राहुल गांधींसह अनेक विरोधी नेत्यांना ताब्यात घेतल्याने दिल्लीच्या राजकीय आकाशात संतापाची वादळं उसळली. याच पार्श्वभूमीवर विजय वडेट्टीवारांनी निवडणूक आयोगावर घनाघात करत लोकशाहीच्या बचावाची रणशिंग फुंकली.
काँग्रेस नेते राहुल गांधी यांनी निवडणूक प्रक्रियेवरून भाजपवर अनेक आरोप केले. गांधी यांनी पत्रकार परिषद घेऊन मतदार यादीत निवडणूक आयोगाने आणि भाजपने मिळून घोटाळा केले असल्याचे गांधी यांनी सांगितले. काँग्रेसकडून तीव्र आंदोलन करण्यात आले. दिल्लीतील या आंदोलनादरम्यान राहुल गांधी आणि अनेक विरोधी नेत्यांना पोलिसांनी ताब्यात घेतले. या घटनेने काँग्रेस नेते विजय वडेट्टीवार संतप्त झाले. यावरून त्यांनी निवडणूक आयोग आणि भाजपवर रोखठोक हल्ला चढवत, निवडणूक आयोगाला नेमकी कुणाची भीती वाटते? असा सवाल वडेट्टीवार यांनी उपस्थित केला.
लोकशाहीच्या रक्षणासाठी ही लढाई कुठेही, कितीही दिवस चालवण्याचा त्यांनी इशारा दिला. वडेट्टीवार म्हणाले, लोकशाही बळकट होण्यासाठी निवडणुका पारदर्शक पद्धतीने पार पडल्या पाहिजेत. पण देशातील निवडणुकांमध्ये मतचोरी होत आहे आणि आयोग त्यावर मौन बाळगून भाजपची ढाल बनला आहे. त्यांच्या मते, आज इंडिया आघाडीने केलेलं आंदोलन हे केवळ राजकारण नव्हतं, तर प्रत्येक मतदाराचा मतदानाचा हक्क जिवंत ठेवण्यासाठीची लढाई होती. पण आयोगाने उत्तरे देण्याऐवजी पळवाटा शोधल्या आणि विरोधकांना अडवण्याचा प्रयत्न केला.
Police Recruitment : महाराष्ट्राला मिळणार लवकरच नवीन सुरक्षा कवच
वाद आणखी भडकला
वडेट्टीवारांनी ठामपणे सांगितलं की, आज आम्हाला ताब्यात घेतलं तरी आम्ही थांबणार नाही. संविधान आणि लोकशाही वाचवण्याची ही लढाई सुरूच राहणार. निवडणूक आयोग आमचं तोंड बंद करू शकतो, पण आमच्या आवाजाला गप्प करू शकत नाही. या पार्श्वभूमीवर 2024 लोकसभा आणि महाराष्ट्र विधानसभा निवडणुकीनंतर पेटलेला मत चोरीचा वाद आणखी भडकला आहे.
काँग्रेस नेते व विरोधी पक्षनेते राहुल गांधी यांनी संसदेत भाजपवर निवडणूक आयोगाच्या संगनमताने मत चोरी केल्याचा गंभीर आरोप करताच, दिल्लीपासून मुंबईपर्यंत राजकीय तापमान उफाळून आलं. 7 ऑगस्टला पावसाळी अधिवेशनादरम्यान राहुल गांधींनी तब्बल 22 पानांचा, 1 तास 11 मिनिटांचा सादरीकरणासह चार्जशीट संसदेत मांडला. ज्यात महाराष्ट्रातील विधानसभा निवडणुकीत मोठ्या प्रमाणावर मत चोरीचे पुरावे असल्याचा दावा करण्यात आला.
सर्वांना घेतलं ताब्यात
राहुल गांधींच्या मते, मशीन रीडेबल मतदार यादी न देऊन आयोगाने थेट भाजपसाठी निवडणुका चोरल्या. या गंभीर आरोपांच्या पार्श्वभूमीवर 11 ऑगस्ट रोजी 300 विरोधी खासदारांनी संसदेतून निवडणूक आयोगाच्या कार्यालयापर्यंत भव्य मोर्चा काढला. राहुल गांधी, प्रियंका गांधी, अखिलेश यादव आणि इतर आघाडी नेत्यांच्या उपस्थितीने हा मोर्चा ऐतिहासिक ठरला. मात्र, वाहतूक भवनाजवळच हा मोर्चा रोखण्यात आला आणि सर्वांना पोलिसांनी ताब्यात घेतलं.
विजय वडेट्टीवार म्हणाले, काँग्रेससाठी ही केवळ राजकीय लढाई नाही, तर लोकशाहीच्या अस्तित्वाचा प्रश्न आहे. त्यांच्या भाषणात एक प्रकारची तलखी आणि तडफ होती जणू त्यांनी लोकशाहीवर येणाऱ्या सावल्यांना आव्हान दिलं. मत चोरांना सत्तेतून हाकलून लावल्याशिवाय हा लढा थांबणार नाही, असा इशाराही त्यांनी दिला.
दिल्लीतील आंदोलनाने एक गोष्ट स्पष्ट केली आहे, विरोधकांना रोखून लोकशाहीचे प्रश्न संपणार नाहीत. उलट अशा कृतींनी जनतेत असंतोष आणखी वाढणार आहे. विजय वडेट्टीवारांचा हा हल्लाबोल आता महाराष्ट्रात आणि देशभरात चर्चेचा विषय ठरला असून, पुढच्या काही दिवसांत या लढ्याला कोणते वळण मिळते याकडे संपूर्ण राजकीय वर्तुळाचे लक्ष लागले आहे.
