देशातील वाहनधारकांसाठी मोठी दिलासादायक बातमी समोर आली आहे. टोलशुल्काच्या जुन्या पद्धतीत आमूलाग्र बदल करत सरकार नव्या धोरणाच्या उंबरठ्यावर उभं आहे. या संदर्भात पुढील काही दिवसांत नितीन गडकरी मोठी घोषणा करणार आहेत.
नव्या युगात देशातील वाहनचालकांना मोठा दिलासा देणारी बातमी समोर आली आहे. रस्त्यांवरील टोलशुल्क आता इतिहासजमा होण्याच्या मार्गावर आहे. केंद्रीय रस्ते वाहतूक आणि महामार्ग मंत्री नितीन गडकरी यांनी यासंदर्भात एक महत्त्वपूर्ण घोषणा करत संपूर्ण देशाचे लक्ष वेधून घेतले आहे. वाहनधारकांना टोलच्या बोजापासून मुक्त करण्यासाठी आम्ही एक क्रांतिकारी धोरण तयार करत आहोत, जे येत्या 8 ते 10 दिवसांत जाहीर होईल, अशी गडकरी यांनी दिलेली माहिती नागरिकांसाठी आशेचा नवा किरण ठरली आहे.
गडकरी म्हणाले, देशातील टोलप्रणाली पूर्णपणे बदलणार आहे. आम्ही जे धोरण तयार करत आहोत, त्यानुसार टोलशुल्कात थेट शंभर टक्के कपात केली जाईल. वाहनधारकांच्या खिशावरचा भार कमी करणे हे आमचे प्रमुख उद्दिष्ट आहे. या घोषणेमुळे देशभरातील कोट्यवधी वाहनचालकांना दिलासा मिळणार असून, टोलबूथवरील तासन्‌तास रांगा, वेळेचा अपव्यय आणि खर्चात होणारी वाढ आता लवकरच संपुष्टात येण्याची शक्यता आहे.
मलाच दोनदा दंड
गडकरी यांनी वाहतूक नियमांचे महत्त्व पटवून देताना एक मनोरंजक प्रसंग सांगितला. “मुंबईत मीच बांधलेल्या वांद्रे-वरळी सी लिंकवर माझ्या गाडीला दोनदा दंड ठोठावण्यात आला. मी स्वतः नियम पाळतो आणि इतरांनीही तेच करायला हवे,” असे सांगताना त्यांनी हसत हसत सांगितले की त्यांना त्या चुकीसाठी 500 रुपये दंड भरावा लागला. ते पुढे म्हणाले, कॅमेरे सर्वकाही कैद करतात. नियमांपासून कोणीही सुटत नाही. दंड हा शासनाचा महसूल वाढवण्यासाठी नसून, नागरिकांनी नियम पाळावेत यासाठी असतो.
Nagpur : शिक्षण घोटाळ्यात प्रमुख दोषी ठरलेले निलेश वाघमारे सस्पेंड
गडकरी यांनी रस्ते सुरक्षेबाबत देखील महत्त्वाची माहिती दिली. आमचे उद्दिष्ट अपघातांचे प्रमाण 50 टक्के पर्यंत कमी करणे होते. परंतु अद्याप ते साध्य करता आलेले नाही. त्यासाठी आम्ही रस्ते अभियांत्रिकी आणि ऑटोमोबाईल सुरक्षा यामध्ये मोठे बदल करत आहोत. गडकरी यांनी पुढे सांगितले की, रस्त्यांवरील खड्डे बुजवण्यासाठी 40 हजार कोटी रुपयांचा खर्च करण्यात आला आहे. याशिवाय ‘राहवीर योजना’ अंतर्गत अपघातग्रस्तांना मदत करणाऱ्यांना 25 हजार रुपयांचे बक्षीस देण्याची तरतूद करण्यात आली आहे. अपघातग्रस्तांच्या उपचारासाठी लागणारा खर्च देखील सरकारकडून भागवण्याचा प्रयत्न सुरू आहे.
नवीन युगाची सुरुवात
गडकरी यांच्या या घोषणेमुळे वाहनचालकांमध्ये उत्साहाची लाट पसरली आहे. टोलशुल्कात शंभर टक्के कपात, वाहतूक नियमांची कडक अंमलबजावणी, आणि रस्ते अपघात कमी करण्यासाठी सुरू असलेले प्रयत्न — या साऱ्यामुळे देशात एक नवे ट्रान्सपोर्ट युग सुरू होणार असल्याचे संकेत मिळत आहेत. येणाऱ्या काही दिवसांत नितीन गडकरी टोल धोरणासंदर्भात अधिक माहिती देणार असून, संपूर्ण देशाचे लक्ष त्या घोषणेकडे लागले आहे. वाहनधारकांसाठी ही बातमी म्हणजे मोठा दिलासा आणि नवा बदल घडवून आणणारी ऐतिहासिक पायरी ठरू शकते.
