आरोग्य मंत्री प्रकाश आबिटकर यांनी अकोल्यातून ठाम संदेश दिला की, मराठा समाजाला न्याय देताना ओबीसी समाजावर अन्याय होणार नाही. याचवेळी त्यांनी आरोग्य क्षेत्रात 5 हजार नव्या पदनिर्मितीची घोषणा करून आरोग्य यंत्रणेला बळकट करण्याचा संकल्प व्यक्त केला.
महाराष्ट्राच्या आरोग्य मंत्र्यांनी मराठा समाजाला आरक्षणाच्या माध्यमातून न्याय देताना ओबीसी समाजावर कोणताही अन्याय होणार नाही, असा ठाम विश्वास व्यक्त केला आहे. आरोग्य मंत्री प्रकाश आबिटकर यांनी अकोला येथे शिवसेनेच्या संघटनात्मक आढाव्यासाठी भेट देताना हा दावा केला. याचवेळी, त्यांनी आरोग्य क्षेत्रात 5 हजार नव्या पदनिर्मितीची घोषणा करत राज्यातील आरोग्य यंत्रणेला बळकटी देण्याचे संकल्प व्यक्त केले. मराठा समाजाला कुणबी दाखले प्रदान करण्यास विरोध नसल्याचे सांगताना, सर्वसमावेशक विकासासाठी महायुती सरकार कटिबद्ध असल्याचे त्यांनी स्पष्ट केले.
आबिटकर यांनी माध्यमांशी संवाद साधताना महायुती सरकारच्या सर्वसमावेशक धोरणांचा पुनरुच्चार केला. मराठा समाजाला न्याय देताना ओबीसी समाजाच्या हक्कांवर गदा येणार नाही, याची खबरदारी सरकार घेत असल्याचे त्यांनी स्पष्ट केले. मुख्यमंत्री आणि उपमुख्यमंत्र्यांनी यापूर्वीही ही भूमिका मांडल्याचे सांगत त्यांनी सरकारच्या ठोस पावलांचा उल्लेख केला. याशिवाय, शिवसेनेच्या संघटनात्मक बांधणीला गती देण्याचे आणि स्थानिक स्वराज्य संस्थांच्या निवडणूक पूर्ण ताकदीने लढण्याचे उद्दिष्ट त्यांनी जाहीर केले.
Congress : राहुल गांधींच्या परदेश दौऱ्यांवर सीआरपीएफची लाल निशाणी
आरोग्य यंत्रणेला दिशा
आबिटकर यांनी अकोला येथील जिल्हाधिकारी कार्यालयात आरोग्य यंत्रणेची आढावा बैठक घेतली. यावेळी त्यांनी ग्रामीण आरोग्य यंत्रणेला सक्षम करण्याचे आणि गरजू रुग्णांना स्थानिक पातळीवर उपचार उपलब्ध करून देण्याचे निर्देश दिले. जिल्ह्यातील रुग्णालयांसाठी आवश्यक पदे तातडीने निर्माण करण्याची प्रक्रिया पूर्ण होईल, तसेच निधीची कमतरता भासू देणार नाही, असे आश्वासन त्यांनी दिले. आयुष्मान भारत योजनेसारख्या योजनांचा लाभ सामान्यांपर्यंत पोहोचवण्यासाठी प्राथमिक आरोग्य केंद्रांना बळकट करण्याचे आदेशही त्यांनी दिले.
Bacchu Kadu : ओबीसी समिती तात्काळ, शेतकऱ्यांची कर्जमाफी मात्र लांब
जिल्ह्यात ट्रॉमा केअर सेंटरच्या अभावावर आबिटकर यांनी लक्ष वेधले. यासंदर्भातील प्रस्ताव त्वरित सादर करण्याचे निर्देश दिले. या प्रकल्पाला पूर्ण सहकार्य करण्याचे त्यांनी जाहीर केले. याशिवाय, भारत-पाकिस्तान सामन्याच्या संदर्भात शिवसेनेची अतिरेक्यांविरुद्ध आक्रमक भूमिका कायम असल्याचे त्यांनी ठासून सांगितले. पंतप्रधान नरेंद्र मोदी यांच्या नेतृत्वाखालील अतिरेक्यांविरुद्धच्या कठोर कारवाईचे समर्थन करताना, शिवसेनेची सुरुवातीपासूनची स्पष्ट भूमिका त्यांनी मांडली. आगामी महिन्यात आरोग्य क्षेत्रातील 5 हजार पदनिर्मितीची प्रक्रिया पूर्ण होईल, असे सांगत आबिटकर यांनी राज्याच्या आरोग्य यंत्रणेला नवसंजन देण्याचा निर्धार व्यक्त केला.
