Political Controversy : दादांचा वाद, पुतण्याचा आधार, राष्ट्रवादीत गोंधळ अपार

सोलापूरच्या मुरूम प्रकरणातील व्हिडीओवरून उपमुख्यमंत्री अजित पवारांवर टीका होत असताना, आमदार रोहित पवारांनी काकांचा बचाव करत सोशल मीडियावर पोस्ट केली.

सोलापूरच्या माढा तालुक्यातील अवैध मुरूम उत्खनन प्रकरणाने महाराष्ट्राच्या राजकारणात खळबळ माजवली आहे. उपमुख्यमंत्री अजित पवार यांचा महिला आयपीएस अधिकाऱ्यांशी झालेल्या तिखट संवादाचा व्हिडीओ व्हायरल झाल्याने विरोधकांनी त्यांना चांगलेच धारेवर धरले. या वादाच्या भोवऱ्यात अजित पवार यांच्या बचावासाठी त्यांचे पुतणे तथा विरोधी पक्षनेते आमदार रोहित पवार मैदानात उतरले आहेत. रोहित यांनी सोशल मीडियावर एक सणसणीत पोस्ट टाकत काकांचे समर्थन केले. पण त्याचवेळी मित्रपक्षांवर आणि पक्षातील अंतर्गत कुरघोडी करणाऱ्या नेत्यांवरही जोरदार टीकास्त्र सोडले. या सगळ्या नाट्यमय घडामोडींवर वंचित बहुजन आघाडीचे नेते प्रकाश आंबेडकर यांनी आपल्या खास शैलीत टिप्पणी करत रोहित पवारांना टोला लगावला आहे.

रोहित पवार यांनी आपल्या पोस्टमध्ये कुर्डुवाडी प्रकरणात अजित पवार यांच्या हिंदी भाषेच्या आणि बोलण्याच्या शैलीमुळे गैरसमज निर्माण झाल्याचा दावा केला. अजितदादांनी दिलगिरी व्यक्त केली असतानाही मित्रपक्ष आणि काही ज्येष्ठ नेते जाणीवपूर्वक मीडिया ट्रायल घडवत असल्याचा आरोप त्यांनी केला. विशेष म्हणजे, रोहित यांनी पक्षातील दोन-तीन क्रमांकाच्या नेत्यांवर स्वहितासाठी कुरघोडीचे राजकारण करत असल्याचा थेट हल्ला चढवला. पक्षात चहापेक्षा किटली जास्त गरम असणारे सहकारी असतील, तर आमदार सोबत असूनही सर्व काही आलबेल नसते, असा खोचक टोला त्यांनी लगावला. या पोस्टमुळे राजकीय वर्तुळात खळबळ उडाली आहे. या प्रकरणात प्रकाश आंबेडकर यांनी आपल्या नेहमीच्या बेधडक शैलीत प्रवेश केला. त्यांनी रोहित पवार यांच्या भूमिकेवर प्रश्नचिन्ह उपस्थित करत, अजित पवार यांच्यावरील प्रेमाचा उलगडा केला.

Shashikant Shinde : अफवा फेटाळत पक्षशिस्तीवर भर

पार्टीतील अंतर्गत कुरघोडी

रोहित पवारांना अजितदादांचा इतका पुळका कसा? सोलापुरात महिला आयपीएस अधिकाऱ्यावर दबाव टाकला, तरी अजितदादांना बोलायचे नाही? असा खरमरीत सवाल आंबेडकर यांनी उपस्थित केला. त्यांनी पुढे म्हटले की, अजित पवार यांनी काही वर्षांपूर्वी बारामतीत मतदान दिले नाही, तर गावाचे पाणी बंद करू असे वक्तव्य केले होते. तेही फक्त हिंदीच्या टोनमुळे झाले असेल का? आंबेडकर यांनी रोहित यांच्या आजोबांच्या पावलावर पाऊल ठेवण्याच्या शैलीवरही टिप्पणी केली. एक टीम भाजपसोबत, एक टीम बाहेर, पण दोन्ही राष्ट्रवादी एकच असा टोमणा मारत राजकीय समीकरणांचा पर्दाफाश केला. आंबेडकर यांनी या प्रकरणाला व्यापक सामाजिक संदर्भ देत, शेतकऱ्यांचे प्रश्न, युवकांच्या समस्या आणि महिला सुरक्षेच्या मुद्द्यांवर लक्ष केंद्रित करण्याचा सल्ला दिला.

पवार यांनी मित्रपक्षांच्या या मीडिया ट्रायलला नको त्या गोष्टींची सिलेक्टिव्ह चर्चा असे संबोधत, सरकारने भ्रष्टाचार आणि जनतेच्या खऱ्या समस्यांवर लक्ष द्यावे, अशी अपेक्षा व्यक्त केली. त्यांच्या या टिप्पणीने वादाला नवे वळण मिळाले आहे. रोहित पवार यांच्या पोस्टने सोशल मीडियावर खळबळ माजवली असली, तरी यातून अंतर्गत राजकारण आणि पक्षातील कुरघोडीचे दर्शन घडते. कुर्डुवाडी प्रकरणात महिला आयपीएस अधिकाऱ्यांनी घेतलेली भूमिका योग्य होती, यावर रोहित यांनीही शिक्कामोर्तब केले. पण अजित पवार यांच्या हिंदी भाषेच्या टोनमुळे गैरसमज झाल्याचा त्यांचा दावा कितपत खरा, यावर प्रश्नचिन्ह कायम आहे. दरम्यान, प्रकाश आंबेडकर यांनी या प्रकरणाला वेगळीच उंची देत, राजकीय पक्षांच्या एकजुटीवर आणि अंतर्गत खेळींवर बोट ठेवले. त्यांच्या टिप्पणीने हे प्रकरण केवळ अजित पवार आणि रोहित पवार यांच्यापुरते मर्यादित न राहता, महाराष्ट्राच्या राजकारणातील मोठ्या चित्रावर प्रकाश टाकला आहे.

Nana Patole : माजी प्रदेशाध्यक्षांना झटका; नुकसान भरपाई नाही

शंकर मोहनकर | Shankar Mohankar

शंकर यांनी नागपुरातील धनवटे नॅशनल कॉलेजमधून पत्रकारिता व जनसंज्ञापन विषयात पदवी शिक्षण पूर्ण केले आहे. 2023-24 मध्ये शिक्षण पूर्ण केल्यानंतर त्यांनी द लोकहित लाइव्ह येथे आपल्या करीअरला सुरुवात केली.

More Posts