शिंदे गटाचे आमदार संजय गायकवाड यांनी उद्धव ठाकरेंच्या बापालाही माझी कॉपी करणे जमणार नाही या वादग्रस्त वक्तव्यावरून स्पष्टीकरण देत यू-टर्न घेतला.
शिवसेना एकनाथ शिंदे गटाचे ‘वादांचे बादशहा’ म्हणून ओळखले जाणारे आमदार संजय गायकवाड पुन्हा एकदा वादाच्या भोवऱ्यात सापडले आहेत. कधी शिवीगाळ, कधी बेधडक वक्तव्यं, तर कधी थेट मारहाणीचे व्हिडीओ, गायकवाड यांच्या राजकीय कारकिर्दीचा इतिहास हा नेहमीच वादाच्या रंगमंचावर रंगलेला आहे. मात्र, यावेळी त्यांनी असे काही बोलून दाखवले की, वादाचा पारा सरळ बापपर्यंत गेला. शिवसेना उद्धव ठाकरे गटाने (UBT) सोमवारी (११ ऑगस्ट रोजी) राज्यभर महायुतीतील भ्रष्ट मंत्र्यांविरोधात प्रतिकात्मक आंदोलन केले. यामध्ये संजय गायकवाड यांच्या विरोधातही आंदोलने झाली.
पत्रकारांनी यावर प्रतिक्रिया विचारताच गायकवाडांनी तडकाफडकी उत्तर देत विरोधकांवर जोरदार हल्ला चढवला. मी ओरिजनल आहे. इतकंच काय तर उद्धव बाळासाहेब ठाकरेंच्या बापालाही माझी कॉपी करणे जमणार नाही. हे वक्तव्य बाहेर आले आणि राजकीय वर्तुळात खळबळ उडाली.वक्तव्यानंतर ठाकरे गटाकडून संतप्त प्रतिक्रिया उमटल्या. आरोप-प्रत्यारोपांची साखळी सुरू झाली. सोशल मीडियावर बाप टिप्पणीची धग वाढत असतानाच गायकवाडांनी अचानक यू-टर्न घेतला आहे. त्यांनी दावा केला की त्यांच्या शब्दाचा विपर्यास करण्यात आला आहे. उभाठाच्या कार्यकर्त्याच्या बापाची अवकात नाही, असे म्हटले होते. पण तुम्ही थेट बाळासाहेबांचे नाव केले.
ओरिजनल-डुप्लिकेटची टीका
बाळासाहेब ठाकरे हे सर्वांचेच दैवत आहेत. आम्हालाही त्यांचीच शिकवण आहे, असे स्पष्टीकरण संजय गायकवाडांनी दिले. गायकवाडांच्या म्हणण्यानुसार, त्यांच्या मतदारसंघात विरोधकांनी बॉक्सिंगच्या प्रतिकात्मक आंदोलनाने त्यांना लक्ष्य केले होते. त्यावरूनच त्यांनी ओरिजनल-डुप्लिकेटची टिप्पणी केली होती. मात्र माध्यमांनी वाक्याचा चुकीचा अर्थ काढत वादाला तोंड फोडले, असा आरोप त्यांनी केला. संजय गायकवाडांनी मूळ वक्तव्यात ठाकरे गटावर टीका करताना म्हटले होते की, उबाठाच्या वतीने झालेलं आंदोलन ही केवळ नोकरीविरहित प्रतिक्रिया आहे. ते माझी कॉपी करू शकत नाहीत, कारण मी ओरिजनल आहे.
इतकंच काय तर उद्धव बाळासाहेब ठाकरेंच्या बापालाही माझी कॉपी करणे जमणार नाही. त्यांनी पुढे विरोधकांना लोकांच्या खऱ्या प्रश्नांवर लक्ष केंद्रित करण्याचा सल्ला दिला. त्यांनी हेही टोमणे मारले की, राज्यात फक्त 20 जागा मिळाल्याने जनतेने त्यांना त्यांची जागा दाखवून दिली आहे. जे कधी मातोश्रीमधून बाहेर पडत नव्हते, ते आता रस्त्यावर उतरले आहेत. आम्ही महायुतीत आहोत, भाजपाला आपला पक्ष वाढवण्याचा अधिकार आहे. मी माझ्या पक्षाचे काम करतोय. वादातून मागे घेतलेल्या विधानाने गायकवाडांनी आग शांत करण्याचा प्रयत्न केला असला, तरी राजकीय नाट्य अजून शमण्याची चिन्हे नाहीत. ठाकरे गट त्यांना सोडायला तयार नाही. गायकवाडांच्या पुढील हालचालीवर आता सगळ्यांचे लक्ष आहे.
Umesh Kashikar : गांधींच्या लेखणीने कारागृहातून उमटले सौजन्याचे स्वर
