भंडाऱ्यातील एका पक्षातून दुसऱ्या पक्षात आलेल्या विभीषणाने नेत्याची पोलखोल सुरू केली आहे. त्यामुळे आता एका नगरपरिषदेतील मोठा भ्रष्टाचार समोर आला आहे.
भंडारा जिल्ह्यातील एका नगर परिषदेत झालेला भ्रष्टाचार सध्या चांगला चर्चेत आहे. एका नेत्याच्या नातेवाईकाला नगरपरिषदेतील प्रमुखाने प्रचंड कंत्राट मिळवून दिले. या कंत्राटातून झालेल्या कमाईचा 30 टक्के नैवेद्य संबंधित अधिकाऱ्याने नेत्यापर्यंत पोहोचवला. परंतु हे सगळं ज्याच्या समोर घडले त्या विभीषणाला नेत्यांनी दुखावले. त्यामुळे विभीषण आपल्या हातात असलेला धनुष्यबाण खाली ठेवून रामाच्या सैन्यात सहभागी झाला. आता या विभीषणाने संबंधित नेत्याची पोलखोल करणे सुरू केले आहे.
विभीषणाने केलेल्या पोलखोलीनंतर या नगर परिषदेतील भ्रष्टाचार मंत्रालयापर्यंत पोहोचला. या भ्रष्टाचाराची चौकशी करण्यासाठी पालकमंत्र्यांनी जिल्हाधिकाऱ्यांना आदेश दिले. चौकशीमध्ये अनेक धक्कादायक गोष्टी उघडकीस आल्या आहेत. दिवाळी स्नेह मिलनाच्या कार्यक्रमांमध्ये भाजप नेते माजी मंत्री आमदार डॉ. परिणय फुके या भ्रष्टाचाराच्या फटाक्याची वात पेटवली. भ्रष्टाचाराची चौकशी आता जवळपास पूर्ण झाली आहे. केव्हाही फटाका फुटेल आणि भंडारा जिल्ह्यातील नगर परिषदेत कार्यरत असलेला एक प्रमुख घरी पाठवला जाईल, असे चित्र तयार झाले आहे.
दुसराही बळी
भ्रष्टाचाराची चौकशी करत असताना सध्या कार्यरत असलेल्या अधिकाऱ्याचा सहभाग आढळला आहे. इतकेच नव्हे तर त्याच्या आधी कार्यरत असलेल्या अधिकाऱ्याचे नाव देखील चौकशीत पुढे आले आहे. त्यामुळे एकाच वेळी दोन अधिकाऱ्यांच्या बळी जाऊ शकतो, अशा पद्धतीने कागद काळे करण्याचे काम सध्या सुरू आहे. दिवाळी आता जवळपास संपली आहे. शासकीय कामकाज सुरळीतपणे सुरू झाल्यानंतर या दोन अधिकाऱ्यांवर केव्हाही कारवाईची कुऱ्हाड कोसळेल.
राजकारणात कार्यरत असलेल्या दोन व्यक्तींच्या वादामुळे भंडारा जिल्ह्यातील एका नगर परिषदेत कार्यरत असलेले हे दोन अधिकारी चांगलेच अडचणीत सापडणार आहेत. खरंतर हे संपूर्ण प्रकरण विभीषण दुखावल्यामुळे सुरू झाले आहे. या विभीषणाला संबंधित नेत्याने अपमानित करून बाहेर पडण्यास भाग पाडले. मात्र आपल्या अपमानाचा हिशोब चुकता करण्याचा निर्धार विभीषणाने केला. रामाच्या पार्टीत येताच विभीषणाने एकेक करीत संबंधित नेत्याचे ‘भांडे’ फोडणे सुरू केले. आता एकेक करीत अशी किती प्रकरणे हा विभीषण समोर आणतो याची चर्चा सध्या भंडारा जिल्ह्यात सुरू आहे.
विभीषणाला दूर करायचे होते तर शांतपणे दूर करता आले असते. परंतु नेहमीच वर कॉन्फिडन्स मध्ये असलेल्या या नेत्याने अपमान करण्याचा मार्ग निवडला, असा आरोप आता विभीषणाकडून केला जात आहे. त्यामुळे जोपर्यंत पूर्ण लंका दहन होत नाही तोपर्यंत विभीषण शांत बसेल असे सध्या तरी दिसत नाही.
