महायुतीमध्ये ‘घड्याळ’ चांगलीच टीकटीक करीत आहे. परंतु अकोल्यात मात्र पक्षाचे ‘सेल’ ऊर्जेच्या बाबतीत कमी पडत आहे.
‘गुलाबी जॅकेट अन् ताकद जोरदार. अजितदादांनी कामगिरी झाली धारधार’ असं गाणं भविष्यात ऐकायला मिळालं तर नवल वाटायला नको. लाडकी बहिण योजना आणि गुलाबी जॅकेटची जादू दाखवत दादांनी महाराष्ट्राच्या राजकारणात जोरदार मुसंडी मारली. काकांसोबत फारकत घेतल्यानंतर दादा संपले अशा वल्गना अनेकांनी केल्या. मात्र दादांची ‘पावर’ वाढली. मात्र दादांच्या घड्याळीचे सेल अकोल्यात पाहिजे तसे ऊर्जावान कामगिरी दाखवू शकले नाहीत.
अकोल्यात दादांच्या गटातून अमोल मिटकरी हे आमदार आहेत. विजय देशमुख, मदत भरगड, कृष्णा अंधारे, शिवा माहोड अशी जुनी नावेही राष्ट्रवादी काँग्रेसच्या यादीत आहेत. मात्र या नावांच्या तुलनेत घड्याळीला कॉटन सिटीत योग्य टायमिंग साधता आले नाही. त्याला अनेक कारणे आहेत. त्याचे खापर एकट्या आमदार अमोल मिटकरी यांच्यावर फोडता येणार नाही. पण आमदार असल्यामुळे मिटकरी यांना ही जबाबदारी झटकताही येणार नाही. अकोल्याच्या बाबत कडू वाटत असले तरी काही सत्य राष्ट्रवादी काँग्रेसला स्वीकारावे लागणार आहे.
केवळ दादांची ढाल
आमदार अमोल मिटकरी सुरुवातीपासूनच अजितदादांची ढाल म्हणून पुढे आले. दादांबद्दल कोणी एक अक्षरही बोलले तरी मिटकरी लगेच शस्त्र उपसतात. बरेचदा त्यांनी गरजेपेक्षा मोठी उडीही घेतली. दादांच्या प्रचार प्रमुखाने त्यांच्या खांद्यावर हात ठेवला. दादांना यात काहीच हरकत नव्हती. परंतु मिटकरींनी हा मुद्दा सोशल मीडियावर लावून धरला. अखेर पार्थ पवार यांच्या माध्यमातून दादांना मिटकरी यांना योग्य तो संदेश द्यावा लागला. तो देखील फेसबुकवर. तत्पूर्वी मिटकरी यांनी मनसे प्रमुख राज ठाकरे यांच्यावर टीका केली. त्यानंतर अकोल्यात राडा झाला. मनसेच्या एका पदाधिकाऱ्याला यात प्राण गमवावे लागले.
मनसेच्या या हल्ल्यानंतर मिटकरी यांनी आंदोलन केले. पण मिटकरी या आंदोलनात एकटे पडले. हा सगळा ‘फ्लॅशबॅक’ सांगण्यामागे हेतू एवढाच की, दादांच्या या तलावारीला अकोल्यात पक्षसंघटन वाढविण्याबाबत धारदार कामगिरी दाखविता आली नाही. पक्षसंघटनेबाबत केवळ मिटकरी यांच्याबाबतच बोलून चालणार नाही. कृष्णा अंधारे, शिवा मोहोड, विजय देशमुख, मदन भरगड या नावांचा विचारही केला पाहिजे. अमोल मिटकरी, कृष्णा अंधारे आणि शिवा मोहोड या राष्ट्रवादीतील त्रिकोणाचे तीन कोपरे. हे कोपरे कधीच अकोल्यात एकत्र आले नाहीत.
मतभेद भोवले
राष्ट्रवादी काँग्रेसच्या अजित पवार गटातही मतभेद आहेत. अकोल्यात एकमेकांविरोधात आरोप-प्रत्यारोप करण्यापर्यंत हे मतभेद पोहोचले. शिवा मोहोड यांनी तर मिटकरी प्रत्येक कामात कमिशन मागतात असा आरोप केला. त्यामुळे राष्ट्रवादीचे पक्षसंघटन पाहिजे त्या प्रमाणात वेगाने मजबूत झाले नाही. विजय देशमुख यांनी अकोला महापालिकेत अनेक पदं भूषविली. राष्ट्रवादीत आल्यानंतर ते कधीही कोणत्याही वादात पडले नाही. त्यांनी शांत, संयम आणि वादात न पडण्याचा मार्ग निवडला. मात्र यात त्यांनी पक्षाच्या बांधणीकडे पाहिजे ते लक्ष दिले नाही. कदाचित इतर नेत्यांच्या स्पर्धेत, मतभेदात कशाला पडायचे म्हणून ते अलीप्त राहिले असावे. परंतु त्याचा परिणाम पक्षाच्या विस्तारावर झाला.
काँग्रेसचे एकेकाळचे सच्चे आणि निष्ठावान मदत भरगड हे माजी महापौर. अलीकडेच त्यांनी ‘हात’ बाजूला करीत मनगटावर ‘घड्याळ’ बांधली. भरगड सध्या पक्षात नवखे आहेत. त्यामुळे ते सावध भूमिका घेत आहेत. तसंही महाविकास आघाडीमध्ये असताना दादांच्या गटातील अनेकांनी भाजपशी अकोल्यात चांगला पंगा घेतला. त्यामुळे सत्तेत वाटेकरी झाल्यानंतरही कटुता कायम आहे. परिणामी अकोल्यात दादांची राष्ट्रवादी तशी महायुतीसोबत फारशी प्रभावी नाही.
तिघांचा जोर
तुलनात्मक विचार केला तर भाजप अकोला जिल्ह्यात सर्वांत बळकट आहे. त्याखालोखाल शिवसेना उद्धव ठाकरे गटाचे नेटवर्क आहे. वंचित बहुजन आघाडीची मुसंडीही कायम आहे. काँग्रेस पुन्हा ताकदवान होत आहे. परंतु राष्ट्रवादी काँग्रेस अजित पवार गट, राष्ट्रवादी काँग्रेस शरद पवार गट आणि शिवसेना एकनाथ शिंदे गटाला आणखी करण्यासारखे बरेच आहे. पक्षांतर्गत कलह बाजूला ठेवत दादांच्या नेत्यांनी पक्ष संघटनावर लक्ष दिले असते तर आज अकोल्यात दादांच्या पक्षाला खराखुरा ‘गुलाबी’ काळ बघायला मिळाला असता, अशी प्रतिक्रिया कार्यकर्त्यांमध्ये व्यक्त होत आहे.
