पाकिस्तानी नंबरवरून मुख्यमंत्री कार्यालय उडवण्याची थेट धमकी देण्यात आली आहे. या प्रकारामुळे पोलिस प्रशासन सतर्क झाले असून तपास सुरू करण्यात आला आहे.
समुद्रकिनारी वसलेली महाराष्ट्राची राजधानी मुंबई. जेथे समुद्रकिनारे, ऐतिहासिक वास्तू, आणि निळसर रस्त्यांवरील वर्दळ कधीच थांबत नाही. रस्त्यावर लोकांना चालायला रस्ता कमी पडेल असं हे शहर, या शहरात जिथे पाहिलं तिथे गर्दी आणि गोंधळ दिसेल. मात्र, हेच शहर गेल्या काही दिवसांपासून सतत धमक्यांच्या सावटाखाली आहे. कुणी विमानात बॉम्ब असल्याचा मेसेज पाठवतो, कुणी राजकीय नेत्यांना लक्ष्य करण्याचा इशारा देतो, तर आता थेट मुख्यमंत्र्यांच्या कार्यालयावर हल्ल्याची धमकी देण्यात आली आहे. विशेष म्हणजे हा संदेश पाकिस्तानमधील एका नंबरवरून आल्याने संपूर्ण यंत्रणा सतर्क झाली आहे.
कल्पना करा, तुम्ही रोजच्या प्रमाणे तुमच्या कामावर जाताय, शहरातील वाहतूक आपल्या नेहमीच्या गतीने सुरू आहे आणि अचानक पोलिस यंत्रणेत खळबळ उडते. एका अनोळखी नंबरवरून येतो एक धक्कादायक व्हॉट्सअप मेसेज “मुख्यमंत्र्यांचे कार्यालय उडवून देऊ” या एका वाक्याने संपूर्ण यंत्रणा हालचालीत आली, तपास सुरू झाला, आणि मुंबई पोलिस पुन्हा एकदा अलर्ट मोडवर गेले. धमकी देणाऱ्या व्यक्तीने स्वतःला ‘शहाबाज हुमायून राजा देव’ असल्याचे सांगितले आणि यामुळे आणखीनच गोंधळ उडाला. आता हे नाव सत्य आहे की हेही एक बनाव आहे, याचा शोध पोलिस घेत आहेत.
पोलिसांचा तपास सुरु
धमकीचा संदेश आल्यानंतर मुंबई पोलिसांनी मोठ्या प्रमाणावर तपास सुरू केला आहे. सायबर सेलसह विविध तपास यंत्रणांना कामाला लावण्यात आले आहे. व्हॉट्सअपच्या माध्यमातून पाठवलेला हा संदेश ट्रॅक करण्याचा प्रयत्न सुरू आहे. सुरक्षा यंत्रणांनी मंत्रालयाच्या परिसरात कडेकोट बंदोबस्त ठेवला असून कोणत्याही संभाव्य धोका टाळण्यासाठी उच्चस्तरीय बैठका घेतल्या जात आहेत. महाराष्ट्र सरकार आणि गृहमंत्रालयाने या प्रकरणाची गांभीर्याने दखल घेतली आहे. सोबतच आवश्यक ती पावले उचलण्याचे आदेश दिले आहेत.
गेल्या काही महिन्यांपासून राजकीय नेते आणि सरकारी कार्यालयांना सतत अशा धमक्या मिळत आहेत. काही दिवसांपूर्वीच एकनाथ शिंदे यांच्या गाडीला बॉम्बने उडवण्याची धमकी दिली होती. त्या प्रकरणात तपासानंतर समोर आले की, आरोपीने आपल्या मित्राचा बदला घेण्यासाठी खोटी धमकी दिली होती. त्यामुळे या नवीन धमकीच्या प्रकरणातही पोलिस कोणत्याही शक्यतेला नाकारत नाहीत. परंतु, यंदाच्या धमकीमुळे प्रशासन अधिकच अलर्ट झाले आहे. यामध्ये थेट मुख्यमंत्री कार्यालयाला लक्ष्य केले गेले आहे आणि संदेश पाकिस्तानातून आल्याची शक्यता व्यक्त केली जात आहे. त्यामुळे याप्रकरणी आंतरराष्ट्रीय तपासही शक्य आहे.
सुरक्षेची जबाबदारी
मुंबई हे देशाचे आर्थिक केंद्र असल्याने येथे सुरक्षेची जबाबदारी अधिक मोठी आहे. अशा प्रकारच्या धमक्या येणे म्हणजे सामान्य नागरिकांमध्ये भीती निर्माण होण्याची शक्यता असते. त्यामुळे प्रशासनाने तत्काळ मोठ्या तपास मोहिमेला सुरुवात केली आहे. आता पाहावे लागेल की, या प्रकरणाचा मुख्य सूत्रधार कोण आहे? ही धमकी केवळ दहशत माजवण्यासाठी होती, की त्यामागे काही मोठा कट आहे? मुंबई पोलिसांसाठी ही मोठी कसोटी आहे, आणि ते या प्रकरणाचा छडा लावण्याचा प्रयत्न करत आहेत.
