चंद्रपूरसह महाराष्ट्रभरात बनावट शालार्थ ओळखपत्रांच्या आधारे 1 हजार 56 बोगस शिक्षकांची फसवणूक उघडकीस आली आहे. सायबर पोलिसांनी आतापर्यंत 17 आरोपींना अटक केली आहे.
नागपूर आणि संपूर्ण महाराष्ट्रातील शैक्षणिक मंडळात भासलेली विश्वासार्हता आता गंभीर संकटात सापडली आहे. बनावट ओळखपत्रांच्या जोरावर राज्यभरातील शाळांमध्ये 1 हजार 56 पेक्षा जास्त बोगस शिक्षकांनी नोकऱ्या मिळवल्या आहेत, अशी धक्कादायक माहिती समोर आली आहे. ही फसवणूक केवळ नियुक्तीपुरती मर्यादित न राहता, या शिक्षकांच्या पगारातून टक्केवारी वसूल करणाऱ्या व्यापक भ्रष्टाचार साखळीसाठी कारणीभूत ठरली आहे. चंद्रपूर जिल्ह्यातही हा घोटाळा आता उग्र रुप घेत आहे. बनावट कागदपत्रांवर आधारित 22 शिक्षकांच्या नियुक्तीची तक्रार करण्यात आली आहे. यामुळे शैक्षणिक विश्वात घडणाऱ्या या भ्रष्टाचाराच्या प्रकरणाला गंभीर वळण मिळाले आहे.
आमदार सुधाकर अडबाले यांनी विधान परिषदेत या प्रकरणावर आवाज उठवून राज्य सरकारकडे कठोर कारवाईची मागणी केली. त्यांच्या सूचनेनुसार सरकारने एसआयटीची स्थापना करून तपास सुरू केला आहे. योग्य पद्धतीने चौकशी होत असल्याचे सांगण्यात येत आहे. मात्र, या प्रकरणाचा फक्त नागपूरपुरता नाही तर राज्यव्यापी आढावा घेण्याची गरज असल्याचे अनेकांनी व्यक्त केले आहे. नागपूर सायबर पोलिसांनी या घोटाळ्यात सहभागी दोन महत्त्वाच्या आरोपींना अटक केली आहे.
Chandrashekhar Bawankule : योजना कागदावर नाही, प्रत्यक्षात दिसल्या पाहिजे
एसआयटीची चौकशी सुरू
सिद्धेश्वर श्रीराम काळुसे आणि रोहिणी विठोबा कुंभार या आरोपींवर लवकरात लवकर कठोर कारवाई होण्याची गरज आहे, असा दबाव निर्माण झाला आहे. या कारवाईमुळे बनावट शिक्षक आणि शिक्षकेतर कर्मचाऱ्यांना पगार देण्याच्या या भडकल्या साखळीत महत्त्वाचा फटका बसला आहे. विभागीय शिक्षण उपसंचालक कार्यालयाचे कनिष्ठ प्रशासन अधिकारी रवींद्र प्रज्ञानेश्वर पाटील यांच्या तक्रारीवरून सायबर पोलिसांनी गुन्हा नोंदविला. सायबर पोलिसांच्या विशेष तपास पथकाने तपास सुरू केला आहे. आतापर्यंत शिक्षण विभागातील अधिकारी, लिपिक, शाळा मुख्याध्यापक, ऑपरेटर आणि शिक्षकांसह एकूण 17 आरोपींना अटक करण्यात आली आहे.
30 जुलै रोजी या आरोपींना न्यायालयात हजर केल्यावर दंडाधिकारी न्यायालय क्रमांक 6 त्यांना न्यायालयीन कोठडी सुनावली. मात्र, एसआयटीने हा आदेश रद्द करण्यासाठी जिल्हा व सत्र न्यायालयात पुनर्विचार याचिका दाखल केली. ज्यावर 4 ऑगस्ट 2025 रोजी न्यायालयाने दोन्ही आरोपींना 7 ऑगस्टपर्यंत पोलिस कोठडीत ठेवण्याचे आदेश दिले आहेत. सायबर पोलिस या आरोपींची 5 ऑगस्ट रोजी मध्यवर्ती कारागृहातून चौकशी करणार आहेत. एसआयटीने या प्रकरणात अद्याप महत्त्वाची माहिती मिळवली असून, पुढील कठोर कारवाईची तयारी सुरू आहे. या भ्रष्टाचाराने महाराष्ट्राच्या शिक्षण व्यवस्थेचा पाया खळबळून गेला आहे. यावर योग्य ती कारवाई होणे अत्यंत आवश्यक आहे.
Prashant Padole : जोडले जाताहेत धागे दिल्लीपासून भंडाऱ्यापर्यंत
