अमरावतीच्या राजकारणात वेगळे चित्र निर्माण होणार आहे. राजकारणात एक दाम्पत्य एकमेकांविरोधात मैदानात येण्याचे संकेत आहेत.
पश्चिम विदर्भातील महत्वाचं शहर अमरावती. या शहरात आता एक दाम्पत्य एकमेकांविरोधात मैदानात उतरण्याची चिन्हे आहेत. बडनेऱ्याचे आमदार रवी राणा यांच्यासोबत भाजप युती करण्यास तयार नाही. त्यामुळे अमरावती महापालिका निवडणूक राणांचा पक्ष स्वतंत्रपणे लढणार आहे. त्यामुळे लोकसभा निवडणुकीपूर्वी भाजपात गेलेल्या नवनीत राणा आपल्याच पतीच्या पक्षाविरोधात प्रचार करणार का? असा प्रश्न निर्माण होत आहे.
राज्यात सध्या नगर परिषद, नगर पंचायत निवडणूक सुरू आहे. त्यानंतर जिल्हा परिषद, पंचायत समिती निवडणूक होण्याचे संकेत आहेत. त्यापाठोपाठ महापालिका निवडणूक होईल, असं सांगितलं जात आहे. या निवडणुकीसाठी राणा यांनी आपल्या पक्षासाठी अमरावतीत जागांची मागणी केली होती. मात्र भाजपनं इतक्या मोठ्या प्रमाणात जागा देण्याचा युवा स्वाभिमान पक्षाचा प्रस्ताव मंजूर केला नाही. त्यामुळं अमरावतीत राणा स्वबळावर निवडणूक लढतील. अशात त्यांच्या पत्नी व भाजप नेत्या नवनीत राणांना त्यांच्या विरोधात प्रचार करावा लागू शकतो.
Ravi Rana : प्रहारच्या कार्यकर्त्याकडून मुंडके छाटण्याची धमकी
ताकद दिसणार
कार्यकर्त्यांच्या आग्रहामुळे आमदार रवी राणा यांनी स्थानिक स्वराज्य संस्थांच्या निवडणुका स्वतंत्र लढवण्याचा निर्णय घेतल्याची माहिती आहे. लोकसभा निवडणुकीत युवा स्वाभिमान पक्षाच्या कार्यकर्त्यांनी महायुतीसाठी कार्य केलं. त्यानंतर विधानसभा निवडणुकीत राणांच्या पक्षानं काही ठिकाणी उमेदवार दिले. त्यावरून राणांवर टीका झाली. राणांनी महायुतीचा धर्म पाळला नाही, असा आरोप त्यांच्यावर झाला. त्यामुळं भाजपच्या गटातून अनेकांनी राणांविरोधात बंड पुकारलं. राणा यांचा विधानसभा निवडणुकीत पराभव व्हावा, असा चौफेर प्रयत्न झाला. परंतु विजय राणांचा झाला.
आता महापालिका निवडणुकीत पुन्हा राणा यांनी वेगळा मार्ग अवलंबला आहे. युवा स्वाभिमान पक्षाच्या बैठकीत अमरावतीमध्ये स्वबळावर निवडणूक लढण्याचा निर्णय झाला आहे. अमरावतीच्या राजकारणाचा विचार केला तर येथे मिश्र स्वरूपाचे राजकारण आहे. भाजप, शिवसेना, राष्ट्रवादी काँग्रेस अजित पवार गट येथे सम प्रमाणात बलवान आहे. काँग्रेसचाही जोर आहे. मात्र युवा स्वाभिमान पार्टीची ताकद यापेक्षा थोडी जास्त आहे. अशात राणा यांनी महायुतीला आव्हान दिल्यास राजकीय रंगत बघायला मिळणार आहे. असे असले तरी राणा निवडणूक पश्चात महायुतीसोबतच जातील, असं सांगितलं जात आहे.
विरोध कायम
अमरावती जिल्ह्यात नवनीत राणा आणि रवी राणा यांना जवळपास सर्वांचाच विरोध आहे. बच्चू कडू यांच्यासोबत त्यांचे मतभेद आहेत. आमदार यशोमती ठाकूर यांच्याशीही त्यांचं पटत नाही. आमदार संजय खोडके आणि सुलभा खोडके हे देखील राणांचे शत्रू. माजी खासदार आनंदराव अडसूळ व अभिजित अडसूळ हे देखील राणांचे मित्र नाहीत. भाजपमधूनही राणांना विरोधच आहे. त्यामुळे राणांना महापालिका निवडणुकीत घेरण्याचा प्रयत्न सगळेच करणार आहेत. त्यामुळं अमरावती महापालिकेची निवडणूक यंदा रंगतदार ठरणार आहे.
