संपूर्ण देशाचं लक्ष असलेलं नागपूर शहर नेहमीच व्हीआयपी सुरक्षेच्या दृष्टीने अलर्टवर असते. आता या शहरातील यंत्रणा आणखी कडक करण्यात आली आहे.
दिल्ली येथे लाल किल्ल्याबाहेर शक्तीशाली बॉम्बस्फोट झाला. त्यानंतर देशभरात ‘हायअलर्ट’ लागू करण्यात आला आहे. नागपूरही त्याला अपवाद नाही. राष्ट्रीय स्वयंसेवक संघाचे मुख्यालय नागपुरात आहे. आता आरएसएस मुख्यालयाची सुरक्षाही कडक करण्यात आली आहे. ही सुरक्षा यंत्रणा खबरदारीचा उपाय म्हणून कडक करण्यात आल्याचे सांगण्यात येत आहे. सध्या नागपूर शहर पोलिसांनी कसून नाकाबंदी सुरू केली आहे.
शहरातील अनेक रस्त्यांवर नियमित बंदोबस्त तैनात करण्यात आला आहे. याशिवाय आरएसएस मुख्यालयाच्या परीसरातही सशस्त्र यंत्रणेला सतर्क करण्यात आले आहे. पोलिसांनी प्रत्येक कानाकोपऱ्यात सुरक्षेची खात्री करणे सुरू केले आहे. सुरक्षेतील ही वाढ खबरदारीचा उपाय म्हणून पाहिले जात आहे.
नागपुरातील प्रशासनाला ‘हायअलर्ट’वर राहण्याची सूचना सर्व अधिकाऱ्यांना करण्यात आली आहे. आएसएस मुख्यालय परिसराला आधीच उच्च सुरक्षा क्षेत्र घोषित आहे. केंद्रीय सुरक्षा यंत्रणा, राज्य राखीव पोलिस दल (SRPF) आरएसएस मुख्यालयाला नेहमीच वेढा घालून असतात. आरएसएस मुख्यालयाचा परिसर कोतवाली पोलिसांच्या कार्यक्षेत्रात येतो.
कोतवालीचे वरिष्ठ पोलिस निरीक्षक रीतेश अहेर हे आणि त्यांचे सहकारी नियमितपणे या भागात गस्त घालताना दिसतात. कोतवालीचे सहाय्यक पोलिस आयुक्त हे देखील संघ मुख्यालयाच्या परिसर सुरक्षेबाबत सतर्क दिसतात. पोलिस उपायुक्त राहुल मदने आणि अतिरिक्त पोलिस आयुक्त राजेंद्र दाभाडे यांचेही बारकाईने लक्ष असते.
गजबजलेला परिसर
अत्यंत दाटीवाटीच्या असलेल्या या परिसरात महालचा भाग आहे. गेल्या काही महिन्यांपूर्वी येथे जातीय दंगल देखील झाली होती. त्यावेळी नागपूर पोलिस दलातील पोलिस उपायुक्तांना गंभीर दुखापत झाले होते. तेव्हापासून या भागातील पोलिसिंग आणखी कडक करण्यात आलं आहे. अशा घटना भविष्यात घडणार नाही, यासाठी स्वत: पोलिस आयुक्त डॉ. रवींद्र सिंगल, सहपोलिस आयुक्त नवीनचंद्र रेड्डी आणि सर्व अतिरिक्त पोलिस आयुक्त, उपायुक्त सामूहिक प्रयत्न करीत आहे.
या सामूहिक प्रयत्नांचा परिणाम म्हणून नागपुरात जातीय तणाव निर्माण होत नाही किंवा घातक गुन्हेगारीवर नियंत्रण मिळाले आहे. असेच प्रयत्न संघ मुख्यालयाच्या सुरक्षेबाबत सुरू आहेत. गुप्तचर विभागाच्या सूचनेनंतर आरएसएस मुख्यालयाला धोका होऊ नये, म्हणून काळजी घेण्याबाबत सांगण्यात आले आहे. पुन्हा एकदा नागपूर शहर पोलिस दलाची ‘क्विक रिस्पॉन्स टीम’ (Quick Response Team) आरएसएस मुख्यालयाच्या परिसरात तैनात करण्यात आली आहे.
राज्य राखीव पोलिस दलाचा सुरक्षा वेढाही वाढविण्यात आला आहे. संघ मुख्यालयाच्या प्रत्येक मार्गावर कठडे उभारण्यात आले आहेत. मुख्यालयाकडे येणाऱ्या रस्त्यावर मोठ्या संख्येने सशस्त्र कर्मचारी तैनात करण्यात आले आहेत. अलिकडच्या गुप्तचर संस्थांनी असे संकेत दिले आहेत की दहशतवादी संघटना मोठ्या हल्ल्याची योजना आखत असू शकतात. दिल्लीतील कार बॉम्बस्फोटांनंतर उघड झालेल्या सुगाव्यांमुळे नागपूर हे संभाव्य लक्ष्य असू शकते, अशी शक्यता नाकारता येत नाही. त्यामुळे पोलिस आणि एटीएसने शहरात मोठ्या प्रमाणात तपास सुरू केला आहे. ही प्रक्रिया देखील नियमित असल्याचं सांगण्यात येत आहे.
अखंड सतर्कता
राष्ट्रीय स्वयंसेवक संघाचं मुख्यालय नेहमीच दहशतवाद्यांच्या निशाण्यावर असते. त्यामुळे दिल्लीतील स्फोटानंतर देशभरातील अनेक महत्वाच्या ठिकाणांची सुरक्षा कडक करण्यात आली आहे. त्यामुळे सुरक्षा वेढा तिपटीनं वाढविण्यात आला आहे. संघ मुख्यालयाच्या प्रवेश द्वारावरील तपासणीही चोख करण्यात आली आहे. बाहेर जाणाऱ्या सर्व रस्त्यांवरही नजर ठेवली जात आहे.
सगळीकडेच बहुस्तरीय तपासणी प्रणाली कार्यान्वित करण्यात आली आहे. या भागातून जाणाऱ्या प्रत्येक वाहनाचीही तपासणी केली जात आहे. संशयास्पद हालचालींवर त्वरित कारवाई करण्याचे निर्देश पोलिसांना देण्यात आले आहेत. स्थानिक नागरिकांसह मुख्यालयात प्रवेश करणाऱ्या प्रत्येकाची तपासणी केली जात आहे. केंद्रीय सुरक्षा दलाच्या दोन अतिरिक्त कंपन्याही नागपुरात दाखल झाल्या आहेत.
