वाशिम नगरपरिषद निवडणुकीत भाजप कार्यकर्ते धनंजय घुगे यांनी उमेदवारी न मिळाल्यानंतरही कृतज्ञतेचा बॅनर लावून सर्वांचे लक्ष वेधले. त्याच वेळी लोहा नगरपरिषदेतील एका कुटुंबातील सहा उमेदवारांमुळे घराणेशाहीचा मुद्दा पुन्हा एकदा चर्चेत आला आहे.
वाशिमच्या नगरपरिषद निवडणुकीच्या वातावरणात एक अशी घटना समोर आली आहे. जी पारंपरिक राजकीय प्रतिक्रियांना पूर्णपणे उलथून टाकणारी ठरली. उमेदवारी न मिळाल्यानंतर मतभेद, पक्षांतर किंवा नाराजीचे सूर उमटलेले अनेकदा पाहायला मिळतात. पण या वेळी एका कार्यकर्त्याने रुसव्यांच्या चौकटी मोडत, अप्रतिम संयम आणि राजकीय संस्काराचे दर्शन घडवणारा मार्ग स्वीकारला. शहरातील प्रमुख चौकात झळकलेल्या त्यांच्या बॅनरने स्थानिक राजकारणात वेगळ्याच चर्चांना सुरुवात झाली आहे.
भाजपचे कार्यकर्ते धनंजय घुगे यांनी गेल्या दशकभरात विविध निवडणुकींसाठी पाच वेळा उमेदवारी मागितली होती. पण प्रत्येक वेळी पक्षाने वेगवेगळ्या कारणांमुळे त्यांची निवड टाळली. अनेकदा संधी न मिळाल्यास राजकीय कारकिर्द मार्ग बदलते. मात्र घुगे यांनी प्रसंगाला नकारात्मक न पाहता त्यातून एक नवा संदेशच उभा केला. त्यांनी आपल्या बॅनरमधून राजकारणातील स्वाभिमान आणि समर्पणाचे वेगळे परिमाण स्पष्ट केले.
एकनिष्ठतेचे प्रतिक
धनंजय घुगे यांच्या बॅनरवरील मजकूरात त्यांनी स्वतःला ‘स्वाभिमानी योद्धा, निष्ठावंत मावळा’ अशी ओळख देत, उमेदवारी पुन्हा कापल्याबद्दल पक्षातील निर्णयकर्त्यांचे आभार मानले आहेत. 2014, 2016, 2019 आणि 2024 मधील विधानसभा तसेच नगरपालिकेच्या निवडणुकीत उमेदवारी नाकारण्यात आली होती. आता पुन्हा उमेदवारी कापली गेल्यानंतरही त्यांनी पक्षाप्रती असलेली निष्ठा अबाधित असल्याचे सांगितले आहे. पदाची हाव नसल्याचे आणि सेवाभावातून राजकारणात राहण्याचे हे शांत भाषेत मांडलेले प्रतिपादन विशेष ठरले आहे. उमेदवारी नाकारल्यानंतर प्रभागात पक्षांतराच्या चर्चा सुरू झाल्याने स्वतःची भूमिका स्पष्ट करण्यासाठी त्यांनी हा बॅनर लावल्याचे त्यांनी सांगितले. आपल्या निर्णयामुळे कार्यकर्त्यांमध्ये आणि नागरिकांमध्ये कोणताही संभ्रम राहू नये, याची खबरदारी त्यांनी घेतली आहे.
दरम्यान, नांदेडच्या लोहा नगरपरिषदेत भाजपने एकाच कुटुंबातील तब्बल सहा सदस्यांना उमेदवारी दिल्याने राज्याच्या राजकारणात नवा वादंग उठला आहे. नगराध्यक्षपदापासून ते विविध नगरसेवकपदांपर्यंत सूर्यवंशी कुटुंबाची नामांकीत उपस्थिती चर्चेचा केंद्रबिंदू ठरली आहे. गजानन सूर्यवंशी, त्यांची पत्नी, भाऊ, वहिनी तसेच जवळचे नातेवाईक यांना मिळालेल्या उमेदवारकीमुळे सत्तेच्या समीकरणांवर आणि अंतर्गत गटबाजीवर नवे प्रश्न उभे राहिले आहेत. या दोन परस्परविरोधी घटनांनी स्थानिक पातळीवरील राजकारणात निष्ठा, नाराजी, घराणेशाही आणि संघटनात्मक निर्णयप्रक्रियेच्या विविध छटा पुन्हा एकदा उजेडात आणल्या आहेत.
