सुप्रीम कोर्टात सरन्यायाधीश बी.आर. गवई यांच्या दिशेने वकिलाने बूट फेकण्याचा प्रयत्न करत सनातन धर्माचा अपमान सहन करणार नाही अशी घोषणा केली. ज्यामुळे न्यायालयीन परिसरात खळबळ उडाली.
भारताच्या न्यायव्यवस्थेच्या मंदिरात, जिथे कायद्याच्या देवतेची पूजा होते, तिथेच एका वादळी घटनेने सगळ्या देशाला हादरवून सोडले. सुप्रीम कोर्टाच्या भव्य सभागृहात, जिथे न्यायासाठी लढल्या जाते, तिथे एक वकील अचानक उठतो आणि सरन्यायाधीश बी.आर. गवई यांच्यावर बूट फेकण्याचा प्रयत्न करतो. हे दृश्य एखाद्या नाटकातील वाटते, पण ही वास्तविकता आहे. ‘सनातन धर्माचा अपमान सहन करणार नाही’ असा ओरडत हा वकील पकडला गेला आणि याने एक नवीन वादाला जन्म दिला. न्यायालयातील अभिव्यक्ती स्वातंत्र्य की अराजकतेची सुरुवात? काहींच्या मते, हे धार्मिक भावनांच्या नावाखाली न्यायव्यवस्थेवर होणारा हल्ला आहे, तर इतरांच्या दृष्टीने, हे राजकीय षडयंत्राचा भाग असू शकते. जिथे सनातन धर्माच्या नावाने न्यायाधीशांना लक्ष्य केले जाते. ही घटना सहा ऑक्टोबरला घडली. जेव्हा सुप्रीम कोर्टात एका प्रकरणाची सुनावणी सुरू होती.
60 वर्षीय वकील राकेश किशोर याने सरन्यायाधीशांच्या दिशेने बूट उगारला. पण सुरक्षा कर्मचाऱ्यांच्या सतर्कतेने हा अनर्थ टळला. कोर्टाबाहेर काढताना तो जोरजोरात ओरडत होता, ‘भारत सनातन धर्माचा अपमान सहन करणार नाही.’ सरन्यायाधीश गवई, जे त्यांच्या सडेतोड बोलण्यासाठी ओळखले जातात, यांनी मात्र पूर्ण शांतता राखली. त्यांनी सांगितले, मला अशा गोष्टींनी फरक पडत नाही. या सर्व गोष्टींमुळे विचलित होण्याची गरज नाही. त्यांनी सुनावणी सुरू ठेवली, जणू काही घडलेच नाही. पण हा संयम काहींना पटला नाही. या घटनेनंतर राजकीय वर्तुळात खळबळ उडाली. राष्ट्रवादी काँग्रेस शरद पवार गटाने कडक शब्दांत निषेध व्यक्त केला. पक्षाने म्हटले, देशाची परिस्थिती काही लोक कुठे नेत आहेत? त्यांनी जो वातावरण तयार केला आहे, त्यामुळे देशातील वातावरण दूषित झाले आहे.
न्यायालयात वाढता तणाव
आज जर देशाच्या मुख्य न्यायाधीशांबरोबरही असे वागणूक होत असेल, तर हा लोकशाहीसाठी गंभीर चिंतेचा विषय आहे. अकोला शहरात या घटनेच्या विरोधात राष्ट्रवादी काँग्रेस पक्षाच्या शरद पवार महानगर गटाने जोरदार निदर्शने केली. मदनलाल धिंग्रा चौकावर काळे झेंडे आणि बॅनर्स घेऊन पदाधिकारी आणि कार्यकर्ते जमले. प्रदर्शनाचे नेतृत्व रफीक सिद्दीकी, जावेद जकरिया, युसूफ अली, देवा ताले (कार्याध्यक्ष) आणि मेहमूद खान पठाण यांनी केले. या प्रसंगी सुनील वनारे, मिलिंद गवई, पापाचंद पवार, अॅड. संदीप तायडे, बाबासाहेब घुमरे, आनंद वेराळे, शेख रमजान, अन्सार अली, मोहम्मद साफिक उर्फ पप्पु भाई, रजिक इंजिनियर, अल्ताफ खान, मो सानिफ, चंदू भाई चांदखां, उमेश खंडारे, नरेंद्र देशमुख, रेहान सिद्दीकी, शाहीद सिद्दीकी, भाऊराव साबळे, वसीम खान, रमेश नाईक, सोहेल खातीब, अमन घरडे आणि इतर अनेक कार्यकर्ते उपस्थित होते.
घटनेने एक मोठा प्रश्न उपस्थित केला आहे. धार्मिक भावनांच्या नावाखाली न्यायव्यवस्थेवर हल्ले होत असतील, तर लोकशाहीचे भविष्य काय? सरन्यायाधीश गवई, जे दलित समाजातील पहिले सरन्यायाधीश आहेत, त्यांच्या वादग्रस्त वक्तव्यांमुळे ते नेहमी चर्चेत असतात. काही दिवसांपूर्वी त्यांनी केलेल्या विधानांमुळे सोशल मीडियावर त्यांना ट्रोल करण्यात आले होते. आता हे हल्ले थेट न्यायालयात पोहोचले आहेत. काहींच्या मते, हे सनातन धर्माच्या रक्षणाच्या नावाने होणारे अतिरेक आहे, जे देशातील अल्पसंख्याकांना धमकावण्याचा प्रयत्न असू शकतो. दुसरीकडे, काही राजकीय पक्ष या घटनेचा फायदा घेऊन आपली वोटबँक मजबूत करण्याचा प्रयत्न करत असल्याचे दिसते.
