सप्टेंबर 2023 मध्ये आलेल्या महापुराच्या जखमा अजूनही नागपूरच्या आठवणीत ताज्या आहेत. या पार्श्वभूमीवर अंबाझरी तलावाच्या मजबुतीकरणासाठी प्रशासन युद्धपातळीवर कामाला लागलं आहे.
नागपूरच्या अंबाझरी तलाव परिसरात सप्टेंबर 2023 मध्ये आलेल्या महापुरामुळे शहरात मोठ्या प्रमाणावर हानी झाली होती. या दुर्घटनेची पुनरावृत्ती टाळण्यासाठी आता प्रशासन पूर्ण सज्ज झालं आहे. या पार्श्वभूमीवर नागपूर विभागीय आयुक्त विजयलक्ष्मी बिदरी यांनी शनिवारी अंबाझरी तलाव परिसरातील सुरू असलेल्या मजबुतीकरणाच्या कामांचे प्रत्यक्ष पाहणी दौरा केला. यावेळी त्यांनी सर्व संबंधित अधिकाऱ्यांना 5 जूनपूर्वी सर्व कामे पूर्ण करण्याचे स्पष्ट आदेश दिले.
या दौर्‍यात मनपा आयुक्त डॉ. अभिजीत चौधरी यांच्यासह विविध शासकीय विभागांचे वरिष्ठ अधिकारी उपस्थित होते. विभागीय आयुक्त बिदरी यांच्या अध्यक्षतेखाली उच्च न्यायालयाच्या नागपूर खंडपीठाच्या आदेशांचे काटेकोर पालन करण्यासाठी एक उच्चस्तरीय समितीही स्थापन करण्यात आली आहे. या समितीमार्फत अंबाझरी तलावाच्या सुरक्षिततेसाठी आवश्यक उपाययोजना राबवण्यात येत आहेत. निरीक्षणाच्या वेळी विभागीय आयुक्तांनी अंबाझरी बांधाच्या पायथ्याशी गटारांचे पाणी वाहून नेणाऱ्या पुलाजवळ साचलेल्या मलब्याचे तातडीने हटवण्याचे निर्देश दिले. त्यांनी सांगितले की, पाइपलाइन स्थलांतरासाठी निविदा प्रक्रिया सुरू झाली असून, हे काम लवकरात लवकर पूर्ण करण्यात यावे.
मलबा हटविण्याचे निर्देश
तलावातील पाण्याचा सुरक्षित निचरा सुनिश्चित करण्यासाठी तयार करण्यात येणाऱ्या मुख्य दरवाज्याच्या कामाचे समिती सदस्यांनी निरीक्षण केले. दरवाजा लवकर सुरू व्हावा, असेही निर्देश देण्यात आले. तलाव परिसरात सुरू असलेल्या जलसंचयन प्रकल्पाचाही आढावा विभागीय आयुक्तांनी घेतला. मनपा आयुक्त डॉ. अभिजीत चौधरी यांनी देखील निर्देश दिले की, नाग नदीच्या काठावर सुरू असलेल्या बांधकामामध्ये निर्माण झालेला मलबा 5 जूनपर्यंत पूर्णतः हटवण्यात यावा. शहराच्या जल व्यवस्थापनाच्या दृष्टीने हे काम अत्यंत महत्त्वाचे असल्याचे त्यांनी अधोरेखित केले.
अंबाझरी तलावाच्या मजबुतीकरणाच्या कामांमुळे भविष्यातील आपत्ती धोके कमी होतील, अशी प्रशासनाची भूमिका आहे. शहरवासीयांच्या सुरक्षेसाठी घेतले जाणारे हे उपाय योजनांचे उदाहरण म्हणून पाहिले जात आहे. यामुळे तलाव आणि आसपासच्या परिसरातील पायाभूत सुविधा बळकट होतील, आणि पावसाळ्यातील संभाव्य धोकेही टाळता येतील. नागपूरसाठी ही एक सकारात्मक आणि दीर्घकालीन प्रभाव पाडणारी पावले असून प्रशासन आणि नागरिकांच्या सहकार्याने ही कामगिरी यशस्वी होईल, असा विश्वास व्यक्त करण्यात आला आहे.
