विकासाच्या घोषणांच्या जल्लोषात अकोल्यात एक वेगळीच खदखद साठलेली होती. मुख्यमंत्री देवेंद्र फडणवीस यांच्या दौऱ्यानंतर प्रहारच्या कार्यकर्त्यांनी पोलिसांची साखळी तोडत काळे झेंडे फडफडवत रोष फोडला.
अंधारात चुकवलेले सावलीचे बाण अखेर लक्ष्य गाठतात, तसंच काहीसं प्रहार जनशक्ती पक्षाच्या कार्यकर्त्यांनी करून दाखवलं. पोलिसांच्या बंदोबस्तात गडगडाटी बंदोबस्ताची कवचकुंडलं फोडत त्यांनी मुख्यमंत्री देवेंद्र फडणवीस यांच्या अकोला दौऱ्यानंतर काळे झेंडे फडफडवत राज्यव्यवस्थेला थेट संदेश दिला की, शेतकऱ्यांच्या वेदना दडपता येणार नाहीत.
11 जूनचा दिवस, अकोल्याच्या राजकारणात ‘विकासाचा उत्सव’ आणि ‘लोकशाहीचा आक्रोश’ हे दोन्ही विरोधाभास एकाच रंगमंचावर झळकले. मुख्यमंत्री देवेंद्र फडणवीस यांनी कोट्यवधी रुपयांच्या विकास प्रकल्पांचं भूमिपूजन आणि लोकार्पण करताना जबरदस्त सभा घेतली. मंचावरून विकासाची आश्वासने दिली. आकडेवारीच्या फुलबाज्या उडवल्या, पण दुसऱ्याच बाजूला आम जनतेच्या व्यथा पेटून उठल्या होत्या. ज्याला आवाज देत होते बच्चू कडू आणि त्यांचे प्रहार सैनिक.
धगधगता विरोध
बच्चू कडू सध्या अमरावतीत शेतकऱ्यांच्या कर्जमाफीसाठी अन्नत्याग आंदोलन करत आहेत. त्यांच्या प्रकृतीतही घसरण झाल्याची माहिती असून, तरीही त्यांनी उपोषण थांबवलेले नाही. त्यांच्या या धगधगत्या आंदोलनाच्या पार्श्वभूमीवर राज्यभर प्रहारच्या कार्यकर्त्यांनी जागोजागी रोष व्यक्त करत आंदोलन छेडले. अकोल्यात तर याचा उद्रेकच झाला.
मुख्यमंत्र्यांच्या दौऱ्याच्या पूर्वसंध्येला, पोलिसांनी शंका येऊ नये इतक्या नियोजनात प्रहार पक्षाचे प्रमुख पदाधिकारी, कार्यकर्ते यांना सकाळपासूनच ताब्यात घेऊन विविध पोलीस ठाण्यांमध्ये स्थानबद्ध केलं. आंदोलनेच होऊ नयेत, सभेत गोंधळ निर्माण होऊ नये, यासाठी सगळीकडून खबरदारी घेण्यात आली. पण प्रहारचे कार्यकर्ते झोपी गेले नव्हते, ते डावपेच आखत होते.
शेतकऱ्यांचा आवाज
सभेची समारोप घंटा वाजली, मुख्यमंत्री फडणवीस यांचा ताफा विमानतळाच्या दिशेने निघाला आणि त्या क्षणीच, पोलिसांच्या डोळ्यांत धूळ फेकत, प्रहारच्या काही कार्यकर्त्यांनी अचानक मार्गातच काळे झेंडे फडफडवत निषेध केला. शेतकऱ्यांचा आवाज दडपू नका, प्रहार झुंजार आहे, झुकणार नाही, अशा घोषणांनी अवघं परिसर ढवळून निघाल. या अचानक निषेधामुळे पोलिसांचीही धावपळ उडाली, आणि काही क्षणांसाठी मुख्यमंत्री ताफ्याभोवती गोंधळाचं वातावरण निर्माण झालं. पोलिसांनी तत्काळ आंदोलक कार्यकर्त्यांना ताब्यात घेतलं, पण प्रहार कार्यकर्त्यांनी जो ‘इम्पॅक्ट’ दिला, तो सरकारच्या शांतपणाच्या मुखवट्यावर जोरात बसला.
संविधानिक हाक
स्थानबद्ध करण्यात आलेल्या कार्यकर्त्यांनी तीव्र शब्दात राज्य सरकारवर टीका केली. “लोकशाहीत सरकारविरोधात आंदोलन करण्याचा, प्रश्न मांडण्याचा अधिकार आहे. पण इथे विरोध म्हणजे गुन्हा मानला जातो, आवाज दाबला जातो. हा तर हुकूमशाहीचा नमुना आहे, असा संतप्त रोष त्यांनी व्यक्त केला. हे आंदोलन केवळ फडणवीस यांच्या दौऱ्यापुरतं मर्यादित नव्हतं. हे होतं शेतकऱ्यांच्या आत्म्याचं आक्रंदन. बच्चू कडू यांचं अमरावतीत चाललेलं अन्नत्याग आंदोलन आणि त्यांच्यावर आलेली प्रकृतीची मरगळ ही आजही सरकारच्या संवेदनशीलतेची कसोटी आहे.
अकोल्यात उभं राहिलं होतं एक दुहेरी चित्र. एका बाजूला भूमिपूजन आणि सरकारी नारे, तर दुसरीकडे उपोषण, काळे झेंडे आणि रोष. समाजाच्या या विरोधाभासांना समेटाची गरज आहे, अन्यथा हे आंदोलन उद्या महाराष्ट्रभर ज्वाळा बनून उठेल. प्रहारच्या कार्यकर्त्यांनी दाखवून दिलं, ‘दडपशाही कितीही असो, आवाज फुटतोच’. आज त्यांनी फक्त काळे झेंडे दाखवले, उद्या हे झेंडे जनआक्रोशाचं वादळ होऊन उभे राहू शकतात.
