विविध कारणांमुळे अकोल्यातील आरोग्य विभाग नेहमीच चर्चेत राहिला आहे. आता एका प्रकरणात मुख्यमंत्र्यांकडे तक्रार दाखल झाली आहे.
गेल्या अनेक महिन्यांपासून अकोल्यातील आरोग्य विभाग चर्चेच्या फेऱ्यात आहे. वेगवेगळ्या निविदा प्रक्रियेबाबत आरोग्य उपसंचालक डॉ. कमलेश भंडारी वादात सापडले आहेत. डॉ. भंडारी यांची अकोल्यातून बदली करण्यात आली आहे. मात्र आता याप्रकरणी राष्ट्रवादी काँग्रेस शरदचंद्र पवार पार्टी मैदानात उतरली आहे. पक्षाचे प्रदेश प्रवक्ता अॅड. फैजान मिर्झा यांनी याबाबत रामदासपेठ पोलिस ठाण्यात रितसर लेखी तक्रार दाखल केली आहे. आता डॉ. भंडारी यांच्या विरोधात पोलिस गु्न्हा दाखल करणात की उच्च न्यायालयाच्या खंडपीठात वकिली करणारे मिर्झा याप्रकरणी कोर्टात दाद मागत गु्न्हा दाखल करून घेणार, याकडं सर्वांचं लक्ष आहे.
अॅड. मिर्झा यांनी रामदास पेठ पोलिसांकडे दहा पानांची तक्रार दाखल केली आहे. त्यात माहिती अधिकार कायद्यानुसार मिळविलेल्या चौकशी अहवालाची प्रत देखील जोडण्यात आली आहे. अकोल्याच्या जिल्हा महिला रुग्णालयातील निविदेतील भ्रष्टाचाराचे हे प्रकरण आहे. डॉ. भंडारी यांच्या विरोधात खोटा चौकशी अहवाल तयार केल्याचा आरोप डॉ. मिर्झा यांनी तक्रारीत केला आहे. तीन निर्दोष अधिकाऱ्यांना याप्रकरणात निलंबित करण्यात आल्याचा त्यांचा दावा आहे.
तक्रारीत तीन मुद्दे
पोलिसांना दिलेल्या तक्रारीत अॅड. मिर्झा यांनी सर्वोच्च न्यायालयाच्या एका निकालाचा दाखला दिला आहे. त्यात फौजदारी प्रक्रियेच्या संहितेच्या कलम 197 अनुसार पोलिसांना गुन्हा दाखल करण्याची सूचना आहे. तसे न झाल्यास न्यायालय गुन्हा दाखल करून घेऊ शकते, असे स्पष्ट करण्यात आले आहे. अॅड. मिर्झा यांच्यानुसार भ्रष्टाचाराचे हे प्रकरण गंभीर आहे. निविदा काढताना प्रशासकीय मान्यता घेण्यात आली आहे. मात्र चौकशी अहवालात प्रशासकीय मान्यता नसल्याचे नमूद करण्यात आले आहे. चौकशी अहवालात सात अधिकाऱ्यांना दोषी ठरविण्यात आले होते. परंतु त्यापैकी केवळ तीन अधिकाऱ्यांना निलंबित करण्यात आले.
कोणत्याही निविदेत भ्रष्टाचार होण्यासाठी त्याचे बिल निघावे लागते. याप्रकरणातील टेंडरचं बिलच काढण्यात आलेलं नाही. त्यामुळं भ्रष्टाचार कसा होऊ शकतो, असा प्रश्न अॅड. मिर्झा यांनी उपस्थित केला आहे. जिल्हा परिषदेत आरोग्य अधिकाऱ्याचे पद असते. मिर्झा यांनी आरोग्य अधिकारी डॉ. बळीसाम गाढवे यांच्याविरोधातही तक्रारीत उल्लेख केला आहे. डॉ. भंडारी आणि डॉ. गाढवे यांनी सरळसेवा भरती प्रक्रियेत घोळ केला. हा घोळ उघडकीस येऊ नये म्हणून तीन अधिकाऱ्यांना निलंबित करण्यात आल्याचा आरोप, मिर्झा यांच्या तक्रारीत आहे.
आरोग्य विभागाची संपूर्ण चौकशी समिती संशयाच्या भोवऱ्यात आहे. त्यामुळे डॉ. भंडारी यांच्यासह जिल्हा आरोग्य अधिकारी डॉ. बळीराम गाढवे यांच्या विरोधातही गुन्हा नोंदविण्यासाठी मिर्झा यांनी तक्रार दाखल केली आहे. यात जिल्हा परिषद प्रशासकीय अधिकारी सुधाकर इंगळे यांचंही नाव आहे. उपसंचालक कार्यालयाचे सहाय्यक अधीक्षक अनिल डहाके, एम.बी. गहुले यांच्यावरही आरोप आहेत. विभागीय लेखापाल मनोज कडू यांच्यावरही संशय आहे. मिर्झा यांनी 15 नोव्हेंबर 2025 रोजी ही तक्रारी पोलिस ठाण्यात दिली आहे. पोलिसांनी गुन्हा नोंदवून न घेतल्यास फौजदारी प्रक्रिया संहितानुसार न्यायालयात जाण्याची तयारी सध्या मिर्झा करीत आहेत. त्यामुळे आता पोलिस कोणती भूमिका घेतात, याकडं सगळ्यांचं लक्ष आहे.
