नागपूरात श्री श्री रविशंकरांच्या आगमनाने अध्यात्माचा महासागर उफाळून आला. सोमनाथ ज्योतिर्लिंगाच्या पवित्र दर्शनासह महासत्संगातून गुरुदेवांनी समाजाला आत्मबल आणि सकारात्मकतेचा नवा मंत्र दिला.
प्राचीन सोमनाथ ज्योतिर्लिंगाच्या पवित्र सान्निध्यात आणि आर्ट ऑफ लिव्हिंगच्या माध्यमातून आयोजित महारुद्र पूजा तसेच गुरुदेव श्री श्री रविशंकर यांच्या मार्गदर्शनाखालील महासत्संगाने नागपूर शहर बुधवारी, 10 सप्टेंबरला आध्यात्मिक उर्जेने न्हाऊन निघाले. मलकापूर येथील क्रीडा संकुलात सायंकाळी सुरू झालेल्या या भव्य कार्यक्रमाला हजारो भाविकांनी उपस्थिती लावली. श्री श्री रविशंकर यांनी नागपूर विमानतळावर प्रसारमाध्यमांशी संवाद साधताना नेपाळमधील हिंसाचारावर गंभीर चिंता व्यक्त केली. यामागे आंतरराष्ट्रीय षडयंत्राचा संशय असल्याचे सूचक विधान केले. यासोबतच त्यांनी विदर्भातील शेतकऱ्यांच्या आत्महत्येच्या समस्येवरही भाष्य केले. ज्यामुळे उपस्थितांमध्ये आत्मचिंतनाचा सूर उमटला.
तीन दिवसीय दौऱ्यात श्री श्री रविशंकर महारुद्र पूजा, विज्ञान भैरव शिबिर आणि विविध आध्यात्मिक उपक्रमांद्वारे समाजाला आत्मबल आणि सकारात्मकतेचा संदेश देत आहेत. त्यांनी विदर्भातील शेतकऱ्यांच्या वाढत्या नैराश्यावर चिंता व्यक्त करत, यापूर्वीच्या पदयात्रेच्या यशस्वी अनुभवांचा उल्लेख केला. काही वर्षांपूर्वी 370 गावांमध्ये पदयात्रा काढली होती. आता पुन्हा एकदा अशीच प्रेरणादायी मोहीम उभारण्याची वेळ आली आहे, असे त्यांनी ठामपणे सांगितले. अध्यात्माच्या माध्यमातून शेतकरी, व्यापारी आणि सर्वसामान्यांना जीवनातील आव्हानांना सामोरे जाण्याची प्रेरणा देण्याचा त्यांचा मानस आहे.
सोमनाथ ज्योतिर्लिंगाचे दर्शन
श्री श्री रविशंकर यांनी सोमनाथ ज्योतिर्लिंगाची पवित्र पिंडी नागपुरात आणली आहे. जी एक हजार वर्षांपूर्वी उद्ध्वस्त झालेल्या मंदिरातील आहे. दक्षिण भारतात सुरक्षित ठेवलेली ही पिंडी आज नागपूरच्या भक्तांना दर्शनासाठी खुली करण्यात आली आहे. आध्यात्मिक मार्गावर चालून परमेश्वरावर विश्वास ठेवा, आत्महत्या हा कधीच पर्याय नाही, असे भावपूर्ण आवाहन त्यांनी केले. या पवित्र दर्शनामुळे भाविकांमध्ये आध्यात्मिक उर्जेचा संचार झाला आहे.
Charan Waghmare : जनसुरक्षा कायदा म्हणजे इंग्रजी राजवटींचा पुनर्जन्म
नेपाळमधील हिंसाचारावर बोलताना श्री श्री रविशंकर यांनी सावधपणे यामागील संभाव्य आंतरराष्ट्रीय षडयंत्राचा उल्लेख केला. आंदोलनांमध्ये असामाजिक तत्त्वांचा शिरकाव होतो, ज्यामुळे परिस्थिती चिघळते, असे त्यांनी नमूद केले. यावेळी त्यांनी नेपाळमधील तरुणांमधील वाढते नैराश्यही स्पष्ट केले. यासोबतच, राष्ट्रीय स्वयंसेवक संघाच्या शतकमहोत्सव आणि सरसंघचालक डॉ. मोहन भागवत यांच्या वाढदिवसानिमित्त त्यांची भेट घेण्याची इच्छा व्यक्त करत, त्यांनी संघाच्या कार्याचे कौतुक केले. या दौऱ्यातील त्यांचे मार्गदर्शन आणि आध्यात्मिक संदेश समाजाला नवी दिशा देणारे ठरेल, यात शंका नाही.
