संजय राऊत यांच्या वक्तव्याला पाठिंबा देत काँग्रेस प्रवक्ते अतुल लोंढे यांनी भाजपवर जोरदार निशाणा साधला आहे.
होळीचा सण रंगात साजरा होत असताना, महाराष्ट्राच्या राजकारणात मात्र अनपेक्षित रंग भरले गेले. काँग्रेसचे माजी प्रदेशाध्यक्ष नाना पटोले यांनी थेट एकनाथ शिंदे आणि अजित पवार यांना काँग्रेसमध्ये येण्याची ऑफर दिली, आणि या विधानामुळे राजकीय वर्तुळात प्रचंड खळबळ उडाली.
ठाकरे गटाचे खासदार संजय राऊत यांनीही यावर खळबळजनक विधान करताना म्हणाले, ‘हे ऐकून माझी वाचा गेली’ राजकारणात काहीही अशक्य नसतं, आणि शक्यता अमर्याद असतात, असंही त्यांनी ठामपणे सांगितलं. विशेष म्हणजे, जर नाना पटोले यांनी ऑफर दिली असेल, तर यावर आम्ही चर्चा करू, असं म्हणत त्यांनी हा मुद्दा अजूनच उचलून धरला. आता यावर काँग्रेसचे प्रवक्ते अतुल लोंढे यांनी देखील काँग्रेसच्या दारात प्रवेशासाठी रांगा लागतील असा जोरदार दावा केला आहे.
Mahayuti : ये दोस्ती हम नहीं तोडेंगे; पण हक्काचा निधी नही छोडेंगे
भाजपला पर्याय नाही
अतुल लोंढे यांनी माध्यमांशी बोलताना भाजपवर जोरदार हल्ला चढवला. ‘भाजप आर्थिक आणि सामाजिक एकात्मतेच्या दृष्टीने अपयशी ठरला आहे, असं सांगत त्यांनी दावा केला की काँग्रेस हाच एकमेव पर्याय उरला आहे. विशेष म्हणजे, ‘भाजप आपल्याला संपवत आहे, पण काँग्रेस सर्वांना सोबत घेत आहे, म्हणूनच अनेक नेते आता काँग्रेसकडे वळण्यास इच्छुक आहेत,’ असं त्यांनी ठामपणे सांगितलं.
संजय राऊत यांनी केलेल्या दाव्यानुसार, ‘एकनाथ शिंदे आधीच काँग्रेसमध्ये जाण्याचा विचार करत होते आणि दिल्लीतील मोठ्या नेत्यांना गुपचूप भेटत होते, हा स्फोटक खुलासा केला गेला. आता ही चर्चा पुन्हा उफाळून आली आहे, त्यामुळे भाजपसाठी हे मोठं संकट ठरण्याची शक्यता आहे.
महायुतीत अंतर्गत कलह
काँग्रेसचे विधिमंडळ पक्षनेते विजय वडेट्टीवार यांनीही या प्रकरणावर मोठे विधान करत महायुतीत अंतर्गत कुरघोडी सुरू असल्याचे इशारे दिले. सध्याच्या परिस्थितीत कोणी कधी कोणाचा हात धरून कुठे पोहोचेल, हे सांगता येणं अवघड आहे, असं सांगत त्यांनी या चर्चांना आणखी चिघळवलं.
महायुती सत्तेत असली तरी नाराजी वाढत आहे. एकमेकांचे खच्चीकरण सुरू आहे, आणि पुढील काळात हा असंतोष अधिक वाढेल, असं स्पष्ट विधान त्यांनी केलं. विशेष म्हणजे, नाना पटोलेंनी ऑफर देण्यास घाई केली असली तरी राजकीय शक्यता नाकारता येत नाहीत, असं सांगत त्यांनी एक नवा सस्पेन्स तयार केला आहे.
Sudhir Mungantiwar : ‘डोन्ट बी क्युरियस’, जनताही घेत नाही काँग्रेसला सिरीयस
राजकीय उलथापालथ
एकूणच पाहता, महाराष्ट्राच्या राजकारणात मोठ्या हालचाली सुरू आहेत. भाजपविरोधात संताप वाढत आहे, महायुतीत नाराजीचा सूर उमटतो आहे, आणि काँग्रेसने थेट सत्ताधारी नेत्यांनाच गळ घालण्यास सुरुवात केली आहे. पुढील काही दिवसांत महाराष्ट्राच्या राजकारणात धक्कादायक ट्विस्ट पाहायला मिळण्याची शक्यता आहे.
