रुपेरी पडद्यावरील पछाडलेला या चित्रपटातील कथानकाप्रमाणे अकोला भाजपची अवस्था झाली आहे.
आपल्या अख्ख्या आयुष्यात महेश कोठारे यांनी ‘धडाकेबाज’ चित्रपटांची मालिका मराठी रसिकांसमोर सादर केली. कोठारे यांच्या चित्रपटातील कथानकाला शोभेल अशीच परिस्थिती सध्या अकोल्याच्या भारतीय जनता पार्टीची झाली आहे. महेश कोठारे यांचा ‘पछाडलेला’ चित्रपट अनेकांनी पाहिला असेल. त्यातील इनामदार भुसनाळे (दिलीप प्रभावळकर), त्याचा मुलगा बाब्या आणि मॅनेजर किरकरे (विजय चव्हाण) यांच्या प्रमाणे अहंकाराने पछाडलेल्या काहींनी सध्या अकोला भाजप खिळीखिळी केली आहे.
पछाडलेल्या चित्रपटातील इनामदार भुसनाळे यांचा मुलगा बाब्याचे लग्न होत नाही. त्यामुळे तो मेल्यानंतरही ‘बाबा लगीन.. ढिंच्यांक ढिंच्याक..’ करताना दिसतो. अकोला विधानसभेची निवडणूक पराभूत झाल्यानंतर सध्या असाच एक बाब्या अकोल्यात ‘साहेब आमदार..ढिंच्यांक ढिंच्याक..’ करत आहे. आपल्या आतापर्यंतच्या कर्मामुळे लोकांनी आपल्याला अक्षरश: नाकारले, याचा या बाब्याला विसर पडला. त्यामुळे हा बाब्या आता ‘सूड दुर्गे सूड’ असे म्हणत लोकांच्या मागे पळत सुटला आहे. आपल्या विरोधात काम करणाऱ्यांना हा बाब्या आणि त्याच्या सोबतीचा एक इनामदार भुसनाळे ‘डोळे बघ.. डोळे बघ..’ करीत घाबरवत सुटले आहे.
आम्ही धाडसी का?
अकोला भाजपमधील हा बाब्या आणि इनामदार भुसनाळे हे दोघेही प्रचंड अहंकारी. सूड उगवाणारे. आपल्या विरोधात कोणी जायला नको म्हणून यांनी अकोल्या भाजपचा एकेकाळचा राजवाडा भयाण करून टाकला. अहंकार आणि जातीवादाच्या भुताटकीने पछाडलेल्या बाब्या आणि इनामदाराने एक एक करीत सगळ्यांना वाड्यातून (भाजप) बाहेर काढले. आता हा बाब्या, इनामदार भुसनाळे त्यांचे चमचे असलेले अनेक मॅनेजर किरकिरेच सध्या वाड्यात उरले आहेत. आता वाडात भुतबंगला झाला म्हटल्यावर तिथे थांबणार तरी कोण? त्यामुळे अनेकांना गेल्या निवडणूक बाब्या, इनामदार आणि त्यांच्या किरकिऱ्यांना जागा दाखवून दिली.
‘द लोकहित लाइव्ह’ने चित्रपटातील वेताळे (मांत्रिक लक्ष्मीकांत बेर्डे) वेळोवेळी मंत्रोपचार करून या पछाडलेल्यांची बाधा उतरविण्याचा प्रयत्न केला. ‘द लोकहित लाइव्ह’ने आजपर्यंत जे लिहिले त्यापैकी एकाही वृत्ताचे लेखी खंडन करण्याचे धाडस यापैकी कोणीही दाखवू शकले नाही. त्याला कारणही तसेच आहे. जोपर्यंत ‘द लोकहित लाइव्ह’ ठोस ऑडीओ, व्हिडीओ किंवा लेखी पुरावे नसतात, तोपर्यंत ‘द लोकहित लाइव्ह’ एक शब्दही लिहित नाही ही ख्याती आहे.
विधानसभा निवडणूक जाहीर होण्याच्या अनेक महिन्यांपूर्वीच ‘द लोकहित लाइव्ह’ साजिद खान पठाण यांनाच काँग्रेसची उमेदवारी मिळणार हे ठामपणे लिहिले होते. तेव्हा निवडणुकीचा न देखील नव्हता. अगदी राहुल गांधी यांच्या कोर्टापर्यंत जेव्हा साजिद आणि झिशान यांचे नाव गेले. त्यादिवशीही ‘द लोकहित लाइव्ह’ने साजिद यांच्याच नावावर शिक्कामोर्तब होणार, हे छातीठोकपणे लिहिले होते. झालेही तसेच. ‘द लोकहित लाइव्ह’ने आजपर्यंत प्रकाशित केलेली कोणतीही बातमी खोटी ठरलेली नाही. जे लिहिले, ते जसेच्या तसे घडले आहे. अकोला भाजपबाबतही तसेच आहे. त्यामुळे आजपर्यंत ‘द लोकहित लाइव्ह’ने जे अकोला भाजपबाबत लिहिले त्याचा एक अक्षराचा लेखी जाहीर खुलासा कधीच भाजपकडून करण्यात आला नाही.
रवीभाऊ लक्ष द्या!!
बाब्या, इनामदार आणि त्यांचे किरकिरे आतापर्यंत आम्ही चंदूरभाऊंना अर्थात तत्कालीन प्रदेशाध्यक्ष चंद्रशेखर बावनकुळे यांना ‘सेट’ करून ठेवल्याचे छातीठोकपणे सांगत सुटले होते. आता चंदूभाऊ प्रदेशाध्यक्ष नाहीत. त्यांच्या जागी रवींद्र चव्हाण आले आहेत. यांनाही सेट करून टाकू, अशी भाषा मध्यंतरीच्या काळात अकोल्यात ऐकायला मिळत होती. आजही बाब्या, इनामदार आणि त्यांचे किरकिरे ‘सुडाची’ भाषा करीत आहेत. महापालिका, नगर परिषद, जिल्हा परिषद निवडणुकीत आम्हीच कोणाला तिकिट मिळणार हे ठरविणार आहोत, अशी धमकी आताही दिली जात आहे.
Akola BJP : प्रदेश, जिल्हा कार्यकारिणीतील मक्तेदारी निघावी मोडीत
लोकांकडे ही मंडही डोळे वटारून बघत आहे. ते सांगत असल्याप्रमाणे घडत असल्याने लोकांनाही चंदूभाऊंप्रमाणे रवीभाऊपण सेट झाले की काय? असे वाटत आहे. अर्थात चंदूभाऊ सेट झाले होते, हे देखीलच बाब्या आणि इनामदारांचे चमचेच सांगत सुटले होते. चंदूभाऊ काय किंवा रवीभाऊ काय, इतक्या खालच्या स्तराला लाऊन सेट होतील, यात आम्हाला तरी तथ्य वाटत नाही. पण रवीभाऊ तुम्हीच विचार करा, तुमचा वारंवार अपमान झाला असता तर तुम्ही तरी कुठे गेला असता का?
याचा विचार कराल
प्रदेशाध्यक्ष रवीभाऊ यांनी काही प्रश्नांवर विचार करणे गरजेचे आहे. या मुद्द्यांकडे पक्षश्रेष्ठींचे लक्ष वेधणेही गरजेचे आहे. उदाहरणार्थ भाजपचं रोपटे वटवृक्ष करताना तुम्ही दिवसरात्र एक केला रवीभाऊ. रक्ताचं पाणी केलं. जेव्हा पक्ष मोठा झाला तेव्हा अचानक एक बाब्या आणि इनामदार भुसानाळे येतात. त्यांचे मॅजेजर असलेले चमचे किरकिरे तुम्हाला डोळे दाखवू लागतात. तुमचा अपमान करू लागतात. मिसरूडही न फुटलेले त्यांचे पोरं तुम्हाला शहाणपणा शिकवू लागतात तेव्हा तुम्हाला कसं वाटलं असतं रवीभाऊ? आज आपण प्रदेशाध्यक्ष आहात. एअरपोर्टवरून तुम्हा खांद्यावर हात ठेऊन बाहेर आणलं ‘तुम्ही येथे अपेक्षित नाही’ असं सांगत अत्यंत इज्जतदारीनं बाहेर आणून सोडलं तर अशांच्या उंबरठ्यावर तुम्ही पुन्हा जाल का?
अकोल्यात असं झालं आहे. मूर्तिजापूरचे आमदार हरीश पिंपळे यांना रडवेपर्यंत उमेदवारीसाठी ताटकळत ठेवण्यात आलं आहे. अशी अनेक उदहारणे आहेत. त्यांचे तुम्हाला स्थानिक स्वराज्य संस्था निवडणुकीपूर्वी ऐकून घ्यावं लागणार आहे, रवीभाऊ. 15 नोव्हेंबरला नागपुरात बैठक आहे. या बैठकीत विदर्भातील नाराजांचे मन तुम्ही जाणून घेणार आहात, असं कळलं आहे. अकोला भाजपमध्ये लहानाचे मोठे झालेल्या आणि ज्यांच्या काळजाला पीळ पडली, त्यांचे घाव तुम्ही बघणार आहात का? अकोल्यातील काही जण हावरटासारखे पैसे कमाविण्याच्या मागे लागले आहे.
हेच ठरवणार सगळे
कोणाला कोणते कंत्राट मिळणार, बिल केव्हा निघणार हे सगळं बाब्या, इनामदार आणि किरकिरे ठरवत आहेत. त्यांच्या या सुडामुळे भाजपचा वाडा अंधारलेला, पछाडलेला होत चालला आहे. हा बंगला किधीही जमिनदोस्त होऊ शकतो. तो बंगला तुमचा आणि पक्षाचा आहे रवीभाऊ. आमचं त्यात काही नाही. हा बंगला पत्त्याच्या बंगल्याप्रमाणे कोसळू द्यायचा का? हा निर्णय तुम्हाला आणि पक्षश्रेष्ठींना घ्यायचा आहे रवीभाऊ. आमचं काय? आम्ही चुकले तर लिहितच राहणार. मग आमच्या लिखाणावर खुलासा देता येत नाही, म्हणून आम्हाला एखाद्या ग्रुपमधून बाहेर काढण्याशिवाय बाब्या, इनामदार आणि किरकिरे काहीच करू शकत नाही.
समजा कोंबडे झाकून ठेवलं तर सूर्य उगवण्यावाचून राहणार आहे का? नाही ना! तसंच आमच्या बाबतीत आहे. एका ग्रुपमधून काढलं म्हणून लोक वाचणं बंद करत नसतात, हे या अहंकाराने पछाडलेल्यांना कोण सांगणार? तुमचं लग्न भसकलं हे तुमच्या कर्मामुळे. त्यात कुणाचा काय दोष? तुम्ही लोकांना अपमानाने वागवाल आणि त्यांनी गुलामगिरी केली पाहिजे, अशी अपेक्षा ठेवाल, तर मोगलाई थोडी लागली आहे. ‘पब्लिक सब जानती है’. शेवटी तुमचे कर्म आडवे येतात, हे सत्य आहे.
बोटावर मोजण्याइतके उरले
सध्या अकोला भाजपमध्ये बोटावर मोजण्याइतके लोक शिल्लक राहिले आहे. विधानसभा निवडणुकीत याचा प्रत्यय स्थानिकांना आणि पक्षा आला आहे रवीभाऊ. अक्षरश: लोकांच्या पाया पडायची वेळ आली होती. हे सत्य नाकारून चालणार नाही. आता तुम्हीच सांगा रवीभाऊ चार-दोन लोकांच्या भरवश्यावर पक्ष चालतो का हो? किती दिवस तुम्हीही त्याच त्या लोकांचे ऐकत बसणार? नाण्याची दुसरी बाजू कधी तरी तपासावीच लागेल ना? ती तपासण्याचे धाडस कोणाला तरी करावेच लागेल ना? तो पुढाकार मग तुम्ही का घेत नाही? राष्ट्रीय स्वयंसेवक संघ आणि भाजपमधील निष्ठावंतांच्या भावनांचा सन्मानपूर्वक स्वीकार का करत नाही, हा कळकळीचा प्रश्न आहे.
तुम्ही क्रिकेट, फूटबॉल वैगरे पाहता का हो रवीभाऊ? बघतच असाल. खेळ कोणताही असो त्यात टीमवर्क, टीम स्पीरीटला महत्व आहे. अहंकारी बाबा, इनामदार भुसनाळे आणि किरकिरे टीमध्ये घुसले की, खेळाच्या सत्यानाश होतो. मग टीमला वाचविण्याचा निर्णय कोणी घ्यायचा असतो. कोच आणि टीम व्यवस्थापकानेच ना? असं म्हणतात की आजकाल खेळांच्या टीमध्येही पैसे देऊन घुसता येते. मग तिथे राजकारणाची काय बिछाद.
धनशक्ती की कार्यकर्ता
कादर खान यांचा एक चित्रपट जुन्या काळात खुप गाजला. त्यातील एक गाणं खुप मार्मिक आहे. ‘ठन ठन की सुनो झंकार. ये दुनिया है काला बाजार. ये पैसा बोलता है.’ पैशांशिवाय या जगात काहीच होऊ शकत नाही, हे खरे आहे. पण आमचा पक्ष वेगळा आहे. आमच्याकडे कार्यकर्ता ही आमची शक्ती आहे, असे भाजपमध्ये सांगितले जाते. मग आता निर्णय तुम्हाला आणि पक्षश्रेष्ठींनाच घ्यायचा आहे? सुडाने पेटलेले बाब्या, भुसनाळे, किरकिरे ठेवायचे की प्रमाणिकपणे काम करणारे लोकं?
भुतबंगल्याला पुन्हा वैभवशाली राजवाडा करायचं असेल तर तुम्हाला ‘दुर्गा मावशी’ बनावेच लागेल रवीभाऊ. नाहीतच आज तुमच्या घराच्या ‘पश्चिम’ दिशेची भिंत कोसळली. उद्या अख्खं घर नको जायला. शेवटी कळकळीने एकच सारे कार्यकर्ते एकच सांगत आहेत. वेळीच सावरा. अहंकाराच्या उद्वेगाला आवरा. बाकी तुमची आणि पक्षश्रेष्ठींची इच्छा. शेवटी पक्ष तुमचा. बाब्याही तुमचा. इनामदार भुसनाळेही तुमचा अन् किरकिरेही.
