भंडारा शहरात निवडणुकीच्या तोंडावर एक अनाकलनीय हालचाल शांत वातावरणात हलकीशी खळबळ निर्माण करून गेली. काही क्षणांतच त्या घटनेने सामाजिक आणि राजकीय वर्तुळात तुफान उठवले.
भंडारा शहरातील नगरपालिका निवडणुकीच्या उंबरठ्यावरच एका विचित्र प्रकाराने राजकीय वातावरण तापवले आहे. परिसरात सुरू असलेल्या प्रचार मोहीमांदरम्यान छत्रपती शिवाजी महाराजांच्या पुतळ्यासमोर एका महिला भाजप उमेदवारांनी केलेल्या कृतीमुळे संतापाची लाट उसळली आहे. महाराष्ट्राच्या सामाजिक-राजकीय भावविश्वात छत्रपती शिवाजी महाराजांचे स्थान सर्वोच्च आहे. स्वाभिमानाचे प्रतिक मानल्या जाणाऱ्या या इतिहासपुरुषांबद्दल जनमानसात असलेला आदर अनन्यसाधारण आहे. अशा स्थितीत पुतळ्याशी छेडछाड करणारा कोणताही प्रयत्न राज्याच्या सांस्कृतिक मूल्यांना धक्का देणारा ठरतो.
प्रचार मोहीम वेग घेत असताना शुक्रवारी परिसरात छत्रपती शिवरायांच्या पुतळ्यासमोर उमेदवार दाखल झाल्या. महाराजांना वंदन करत असताना त्यांनी त्यांच्या गळ्यात पक्षाचा दुपट्टा घालून आणि जिरेटोपवर पक्षीय टोपी ठेवून पुतळ्याला राजकीय प्रतिकांनी सजविले. हा प्रसंग समोर येताच समाज माध्यमांवर प्रचंड प्रतिक्रिया उमटू लागल्या. शिवभक्तांनी या कृतीला ‘अवमानकारक’ ठरवत संताप व्यक्त केला आहे.
Bhandara : नानांचा निर्णय ठरणार योग्य!! काँग्रेसला विजयश्री शक्य
काँग्रेसचा निषेध
घडलेल्या या प्रकारावर काँग्रेसने कठोर शब्दांत टीका नोंदवली आहे. पक्षाचे जिल्हाध्यक्ष मोहन पंचभाई यांनी ही घटना “अक्षम्य” असल्याचे सांगून भाजप नेत्यांकडून इतिहासपुरुषांविषयी वारंवार अनादर होत असल्याचा आरोप केला आहे. माजी राज्यपालांचे वादग्रस्त विधान, तसेच पूर्वी झालेले अन्य प्रसंग यांची उदाहरणे देत भाजपकडून इतिहासाचे राजकीय उपयोगीकरण वाढत चालल्याचा सूर काँग्रेसकडून लावण्यात आला आहे.
शिवप्रेमी संघटनांनीही या कृतीमुळे धार्मिक आणि ऐतिहासिक अस्मितेला धक्का लागल्याचे नमूद करत तात्काळ माफीची मागणी केली आहे. महाराजांच्या प्रतिमेचा कोणत्याही प्रकारे राजकीय वापर होऊ नये, अशी भावना त्यांनी स्पष्टपणे मांडली आहे.
राजकीय वाद
घटनेनंतर निवडणूक आयोगाकडे तक्रारी दाखल झाल्या आहेत. आचार संहितेचा भंग झाल्याच्या आरोपांमुळे प्रशासकीय हालचाली सुरू झाल्या आहेत. ओबीसी क्रांती मोर्चाचे संस्थापक अध्यक्ष संजय मते यांनीही या कृत्याचा तीव्र निषेध नोंदवून निवडणूक विभागाने तातडीने कारवाई करावी, अशी मागणी केली आहे.
नगरपालिका निवडणुकीच्या तोंडावर उभा राहिलेला हा वाद आता राजकीय स्वरूप धारण करत आहे. भंडारा शहरात वातावरण चांगलेच तापले आहे. राजकीय लाभासाठी प्रतीकांचा वापर ज्या पातळीवर पोहोचला आहे. त्यातून जनमानसातील नाराजी ठळकपणे समोर आली आहे. आगामी निवडणुकीवरील त्याचे परिणामही लक्षवेधी ठरणार आहेत.
