महाराष्ट्रात सध्या सांस्कृतिक सण रंगत घेत आहेत. लवकरच राज्यभर गणपती बाप्पांचे आगमन होणार आहे. या पार्श्वभूमीवर नागपूर पोलिसांनी नवीन मोहीम हाती घेत, नागरिकांच्या सुरक्षिततेसाठी पक्की तयारी केली आहे.
नागपूर शहरात सणासुदीचा रंग चढला आहे. गणेशोत्सवाच्या आगमनाची चाहूल लागली असताना, बाप्पाच्या स्वागतासाठी सज्ज झालेल्या या शहरात उत्साह आणि भक्तीचा माहोल आहे. पण या उत्सवी रंगातही शहराची शांतता आणि सुव्यवस्था अबाधित राहावी, यासाठी नागपूर पोलिसांनी एक अनोखा प्रयोग हाती घेतला आहे. सणासुदीच्या रंगात रंगलेल्या शहरात आता फक्त उत्सव नाही, तर कायदा आणि सुव्यवस्थेची ताकदही अनुभवायला मिळणार आहे. शहराचे पोलीस आयुक्त डॉ. रवींद्रकुमार सिंगल यांच्या नेतृत्वाखाली ‘ऑपरेशन ऑल आउट’ ही मोहीम राबवली जात आहे. जी गुन्हेगारीला चाप लावण्यासाठी एक नवा अध्याय रचत आहे. सणासुदीच्या या काळात कोणताही अनुचित प्रकार घडू नये, यासाठी पोलिसांनी कंबर कसली आहे.
काही महिन्यांपूर्वी नागपूरने एका धार्मिक वादामुळे अभूतपूर्व दंगल अनुभवली. तीनशे वर्षांच्या इतिहासात प्रथमच शहरात अशी परिस्थिती निर्माण झाली होती. ज्याने सर्वत्र खळबळ उडाली. या घटनेने पोलिसांना सतर्क केले आहे. आता गणेशोत्सव आणि त्यानंतर येणाऱ्या सणांच्या पार्श्वभूमीवर पुन्हा असा प्रकार घडू नये, यासाठी पोलिसांनी कठोर पावले उचलली आहेत. या मोहिमेच्या माध्यमातून शहरात कायदा आणि सुव्यवस्था कायम ठेवण्याचा निर्धार पोलिसांनी केला आहे. काही दिवसांपूर्वी ऑपरेशन ऑल आउट अंतर्गत तब्बल 188 जणांवर कारवाई करण्यात आली. तर 658 गुन्हेगारांच्या रेकॉर्डची तपासणी करून 375 जणांचा रेकॉर्ड अद्ययावत करण्यात आला. सणासुदीच्या काळात गुन्हेगारीला आळा घालणे हे पोलिसांसमोर मोठे आव्हान असते.
Political Drama : अरेच्चा! उपराष्ट्रपतीपदाच्या निवडणुकीतही घोळ
नागपूरकरांसाठी सुरक्षित वातावरण
जुगार, अवैध दारू विक्री, शस्त्र बाळगणे आणि अंमली पदार्थांची तस्करी यासारखे गुन्हे या काळात वाढतात. यावर नियंत्रण ठेवण्यासाठी डॉ. सिंगल यांच्या मार्गदर्शनाखाली सहपोलीस आयुक्त नवीनचंद्र रेड्डी, अतिरिक्त आयुक्त वसंत परदेशी, राजेंद्र दाभाडे आणि शिवाजीराव राठोड यांनी एकजुटीने ही मोहीम राबवली. या मोहिमेत पोलिसांनी शहरातील सर्व ठाण्यांच्या हद्दीतून 69 जणांवर महाराष्ट्र दारूबंदी कायद्यांतर्गत, 12 जणांवर भारतीय हत्यार कायद्यांतर्गत आणि १५ जणांवर जुगार कायद्यांतर्गत कारवाई केली. याशिवाय, ड्रंक अँड ड्रायव्हिंगच्या 6 प्रकरणांसह, एकूण 55 प्रतिबंधक कारवाया आणि 7 हद्दपार आरोपींना अटक करण्यात आली. नागपूर शहरातील फरार गुन्हेगार, सराईत चोर, घरफोडी करणारे आणि वाहनचोरी करणाऱ्या 658 गुन्हेगारांच्या घराची झाडाझडती घेण्यात आली.
376 जणांना यापैकी ताब्यात घेऊन त्यांच्यावर कायदेशीर कारवाई करण्यात आली. ही मोहीम केवळ गुन्हेगारांवर कारवाईपुरती मर्यादित नसून, नागपूरकरांना सणासुदीच्या काळात सुरक्षित आणि निर्भय वातावरण देण्याचा पोलिसांचा मानस आहे. ऑपरेशन ऑल आउट ही केवळ एक मोहीम नाही, तर नागपूर पोलिसांचा शहराप्रती असलेला कर्तव्यनिष्ठेचा आणि बांधिलकीचा पुरावा आहे. सणासुदीच्या काळात नागपूरकरांना बाप्पाच्या आगमनाचा आनंद लुटता यावा, यासाठी पोलिसांनी आपली जबाबदारी पार पाडण्याचा विडा उचलला आहे. ही मोहीम पुढील काही दिवसांत आणखी तीव्र होण्याची शक्यता आहे. जेणेकरून शहरात शांतता आणि समृद्धीचा रंग कायम राहील. नागपूर पोलिसांचा हा अनोखा प्रयोग निश्चितच कौतुकास्पद आहे. यामुळे सणासुदीच्या उत्साहात सुरक्षेची हमी मिळाली आहे.
NMC Election : संघ भूमीत बंटी दादांचा डंका पुन्हा वाजणार का?
