मतदान संपल्यानंतर पडलेली लाखो मते आणि निवडणूक आयोगाकडे त्याचा रेकॉर्डच नसल्याचा स्फोटक आरोप प्रकाश आंबेडकरांनी केला आहे. या निवडणूक घोटाळ्याच्या लढाईसाठी सर्व विरोधी पक्षांनी कोर्टात उतरावे, अशी त्यांची घणाघाती मागणी आहे.
काँग्रेस नेते राहुल गांधी यांनी निवडणूक प्रक्रियेवरून भाजपवर अनेक आरोप केले. गांधी यांनी पत्रकार परिषद घेऊन मतदार यादीत निवडणूक आयोगाने आणि भाजपने मिळून घोटाळा केले असल्याचे गांधी यांनी सांगितले. त्यानंतर संपूर्ण देशभरात खळबळ उडाली. आता वंचित बहुजन आघाडीचे प्रमुख प्रकाश आंबेडकर यांनीही आक्रमक भूमिका घेतली आहे. मुंबईतून दिल्लीपर्यंत राजकीय तापमान पेटवणारा सवाल त्यांनी उपस्थित केला. मतदान संपल्यानंतर 76 लाख मते पडली, ती टाकली कुणी? निवडणूक आयोगाकडे याचा रेकॉर्डच नाही, मग हे निवडणूक की तमाशा?असा थेट, धारदार आणि घणाघाती प्रश्न आंबेडकर यांनी उपस्थित करत भाजपवर झंझावाती हल्ला चढवला आहे.
आंबेडकर म्हणाले, जर निवडणूक खरोखरच स्वतंत्र, निष्पक्ष आणि पारदर्शक करायच्या असतील, तर सर्व विरोधी पक्षांनी एकत्र यायला हवं. फक्त रस्त्यावर मोर्चे काढून न्याय मिळत नाही, खरी लढाई न्यायालयातच जिंकता येते. मी 2004 पासून हेच करत आहे, रस्त्यावरही आणि कोर्टातही. 17 मार्च 2024 रोजी मुंबईत भारत जोडो यात्रेच्या सभेत मल्लिकार्जुन खडगे, राहुल गांधी, तसेच इतर विरोधी पक्षांच्या नेत्यांच्या उपस्थितीत आंबेडकर यांनी सर्वांना एकजुटीचे आवाहन केले होते. परंतु, महाराष्ट्र विधानसभा निवडणुकीतील धक्कादायक प्रकाराने परिस्थिती अजूनच गंभीर केली.
कोणाचाच प्रतिसाद नाही
प्रकाश आंबेडकरांचा स्फोटक खुलासा: संध्याकाळी 6 नंतर 76 लाख मते पडली. निवडणूक आयोगाकडे याचा डेटा नाही. मग हा सरळसरळ निवडणुकीतला घोटाळा नाही का? आम्ही या संदर्भात 16 जानेवारीला काँग्रेससह 21 पक्षांना पत्र लिहून कोर्ट लढाईत सहभागी होण्याचे आमंत्रण दिले. पण एकानेही प्रतिसाद दिला नाही. त्यामुळे चेतन अहिरेमार्फत आम्ही थेट बॉम्बे हायकोर्टात याचिका दाखल केली, सर्व पुरावे दिले. मात्र 4 महिन्यांनंतर ती तुच्छ कारणावरून फेटाळली गेली. आता आम्ही सुप्रीम कोर्टात गेलो आहोत, असा आंबेडकरांचा घणाघाती आरोप.
आंबेडकर पुढे म्हणाले, जर विरोधी पक्ष खरोखरच हा सवाल उपस्थित करायला तयार असतील, तर त्यांना सुप्रीम कोर्टातील आमच्या याचिकेत पक्षकार व्हावे लागेल. अन्यथा निवडणूक आयोगाला सरळ कोर्टातून सवाल विचारता येणार नाही. फक्त आंदोलन करून लोकांची दिशाभूल होईल, पण न्याय मिळणार नाही. निवडणूक प्रक्रियेतला हा काळाकुट्ट डाग कोर्टाशिवाय धुवता येणार नाही.
कोर्टापर्यंत देऊ लढा
वंचित बहुजन आघाडीचा हा भडका केवळ भाजपपुरता मर्यादित नाही, तर त्यांनी काँग्रेसलाही कानपिचक्या दिल्या. लोकशाहीचा गळा घोटणाऱ्या या प्रक्रियेला आव्हान द्यायचे असेल, तर रस्त्यापासून कोर्टापर्यंत लढा द्यावा लागेल. मी ही लढाई सतत लढतोय, पण तुमच्या मौनामुळे सत्य गाडले जातेय, अशी टीका त्यांनी करत राजकीय वर्तुळात खळबळ उडवली आहे.
