महाराष्ट्राच्या राजकीय आखाड्यात सध्या स्थानिक स्वराज्य संस्थांच्या निवडणुकींची रणधुमाळी सुरू आहे. अशातच आरोप-प्रत्यारोपांची मालिकाही सुरू आहे.
महाराष्ट्राच्या राजकीय आखाड्यात स्थानिक स्वराज्य संस्थांची निवडणूक जवळ येताच, वातावरण चांगलेच तापले आहे. 2024 विधानसभा निवडणुकीतील मतचोरीचे आरोप अद्याप थांबलेले नाहीत. काँग्रेसने भाजप आणि निवडणूक आयोगावर थेट बोट ठेवले होते. तर आता भाजपने महाविकास आघाडीवर (मविआ) पुरावे सादर करण्याची घोषणा करत पलटवार केला आहे. या राजकीय रणनीतीने राज्यातील वातावरण पुन्हा एकदा ढवळून निघाले आहे. काँग्रेस नेते विजय वडेट्टीवार यांनी भाजपला चांगलेच धारेवर धरले आहे. त्यांनी भाजपवर स्वतः राज्य उद्ध्वस्त करून मविआला दोष देण्याचा आरोप केला आहे. वडेट्टीवार यांनी भाजप नेते आशिष शेलार यांच्यावर थेट निशाणा साधला.
शेलार यांनी घेतलेल्या पत्रकार परिषदेवर प्रश्नचिन्ह उपस्थित करत त्यांनी म्हटले, आशिष शेलार निवडणूक आयोगाचे वकील म्हणून पत्रकार परिषद घेत आहेत का? यासोबतच त्यांनी मतचोरी प्रकरणी मविआने आधीच गाडीभर पुरावे सादर केल्याचा दावा केला. राजकीय नेत्यांच्या या शाब्दिक बाणांनी महाराष्ट्राच्या राजकारणात नव्याने रंग भरण्याची चिन्हे दिसत आहेत. विजय वडेट्टीवार यांनी महाविकास आघाडीच्या सत्य मोर्चावर दाखल गुन्ह्यांवरून महायुती सरकारवर हल्लाबोल केला. सत्याच्या मोर्चावर गुन्हे दाखल झाले, कारण सरकार घाबरले आहे, असे सणसणीत आरोप त्यांनी केले. गुन्हे दाखल केल्याने मोर्चे थांबणार नाहीत, असा इशारा देत त्यांनी सरकारची नियतच संशयास्पद असल्याचे म्हटले आहे.
विदर्भातील गंभीर चिंता
‘चोराच्या मनात चांदणं,’ अशा शब्दांत त्यांनी महायुतीवर टीका केली. जैन मुनींच्या उपोषणाचा मुद्दा गंभीर असल्याचे सांगताना त्यांनी सत्य लोकांसमोर आणण्याचा निर्धार व्यक्त केला. आम्हाला जेलमध्ये टाका, पण सत्य दडपले जाणार नाही, असे उद्गार त्यांनी काढले. वडेट्टीवार यांनी पुणे पोलिस आयुक्त अमितेश कुमार यांच्यावर नाव न घेता जोरदार टीका केली. जिथे हे आयुक्त जातात, तिथे गुन्हेगारी वाढते, असे म्हणत त्यांनी नागपूर आणि पुण्यातील परिस्थितीवर बोट ठेवले. पुण्यातील गुन्हेगारी वाढीमुळे पोलिस यंत्रणा हतबल असल्याचे त्यांनी म्हटले. सत्ताधाऱ्यांचा आश्रय गुन्हेगारांना मिळतो, तेव्हा पोलिस काय करणार? असा सवाल उपस्थित करत त्यांनी पोलिस यंत्रणेला सरळ करण्याची मागणी केली. याशिवाय, विदर्भातील वन्यप्राणी आणि मानव संघर्षावरही वडेट्टीवार यांनी चिंता व्यक्त केली.
चंद्रपूर-गडचिरोली परिसरात बिबट्याच्या हल्ल्यांमुळे दरवर्षी 40-50 लोकांचा जीव जातो, याकडे त्यांनी लक्ष वेधले. वन्यप्राण्यांचे संरक्षण महत्त्वाचे आहेच, पण माणसाच्या संरक्षणाची जबाबदारीही तितकीच आहे, असे म्हणत त्यांनी वन विभागाला जंगलाजवळील गावांमध्ये उपाययोजना करण्याची मागणी केली. संघर्ष वाढला की सरकार थातूर-मातूर कारवाई करते, पण पुनरावृत्ती थांबत नाही, अशी खंत त्यांनी व्यक्त केली. महाराष्ट्राच्या राजकारणातील ही आरोप-प्रत्यारोपांची लढाई आणि सामाजिक मुद्द्यांवरून होणारी चर्चा येत्या काळात आणखी तीव्र होण्याची शक्यता आहे. वडेट्टीवार यांच्या या आक्रमक भूमिकेने भाजपला कोंडीत पकडण्याचा प्रयत्न केला आहे, तर दुसरीकडे स्थानिक निवडणुकींचे रणशिंग फुंकले जात आहे. सत्य आणि राजकारण यांचा हा खेळ आता कुठे थांबणार, याकडे सर्वांचे लक्ष लागले आहे.
Ravi Rana : प्रहारच्या कार्यकर्त्याकडून मुंडके छाटण्याची धमकी
