राजकारणाच्या रणांगणात स्थानिक निवडणुकीचा धुराळा उडाला आहे. विरोधी पक्षाचे नेते सातत्याने यंदाची निवडणूक बॅलेट पेपरवर घेण्याची मागणी करताना दिसत आहेत.
आगामी स्थानिक स्वराज्य संस्थांच्या निवडणुकींपूर्वी विरोधकांचा निर्वाचन आयोगाविरुद्ध जोरदार लढा सुरू आहे. महाविकास आघाडी, मनसेसह इतर विरोधी पक्षांच्या शिष्टमंडळाने 15 ऑक्टोबरला पुन्हा राज्य निवडणूक आयुक्त आणि मुख्य अधिकाऱ्यांसोबत बैठक घेतली. या बैठकीत बॅलेट पेपरवर मतदानाची मागणी जोर धरली. पण या वातावरणात राज ठाकरे आणि महाविकास आघाडीची युती होणार का, हा प्रश्न सर्वांच्या मनात सुरू आहे. उद्धव ठाकरे आणि राज ठाकरे यांनी नुकतीच हात मिळवणी केली आहे. आता महाविकास आघाडीत मनसेला घेण्याच्या चर्चांना उधाण आले असतांना, मनसेच्या एका नेत्याच्या कृत्याने या चर्चांना पूर्णविराम लागेल अशी देखील चर्चा आहे.
यवतमाळमधील मनसे नेते राजू उंबरकर यांच्या गुन्हेगारी कारवायांमुळे महाविकास आघाडी मनसेला सोबत घेण्यास नकार देऊ शकते, अशी चर्चा रंगली आहे. यवतमाळ जिल्ह्यातील विदर्भातील मनसेचे एकमेव प्रमुख नेते राजू उंबरकर यांचा अटकपूर्व जामीन अखेर फेटाळण्यात आला. त्यांच्या विरुद्ध खंडणी वसुली आणि कामगारांना मारहाणीचे गंभीर गुन्हे दाखल आहेत. गेल्या काही दिवसांपासून फरार असलेल्या उंबरकर यांच्या अडचणीत आता वाढ झाली आहे. वणी तालुक्यातील एका रस्ता बांधकाम कंत्राटदाराकडून उंबरकरने दीड कोटी रुपयांची खंडणी मागितली होती. नकार मिळताच त्यांनी कंत्राटदाराच्या कामगारांना बेदम मारहाण केली. प्लांट बंद पाडला आणि खंडणी दिली नाही तर वणीत पायही ठेवू देणार नाही अशा धमक्या दिल्या.
अटकपूर्व जामीन फेटाळली
तक्रारीवर वणी पोलिसांनी गुन्हा दाखल केला. ज्यानंतर उंबरकर फरार झाले. न्यायालयात अटकपूर्व जामीनासाठी अर्ज केलाही, पण तो नाकारला गेला. उंबरकर हा मनसेचा विदर्भातील चेहरा आहे. त्यांनी दोन वेळा विधानसभा निवडणूक लढविली, पण पराभव स्वीकारावा लागला. प्रत्येक वेळी राज ठाकरे यांनी त्यांच्यासाठी जाहीर सभा घेतल्या. विधानसभा निवडणुकीआधी राज ठाकरेंनी विदर्भात पक्ष संघटनेत मोठे बदल केले. जुन्या कार्यकर्त्यांना बाजूला सारले आणि नव्या चेहऱ्यांना प्रोत्साहन दिले. उंबरकर यांना नेतेपदाची पदोन्नती मिळाली. राज ठाकरे स्वतः उंबरकरांच्या घरी भोजन करायला गेले. ज्यामुळे जिल्ह्यात त्यांचा दबदबा वाढला. उंबरकर यांचे भाऊ कंत्राटदार असल्याने, ते पदाचा गैरवापर करून कंत्राटे मिळवून देत असे.
फरार असताना नागपूरमध्ये लपून बसले. तेथील एका पदाधिकाऱ्याच्या हॉटेलमध्ये राहिले. राजकीय संबंधांचा आधार घेऊन अटक टाळण्याचा प्रयत्न केला, पण अपयशी ठरले. सध्या ग्रामीण भागात महापालिका, जिल्हा परिषद आणि पंचायत समितीच्या निवडणुकींचे वारे वाहत आहेत. मनसे आणि शिवसेना (उद्धव गट) जवळ येत आहेत. महाविकास आघाडीत मनसेला घेण्याच्या चर्चा सुरू आहेत. काँग्रेसने अद्याप स्पष्ट भूमिका घेतलेली नाही. मात्र, उंबरकरच्या या कारनाम्यांमुळे यवतमाळ जिल्ह्यात मनसेला सोबत घेण्यास मजबूत विरोध होत आहे. एका नेत्याच्या चुकीमुळे संपूर्ण पक्षाच्या युतीच्या आशांना धक्का बसला आहे. हे प्रकरण मनसेसाठी धोक्याची घंटा ठरले आहे. तर महाविकास आघाडीला स्थानिक निवडणुकीत नव्या जोड्यांची गरज असताना अडथळा निर्माण झाला आहे. राजकारणातील हे वळण कसे बदलेल, याकडे सर्वांच्या नजरा आहेत.
