भंडाऱ्यात सध्या राजकारणात मोठी हालचाल सुरू आहे. एका कार्यकर्त्याच्या पक्षप्रवेशानंतर एका अधिकाऱ्याची अडचण वाढल्याचं दिसत आहे.
भंडाऱ्यात सध्या राजकीय तापमान उसळले आहे. स्थानिक स्वराज्य संस्थांच्या निवडणुकीच्या रणधुमाळीचा आरंभ होताच राजकीय समीकरणांचा ताण वाढू लागला आहे. पक्षनिष्ठा बदलण्याचे आणि नव्या शक्तिकेंद्रांच्या उदयाचे दिवस आले आहेत. नेते, कार्यकर्ते आणि त्यांच्या मागे उभ्या असलेल्या संघटनांमध्ये हालचाली सुरू आहेत. प्रत्येक पक्ष आपला पक्ष मजबूत करण्याच्या तयारीत आहे. जिल्ह्यातील राजकीय वर्तुळात हलकल्लोळ माजला आहे. या सर्व राजकीय रंगमंचाच्या मागच्या पडद्यावर एक वेगळीच नाट्यकथा रचली गेली आहे. जिथे वर्चस्वाच्या खेळात एका अधिकाऱ्याचाच ‘करंट’ उडाला आहे.
अलीकडेच एका प्रभावशाली कार्यकर्त्याने भाजपमध्ये प्रवेश करून स्थानिक राजकारणाला एक नवीन कलाटणी दिली. त्याच्या या पावलाने भंडाऱ्याच्या राजकीय गणितात बदल घडवला. मात्र, या प्रवेशामागे अनपेक्षितरीत्या एका अधिकाऱ्याची अडचण वाढली आहे. या कार्यकर्त्याला साथ देणाऱ्या अधिकाऱ्याच्या नशिबाचा तारा अचानक मंदावला. कारण, त्याच्या या सहभागामुळे एका मोठ्या नेत्याचा संताप उसळला. या नेत्याने नगरपरिषद मुख्याधिकाऱ्याला झापून, आपल्या असंतोषाचा स्फोट केला. परिणामी, राजकीय तणावाचा फटका थेट प्रशासनावर बसला आहे.
नेत्यांच्या संघर्षात अधिकारी
संघर्षात फसलेल्या या अधिकाऱ्याची स्थिती ‘धो-धो पावसात कोरडा’ अशी झाली आहे. एका नेत्याचा राग, तर दुसऱ्याचा दबाव अशा दोन टोकांमध्ये हा अधिकारी सापडला आहे. राजकीय संरक्षण मिळाले नाही, तर स्थानांतराचे ‘गिफ्ट’ दिवाळीपूर्वीच हातात येईल, अशी चर्चा जिल्ह्यात रंगली आहे. या अचानक येऊ घातलेल्या बदलीच्या वाऱ्यामुळे अधिकाऱ्याची गडबड सुरू आहे. या वादात आणखी गमतीदार म्हणजे, ज्याच्या पक्षप्रवेशामुळे वादाची ठिणगी पेटली. त्या कार्यकर्त्याला एका प्रभावशाली नेत्याचा वरदहस्त लाभला आहे. त्यामुळे तो आपल्या नव्या राजकीय छत्रछायेखाली सुरक्षित राहण्याचा प्रयत्न करत आहे. त्याच्याशी संबंधित अधिकारी मात्र अडचणीच्या भोवऱ्यात अडकला आहे. जिल्ह्यातील चर्चांमध्ये सध्या या अधिकाऱ्याची अवस्था ‘ना घर का ना घाट का’ अशी झाल्याचं बोललं जात आहे. या सर्व घडामोडी पाहता हा अधिकारी, आता दोघांच्या मधात नको रे बाबा, असेच म्हणत असल्याचे दिसत आहे.
भंडाऱ्याच्या या राजकीय सारीपाटात सत्ता, सत्ताभुकेची शर्यत आणि स्थानिक राजकीय अहंकार यांचा संगम दिसत आहे. एकीकडे नव्या कार्यकर्त्याच्या प्रवेशामुळे पक्षाला गती मिळत आहे तर दुसरीकडे जुन्या नेत्यांच्या मनातली अस्वस्थता वाढली आहे. या आपसी संघर्षात अडकलेल्या अधिकाऱ्याचा ‘करंट’ उडू नये, यासाठी तो जसेतसे संतुलन राखत आहे. दरम्यान एवढ्या मोठ्या सारीपाटाचा उपभोग घेत असताना दोघांच्या मधात फसल्याने या अधिकाऱ्याला ‘सुखापासून मुकावे लागेल’ असा काहीसा प्रकार लवकरच जिल्ह्यात पहायला मिळणार आहे. भंडाऱ्यातील या घडामोडी दाखवतात की राजकारणातील प्रत्येक चाल, प्रत्येक पक्षप्रवेश हा प्रशासनिक समीकरणांनाही हादरवून टाकणारा ठरतो. या साऱ्या गदारोळात, एक अधिकारी न बोलता, न हलता, सत्तेच्या दोन्ही ध्रुवांमध्ये तग धरून राहण्याचा प्रयत्न करत आहे. फक्त स्वतःचा ‘करंट’ उडू नये म्हणून.
