रायबरेली दौऱ्यात काँग्रेस नेते राहुल गांधींनी भाजप आणि आरएसएसवर जोरदार हल्ला चढवला. निवडणूक आयोगावर हुकूमशाहीचा आरोप करत त्यांनी ओबीसी, दलित आणि आदिवासींच्या हक्कांसाठी ठाम भूमिका मांडली.
रायबरेलीच्या प्रजापती समाज अधिवेशनात काँग्रेस नेते राहुल गांधी यांनी भारतीय जनता पक्ष (भाजप) आणि राष्ट्रीय स्वयंसेवक संघ (आरएसएस) यांच्यावर जोरदार हल्ला चढवला. देशातील 90 टक्के लोकसंख्या असलेल्या ओबीसी, दलित आणि आदिवासी समुदायांना प्रगतीपासून रोखण्याचा प्रयत्न भाजप-आरएसएसकडून होत असल्याचा आरोप त्यांनी केला. पंतप्रधान नरेंद्र मोदी स्वतः ओबीसी असूनही जातीय जनगणनेवर मौन बाळगतात, असा टोला त्यांनी लगावला. संसदेत विचारलेल्या प्रश्नाला दीड तासांच्या भाषणातही या विषयावर एकही शब्द न बोलल्याची खंत त्यांनी व्यक्त केली. राहुल यांच्या या टीकेने राजकीय वातावरण तापले आहे.
बुधवारी दिल्लीहून रायबरेलीला रवाना झालेल्या राहुल गांधींच्या ताफ्याला वाटेत निदर्शनांचा सामना करावा लागला. योगी सरकारचे मंत्री दिनेश प्रताप सिंह यांनी समर्थकांसह रस्त्यावर धरणे आंदोलन करत राहुल यांच्या ताफ्याला अडवले. पंतप्रधानांना शिवीगाळ केल्याचा आरोप करत त्यांनी ‘राहुल परत जा’ अशा घोषणा दिल्या. यामुळे राहुल यांचा ताफा सुमारे एक किलोमीटर आधी थांबला. पोलिसांनी मंत्र्यांना ताब्यात घेताच भाजप कार्यकर्त्यांशी झटापट झाली, तरी ताफा पाच मिनिटांत पुढे सरकला. विशेष म्हणजे, दिनेश प्रताप सिंह हे राहुल यांच्याविरुद्ध लोकसभा निवडणूक लढले होते.
Sri Sri Ravishankar : नेपाळ उठावामागे आंतरराष्ट्रीय षडयंत्राचा संशय
निवडणूक आयोगावर ठपका
राहुल गांधी बतोही रिसॉर्ट येथे कार्यकर्त्यांना संबोधित करताना म्हणाले की, निवडणूक प्रक्रियेत गडबड असल्याचे पुरावे आता समोर येत आहेत. मते चोरीला जाण्याच्या प्रकारांना आळा घालण्याची गरज त्यांनी स्पष्ट केली. निवडणूक आयोग हुकूमशाही पद्धतीने वागत असल्याचा गंभीर आरोप त्यांनी केला. त्यांच्या या वक्तव्यमुळे राजकीय चर्चांना उधाण आले आहे.
राहुल यांच्या रायबरेली भेटीच्या पार्श्वभूमीवर समाजवादी पक्षाच्या लोहिया वाहिनीचे राज्य सचिव राहुल निर्मल बागी यांनी लावलेले एक पोस्टर चांगलेच चर्चेत आहे. या पोस्टरमध्ये राहुल गांधी, अखिलेश यादव आणि तेजस्वी यादव यांना अनुक्रमे ब्रह्मा, विष्णू आणि महेश म्हणून संबोधले आहे. बागी यांनी या तिन्ही नेत्यांना दलित आणि वंचितांचा आवाज म्हणून त्रिदेवांचा अवतार संबोधले. यावर भाजप प्रवक्ते आनंद दुबे यांनी खोचक टीका करत या नेत्यांना निवडणुकीपुरते रंग बदलणारे राजकारणी ठरवले. राहुल यांचा हा सहावा रायबरेली दौरा असून, 10 आणि 11 सप्टेंबर रोजी ते येथे विविध कार्यक्रमांना उपस्थित राहणार आहेत.
