वरित हस्तक्षेप करून प्रवाशांसाठी काही तात्पुरती सोय करावी. भविष्यात नियमित गाड्या सुरू करण्यासाठी योग्य पाऊले उचलावीत, अशी मागणी वाढत आहे. प्रवाशांच्या मागण्यांकडे प्रशासन आणि सरकारने गांभीर्याने पाहिले नाही, तर स्थानिक नागरिक आंदोलन देखील छेडू शकतात. नरखेडच्या प्रवाशांना किती दिवस वाट पाहावी लागणार? प्रशासन लवकर निर्णय घेणार का? हे पाहणे महत्त्वाचे ठरणार आहे.
