विधानसभा निवडणुकीत झालेली चूक भाजपकडून महापालिकेच्या बाबत सुधारलेली दिसत नाही. महापालिका निवडणुकीसाठी प्रमुखाची नेमणूक झाल्यानंतर भाजपमध्ये ही प्रतिक्रिया उमटत आहे.
लवकरच होणाऱ्या अकोला महापालिका निवडणुकीसाठी प्रमुख म्हणून माजी महापौर विजय अग्रवाल यांची नियुक्ती करण्यात आली आहे. अग्रवाल यांची नियुक्ती झाल्यानंतर भाजपच्या सर्व निष्ठावान कार्यकर्त्यांमध्ये दहशतीचे वातावरण आहे. अकोला पश्चिम विधानसभा निवडणुकीत पराभूत झालेल्या अग्रवाल यांनी निकालानंतर पत्रकार परिषद घेतली होती. त्यावेळी त्यांनी विरोधात काम करणाऱ्या प्रत्येकाच्या नावाला महापालिका निवडणुकीत कात्री लावण्यात येईल, अशी खुली धमकी दिली होती.
निवडणूक निकालापासून आजपर्यंत अग्रवाल यांचे सगळेच सहकारी भाजपमधील अनेकांना धमक्या देत होते. ‘भाऊंकडेच तिकिट वाटपाचे अधिकारी येणार आहे,’ अशा आशयाची ही धमकी होती. अशात विधानसभा निवडणुकीत पराभूत झालेल्या अग्रवाल यांनी आपला शब्द खरा करून दाखवला आहे. भाजपला महापालिकेत ‘विजय’ मिळविण्यासाठी पराभूत उमेदवारच आवडला आहे. त्यामुळे अग्रवाल हे अनेकांच्या नावाला कात्री लावतील यात दुमतच नाही.
खरी रंगत दिसणार
अकोला महापालिकेच्या निवडणुकीत पुन्हा विजय अग्रवाल यांना प्रमुख करण्यात आल्याने भजपमधील नाराजांचा गट खवळला आहे. ‘द लोकहित लाइव्ह’शी बोलताना भाजपच्या अनेक पदाधिकाऱ्यांनी अकोल्यात आता भाजप उरणार की नाही? असा सवाल उपस्थित केला. विजय अग्रवाल यांच्या नावाला अकोला पश्चिम विधानसभा मतदारसंघातील प्रत्येकाचा विरोध होता. तरीही त्यांच्या नावावर भाजप ठाम राहिली. त्यामुळे उमेदवारी देताना मोठा आर्थिक व्यवहार झाल्याचा आरोप अनेकांनी पुन्हा एकदा केला. निमित्त ठरले अग्रवाल यांच्या प्रमुखपदी निवडीचे.
अग्रवाल हे निवडणूक प्रमुख झाल्याने ते फक्त सूड उगवतील, असाच आरोप ‘द लोकहित लाइव्ह’शी बोलताना बहुतांश नेते, पदाधिकारी, कार्यकर्त्यांनी केला. अलीकडेच भाजपचे दिवंगत आमदार गोवर्धन शर्मा यांची पुण्यतिथी झाली. त्याला भाजपमधील अनेक कार्यकर्त्यांनी पाठ दाखवली. धमक्या मिळत असल्यानेच आम्ही पुण्यतिथी कार्यक्रमाला जाणे टाळले, असे सगळ्यांनीच सांगितले. अशात अग्रवाल निवडणूक प्रमुख झाल्याने आता निवडणुकीत खरी रंगत येणार आहे.
नाकावर टिच्चून करू!!
भाजपमधील नाराजांपैकी अनेकांनी अग्रवाल यांच्या नियुक्तीला आव्हान म्हणून स्वीकारले आहे. अग्रवाल यांच्या नाकावर टिच्चून उमेदवारी मिळवून दाखवू, असे काहींनी सांगितले. अग्रवाल यांनी कशी उमेदवारी मिळवली हे ठाऊक आहे. त्यामुळे आम्ही तशाच किंवा त्यापेक्षाही वेगळ्या मार्गाचा अवलंब करून उमेदवारी मिळवून दाखवू शकतो, असे विधानसभा निवडणुकीत बंड करणाऱ्या अनेकांनी सांगितले. त्यामुळे यंदाच्या महापालिका निवडणुकीतही अकोला भाजपमध्ये पाडापाडीचे राजकारण दिसेल, यात शंकाच नाही.
पश्चिमध्ये भाजपला 15 हजार मतांची आघाडी मिळाल्याचा दावा केला जातो. परंतु अखेरच्या क्षणापर्यंत भाजपचा कार्यकर्ता आणि आरएसएसचे स्वयंसेवक विरोधात होते. त्यामुळे कोणाला, कोणाच्या कसे व किती पाया पडावे लागले, हे सगळ्यांनाच ठाऊक असल्याची प्रतिक्रिया या नियुक्तीनंतर नाराज झालेल्या अनेकांनी व्यक्त केली. पराभूत झालेल्या ‘विजय’ला महापालिकेतील आपल्या पापाचे प्रायाश्चित करायचे आहे.
पापाचे प्रायाश्चित
अकोला महापालिकेच्या सभागृहाला अग्रवाल यांनीच शहिदे आजम टिपू सुलतान यांचे नाव दिले होते. अकोला पश्चिमचे विद्यमान आमदार साजिद खान पठाण यांच्या नावाला विरोध होतो. परंतु त्यांना कोण कडेवर घेऊन फिरत होते, हे अख्ख्या अकोल्याला ठाऊक आहे. त्यामुळे आमदारकीचे स्वप्न सोडून एखाद्याला महापौर व्हावे, असे वाटत असेल तर त्यात गैर नाही. महापौर झाल्यानंतर अशा नेत्यांनी ‘शहिदे आजम टिपू सुलतान’ हे नाव 56 इंचाच्या छातीने बदल्याणे धाडस दाखवावे, असा सल्लाही भाजपमधील अनेकांनी ‘द लोकहित लाइव्ह’शी बोलताना दिला.
निवडणूक कोणतीही असो ती सच्च्या कार्यकर्त्यांच्या जोरावर लढता येते. एकटा व्यक्ती सत्ता आणू शकत नाही. असे असते तर पंतप्रधान नरेंद्र मोदी आणि योगी आदित्यनाथ यांची सभा झाल्यानंतरही तोंडघशी पडण्याची वेळ आली नसती, असा खोचक टोलाही कौलखेड, गोरक्षण रोड, सिंधी कॅम्प, जुने शहर, डाबकी रोड, गोडबोले प्लॉट, जठारपेठ, उमरी, खोलेश्वर, टिळक रोड या भागातील भाजपमधील अनेकांना बोलाताना लगावला.
