महाराष्ट्राच्या राजकीय वर्तुळात पुन्हा एकदा तणाव वाढला आहे. राज ठाकरे यांच्या भूमिकेमुळे राजकीय गोटात खळबळ उडाली असून संजय राऊत यांनी भाजपवर थेट आरोप केले आहेत.
महाराष्ट्राच्या राजकीय वर्तुळात पुन्हा एकदा खळबळ उडाली आहे. मनसे अध्यक्ष राज ठाकरे यांनी मुख्यमंत्री देवेंद्र फडणवीस यांच्या समर्थनार्थ घेतलेली भूमिका वादग्रस्त ठरत आहे. संजय राऊत यांनी थेट फडणवीस आणि त्यांच्या मंत्रिमंडळातील लोकांवर निशाणा साधला आहे. त्यांनी स्पष्टपणे आरोप केला आहे की, महाराष्ट्रात वातावरण बिघडवण्याचे काम भाजप आणि त्यांचे लोक करत आहेत. तसेच, या सर्व प्रकारावर देवेंद्र फडणवीस यांनी कोणतीही कारवाई न करता मूकसंमती दिल्याचा आरोपही त्यांनी केला आहे.
राज ठाकरे यांनी देवेंद्र फडणवीस यांच्या पाठिशी उभं राहण्याची भूमिका घेतली आहे. संजय राऊत यांनी या निर्णयावर जोरदार टीका केली आहे. फडणवीस चांगलं काम करत असतील, तर त्याची यादी जाहीर करायला हवी होती, असे राऊत म्हणाले. कुणाल कामराचा स्टुडिओ फोडणं, गुन्हेगारांना पाठीशी घालणं ही चांगली कामं आहेत का? मुंबईत मराठी माणसाला घर नाकारलं जात आहे उद्योग बाहेर जात आहेत आणि फडणवीस यावर काहीच बोलत नाहीत. मग, हेच चांगलं काम आहे का? असे तिखट प्रश्न राऊत यांनी उपस्थित केले.
कबरीचा मुद्दा, भाजपाचं राजकारण
औरंगजेबाच्या कबरीचा मुद्दा उपस्थित करत संजय राऊत यांनी भाजपवर निशाणा साधला. महाराष्ट्र हे शौर्याचं प्रतीक आहे. इथल्या मराठा योद्ध्यांनी आपल्या बलिदानाने इतिहास घडवला आहे. त्यामुळे औरंगजेबाच्या कबरीबाबत आम्ही नेहमीच ठाम भूमिका घेतली आहे. मात्र, भाजपने आपल्या सोयीसाठी यावर वेगळी भूमिका घेतली, असा घणाघाती आरोप त्यांनी केला.
संजय राऊत यांनी देवेंद्र फडणवीस यांना शिवसेना फोडण्याचा जबाबदार धरले आहे. शिवसेनेच्या तुकड्यांमागे फडणवीस, नरेंद्र मोदी आणि अमित शाह यांचा मोठा हात आहे. बाळासाहेब ठाकरे यांनी मराठी माणसासाठी उभी केलेली सेना उद्ध्वस्त करण्याचा कट रचण्यात आला. मुंबईवर व्यापाऱ्यांचा ताबा राहावा, यासाठी शिवसेनेची ताकद कमी केली गेली, असा गंभीर आरोप त्यांनी केला.
हितासाठी लढण्याची गरज
संजय राऊत यांनी स्पष्ट केले की, आम्ही मराठी माणसाच्या हक्कांसाठी लढत आहोत. मात्र, काही लोक शत्रूंना मदत करणारी भूमिका घेत आहेत. जर राज ठाकरे यांनी कुणाच्या कानफटात मारण्याचं ठरवलं असेल, तर ती योग्य ठरेल, पण ती भूमिका मराठी माणसाच्या हितासाठी असली पाहिजे. राजकीय वातावरण अधिक तापलं आहे. आगामी काळात या आरोप-प्रत्यारोपांचं काय परिणाम होतील, हे पाहणे महत्त्वाचे ठरणार आहे.
