नागपुरात होणाऱ्या विधिमंडळाच्या हिवाळी अधिवेशनात यंदा बरेच बदल दिसणार आहेत. यंदा प्रथमच विधिमंडळाचे छत लिकेज प्रुफ करण्यात आलं आहे.
राज्य विधिमंडळाचं हिवाळी अधिवेशन नागपुरात एखाद्या राजकीय महोत्सवापेक्षा कमी नसतं. वर्षातून एकदा होणाऱ्या या अधिवेशनाकडं राज्यभरातील लोकांचं लक्ष असतं. विदर्भातील प्रश्न सोडविण्यासाठी खरं तर हे अधिवेशन नागपुरात घेतलं जातं. परंतु खरंच या अधिवेशनातून विदर्भाचे प्रश्न सुटतात का, हा मुद्दा वादाचा आणि चर्चेचा ठरू शकतो. यंदाच्या हिवाळी अधिवेशनासाठी नागपुरातील तयारी अंतिम टप्प्यात आहे. विधिमंडळाच्या छताला यंदा खास पद्धतीचा रंग चढविण्यात येत आहे. रंगाचा हा मुलामा ‘लिकेज प्रुफ’ असल्याचं सांगण्यात येत आहे. सध्या राज्यात नगर परिषद आणि नगर पंचायतीची निवडणूक होत आहे. आचारसंहिता लागू आहे. त्यामुळं प्रशासकीय यंत्रणा नियमांच्या अधीन राहात काम करताना दिसत आहे.
हिवाळी अधिवेशनासाठी विविध विभागांकडे तयारीची जबाबदारी सोपविण्यात आली आहे. आता विधानमंडळ सचिवालयाचे कामाकज सुरू होण्याची प्रतिक्षा आहे. 28 नोव्हेंबरपासून नागपूर येथे हे कामकाज सुरू होत आहे. अधिकाऱ्यांसाठी निवास व कार्यालयाची व्यवस्था त्या दृष्टीने केली जात आहे. विधान मंडळाचे सचिव डॉ. विलास आठवले हे या कामांवर लक्ष ठेऊन आहेत. त्यांनी अधिवेशनाच्या अनुषंगाने वेगवेगळ्या विभागातील अधिकाऱ्यांची बैठकही घेतली. आठवले यांच्यासह शिवदर्शन साठ्ये यावेळी उपस्थित होते.
ऑक्टोबरपासून लगबग
हिवाळी अधिवेशनाच्या तयारीची लगबग ऑक्टोबर महिन्यापासून सुरू आहे. विभागीय आयुक्त विजयलक्ष्मी बिदरी आणि नागपूरचे जिल्हाधिकारी डॉ. विपिन इटनकर हे या सर्व कामांवर लक्ष ठेऊन आहेत. अधिवेशनासाठी नेहमीप्रमाणे राज्यरातून अधिकारी आणि पोलिसांचा फौजफाटा नागपुरात मुक्कामी येणार आहे. 28 नोव्हेंबरपासून कामकाज सुरू झाल्यानंतर 13 कक्ष अधिकारी नागपुरात मुक्कामी असतील. आमदारांनी उपस्थित केलेल्या तारांकित प्रश्नांना उत्तरं देण्यासाठी संबंधित विभागांकडून माहिती मागविण्यात येते. ही उत्तरं मागविण्यासाठी विभागनिहाय वेळापत्रक देखील तयार करण्यात आलं आहे.
सचिव दर्जाच्या अधिकाऱ्यांपैकी जितेंद्र भोळे, मेघना तळेकर, डॉ. विलास आठवले, शिवदर्शन साठ्ये हे 8 डिसेंबरपासून पूर्णवेळ नागपुरात राहणार आहेत. त्यांच्या सोबतीला तीन सहसचिव असतील. चार उपसचिवांनाही मदतीसाठी नागपुरात पाठविण्यात येणार आहे. विधिमंडळ परिसराच्या सुरक्षेची जबाबदारी मुख्य सुरक्षा अधिकारी राजू भुजबळ यांच्यावर सोपविण्यात आली आहे. सात अवर सचिवांनाही नागपुरात जाण्याचे आदेश देण्यात आले आहेत. आठ डिसेंबर पासून अधिवेशन सुरू होणार आहे. तोपर्यंत नगर पंचायत निवडणुकीचा निकाल जाहीर होईल. आचारसंहिता संपलेली असेल. त्यामुळे विधिमंडळाचे राजकीय कामकाज जोमात होणार आहे.
