महाराष्ट्राच्या राजकीय वर्तुळात गेल्या अनेक दिवसांपासून शेतकरी कर्जमाफीचा मुद्दा चर्चेत आहे. परंतु दिवाळी तोंडावर आली असताना शेतकऱ्यांना अद्याप कर्जमाफी मिळालेली नाही, त्यामुळे शेतकऱ्यांचा संताप वाढत आहे.
सध्या दिवाळीच्या सणाची चाहूल लागली आहे. सर्वत्र फटाक्यांच्या आवाजाने आसमान दुमदुमले आहे. मिठाईचा गोड सुगंध सावत्र दरवरळतो आहे. पण महाराष्ट्रातील शेतकरी मात्र या उत्सवापासून कोसो दूर आहे. त्यांच्या डोळ्यात आनंदाच्या ऐवजी अश्रू दिसत आहे. गेल्या काही महिन्यांपासून शेतकऱ्यांना कर्जमाफीच्या प्रतीक्षेत ताटकळत ठेवले आहे. अतिवृष्टीने त्यांच्या शेतातील पिके उद्ध्वस्त केली, आर्थिक संकटाने त्यांना हतबल केले. आत्महत्येच्या घटना वाढल्या, तरी महायुती सरकारच्या कानावर या हंबरड्याचा आवाज पोहोचला नाही. यंदाची दिवाळी शेतकऱ्यांसाठी खरोखरच काळी ठरली आहे.
महाविकास आघाडीतील पक्षांनी या अन्यायाविरोधात आवाज उठवला आहे. काही दिवसांपूर्वी उद्धव शिवसेना उद्धव ठाकरे गटाने शेतकऱ्यांसाठी हंबरडा मोर्चा काढला होता. आता राष्ट्रवादी काँग्रेस शरदचंद्र पवार गटाने ऐन दिवाळीच्या तोंडावर काळी दिवाळी मोर्चाचे आयोजन करून सरकारला जाब विचारला आहे. राज्यभरात हे आंदोलन पसरले आहे. शेतकऱ्यांच्या हातात काळे बॅनर, डोक्यावर अतिवृष्टीत खराब झालेल्या गव्हाच्या पेंडी आणि मुखावर निषेधाचे घोषवाक्ये. शेतकरी, जो जगाला अन्न देतो, तो स्वतःच्या भाकरीसाठी संघर्ष करतो आहे. सरकारने सातबारा कोरा करू असे आश्वासन दिले, पण कर्जमाफीचा ‘क’ सुद्धा उच्चारला नाही, असा आरोप शरद पवार गटाचे माजी आमदार चरण वाघमारे यांनी लावला आहे.
Devendra Fadnavis : जप्त शस्त्रांच्या मागची पुरवठा साखळी उलगडणार
फसव्या धोरणांचा निषेध
पूर्व विदर्भातील भंडारा जिल्ह्यात हे आंदोलन अधिक तीव्र झाले. राष्ट्रवादीचे माजी आमदार चरण वाघमारे यांच्या नेतृत्वाखाली शेतकऱ्यांनी जिल्हाधिकारी कार्यालयावर धडक दिली. शुक्रवारी, (17 ऑक्टोबर रोजी) हे आंदोलन करण्यात आले. हातात ‘काळी दिवाळी’चे बॅनर, काळे दिवे आणि फलक घेऊन शेतकरी रस्त्यावर उतरले. कर्जमाफी द्या, मदत द्या असे नारे देत त्यांनी सरकारच्या फसव्या धोरणांचा निषेध केला. वाघमारे म्हणाले, सर्वाधिक प्रगत राज्य असा लौकिक असलेल्या महाराष्ट्रात शेतकऱ्यांची थट्टा केली जात आहे. अतिवृष्टीने 68 लाख हेक्टर पिकांचे नुकसान झाले. पण सरकारने हेक्टरी केवळ 18 हजार 500 रुपये मदत जाहीर केली.
एकरी 7 हजार 400 रुपये, गुंठ्याला 185 रुपये ही मदत नव्हे, अपमान आहे. हे आंदोलन फक्त भंडारापुरते नाही, तर राज्यभरात पसरले आहे. प्रत्येक जिल्हाधिकारी कार्यालयाबाहेर असे मोर्चे काढून शेतकऱ्यांच्या व्यथेला वाचा फोडली जात आहे. महायुती सरकार सत्तेच्या मस्तीत धुंद आहे. पण शेतकऱ्यांच्या कुटुंबांचा हंबरडा ऐकायला तयार नाही. दिवाळीची मंगल पहाट अनुभवण्याचे स्वप्न शेतकऱ्यांनी पाहिले होते. पण सरकारने त्यांना काळी दिवाळी आणली. अतिवृष्टीने शेतकऱ्यांना मरणाच्या दारात नेले, तरी मदत तुटपुंजी. शेतकरी आत्महत्या करत आहेत. पण सत्ताधाऱ्यांच्या बहिऱ्या कानांना हा आवाज पोहोचत नाही, अश्या तिखट शब्दांत चरण वाघमारे यांनी निषेध नोंदवला आहे.
