देशाच्या उपराष्ट्रपतीपदाच्या निवडणुकीत यंदा अर्जांचा पाऊस पडला, पण पडताळणी दरम्यान अनेक अर्ज कोसळले. अखेरीस फक्त दोन उमेदवार शर्यतीत उरले असून, बाकींच्या सहींची करामत उघड झाली.
देशाच्या सर्वोच्च संवैधानिक पदांपैकी एक असलेल्या उपराष्ट्रपतीपदासाठी यंदा मोठी चुरस निर्माण झाली आहे. माजी उपराष्ट्रपती जगदीप धनखड यांच्या राजीनाम्यानंतर रिक्त झालेल्या या पदासाठी निवडणूक प्रक्रिया सुरू झाली आहे. एनडीए आणि इंडिया आघाडी या दोन्ही पातळ्यांवरून उमेदवारीची हालचाल रंगली आहे. या पार्श्वभूमीवर अनेक दिग्गजांच्या नावांवरून चर्चा रंगत आहे. असे असताना नामांकन प्रक्रियेदरम्यान समोर आलेल्या धक्कादायक घटनेने सर्वांचे लक्ष वेधले आहे.
पदासाठी आतापर्यंत एकूण 68 नामांकन अर्ज दाखल झाले आहेत. मात्र या संख्येच्या आड लपलेले गूढ समोर येताच, निवडणुकीच्या विश्वासार्हतेवर प्रश्नचिन्ह निर्माण झाले आहे. अर्जांच्या पडताळणीत खासदारांच्या नावांचा व स्वाक्षरींचा गैरवापर झाल्याचा प्रकार उघडकीस आल्याने राजकीय वर्तुळात खळबळ उडाली आहे.
NMC Election : संघ भूमीत बंटी दादांचा डंका पुन्हा वाजणार का?
धक्कादायक वळण
निवडणुकीसाठी एनडीएकडून सी. पी. राधाकृष्णन आणि इंडिया आघाडीकडून बी. सुदर्शन रेड्डी यांनी अर्ज दाखल केले आहेत. या दोन्ही अधिकृत उमेदवारांसोबत एकूण 46 उमेदवारांनी 68 अर्ज सादर केले होते. नामांकनाची अंतिम तारीख 21 ऑगस्ट होती. यापैकी सुरुवातीच्या पडताळणीत 19 उमेदवारांचे 28 अर्ज नाकारण्यात आले, तर उर्वरित 27 उमेदवारांचे 40 अर्ज तपासणीसाठी ठेवण्यात आले.
22 ऑगस्ट रोजी झालेल्या तपासणीदरम्यान केरळमधील जोमोन जोसेफ या उमेदवाराचा अर्ज सर्वाधिक चर्चेत आला. त्यांच्या अर्जात तब्बल 22 प्रस्तावक आणि 22 समर्थकांच्या स्वाक्षऱ्या असल्याचे दिसले. मात्र, यातील अनेक खासदारांनी स्पष्ट केले की त्यांनी कधीही या उमेदवारीसाठी सहमती किंवा स्वाक्षरी दिलेली नाही. विशेष म्हणजे, यामध्ये सध्या तुरुंगात असलेले वायएसआरसीपीचे खासदार मिधुन रेड्डी यांचे नाव आणि स्वाक्षरीही दिसून आल्याने प्रकरण अधिक गंभीर झाले.
Flyover closure : अमरावतीकरांनो, पर्यायी मार्गांची तयारी करा
उमेदवारांची थेट टक्कर
पडताळणीनंतर उघड झालेल्या या बनावट स्वाक्षरी प्रकरणामुळे बहुतेक अर्ज बाद झाले आहे. अंतिम यादीत केवळ दोन उमेदवार उरले आहेत. यात एनडीएचे सी. पी. राधाकृष्णन आणि इंडिया आघाडीचे बी. सुदर्शन रेड्डी या दोन नेत्यांमध्ये थेट लढत होणार आहे. निवडणूक आयोगाने जाहीर केल्याप्रमाणे 25 ऑगस्टपर्यंत उमेदवारांना माघार घेण्याची संधी आहे.
दरम्यान, माजी उपराष्ट्रपती जगदीप धनखड यांनी 21 जुलै रोजी आरोग्याच्या कारणास्तव आपला राजीनामा दिल्यानंतर हे पद रिक्त झाले होते. निवडणूक आयोगाने त्यानंतर प्रक्रिया सुरू करून मतदानाची तारीख 9 सप्टेंबर निश्चित केली आहे. या दिवशी देशाला नवा उपराष्ट्रपती मिळणार असून, या निवडणुकीकडे संपूर्ण देशाचे लक्ष लागले आहे.
