अलीकडेच एक चित्रपट चांगलाच गाजला. पुष्पा हे त्याचे नाव. ‘नाम से फ्लावर समझे क्या?’ हा त्यातील संवाद चांगलाच गाजला. असाच प्रत्यय सध्या भंडारा-गोंदिया जिल्ह्यातील अनेकांना येत आहे.
सज्जनांचे रक्षण आणि दुर्जनांचे निर्दालन अशी काही जणांच्या कामाची पद्धत असते. असाच काहीसा प्रत्यय सध्या भंडारा-गोंदिया जिल्ह्यात येत आहे. काही दिवसांपूर्वी जनतेची कामे न ऐकणाऱ्या दोन वरिष्ठ अधिकाऱ्यांची बदली माजी मंत्री आमदार डॉ. परिणय फुके यांनी सरकारला करायला लावली. तत्कालीन जिल्हाधिकारी योगेश कुंभेजकर आणि पोलिस अधीक्षक लोहित मतानी हे ते दोन वरिष्ठ अधिकारी होते. त्यानंतर आता डॉ. फुके भ्रष्ट अधिकाऱ्यांच्या मागे लागले आहेत.
भंडारा आणि पवनी नगर परिषदेत मोठ्या प्रमाणावर भ्रष्टाचार झाल्याची माहिती डॉ. फुके यांना मिळाली होती. यासंदर्भात डॉ. फुके यांनी महसूल मंत्री चंद्रशेखर बावनकुळे यांच्या समक्षच भ्रष्टाचाराचा लेखाजोखा मांडला. पवनी आणि भंडारा नगर परिषदेत कोट्यवधी रुपयांचा भ्रष्टाचार झाल्याची माहिती डॉ. फुके यांनी जाहीरपणे महसूल मंत्र्यांसमक्ष मांडली. डॉ. फुके यांचा शब्द खुद्द मुख्यमंत्री देखील टाळत नाहीत. त्यामुळे महसूल मंत्री त्याच्याकडे दुर्लक्ष करतील, याची शक्यताच नव्हती.
याला म्हणतात वजन
डॉ. परिणय फुके यांनी जाहीर तक्रार केल्यानंतर त्यात तथ्य असेलच हे महसूल मंत्री चंद्रशेखर बावनकुळे यांच्या लक्षात आले. त्यामुळे त्यांनी तातडीने चौकशीचे आदेश दिलेत. आदेश प्राप्त होताच जिल्हाधिकारी सावन कुमार यांनी तातडीने पवनी व भंडाऱ्याच्या मुख्याधिकाऱ्यांवर ‘शो कॉज नोटीस’ बॉम्ब टाकला. नोटीसला उत्तर देण्यासाठीचे ‘काऊंटडाऊन’ आता सुरू झाले आहे. भ्रष्टाचाराचे अनेक ठोस पुरावे डॉ. फुके यांच्याकडे आहेत. त्यामुळे योग्य वेळ आल्यानंतर हे पुरावे देखील समोर येतील यात शंकाच नाही. अशात दोन्ही मुख्याधिकाऱ्यांनी आपापला बचाव करण्यासाठी धडपड सुरू केली आहे.
भंडारा जिल्ह्यातील आपल्या वालीला खुश करण्याच्या नादात दोन मुख्याधिकाऱ्यांनी आपला खिसा भरला. आता अधिकाऱ्यांवर संकट कोसळल्यानंतर मात्र संबंधित वाली गायब झाला आहे. ‘हम आपके है कौन’ अशी भूमिका या वाल्याने घेतली आहे. फायदा असेल तेव्हा अधिकारी आपला. मात्र संकट काळात ‘मी तुम्हाला ओळखत नाही’, अशी भूमिका या साहेबांनी घेतल्याची माहिती आहे. वाल्मिकी सारखा वाटणारा हा व्यक्ती आता वाली झाल्याने दोन मुख्याधिकाऱ्यांच्या नोकरीवर गाज आली आहे. बळी मात्र दोन अधिकाऱ्यांचा जाणार आहे, हे निश्चित झाले आहे. त्यामुळे अधिकाऱ्यांनाही आता यातून बराच मोठा धडा मिळणार आहे.
