पुतळ्या जाळण्यापर्यंत पोहोचलेला विरोध आता अकोला शिवसेनेत मनोमिलनाच्या वाट्यावर आला आहे.
अकोल्यात महापालिकेची निवडणूक लवकरच होणार आहे. या निवडणुकीपूर्वी अकोल्यातील शिवसेना एकनाथ शिंदे गटात गोडव्याचे मनोमिलन झाले आहे. पुतळा जाळण्यापर्यंत गेलेले प्रकरण अचानक शांत झाले आहे. उपमुख्यमंत्री एकनाथ शिंदे आणि खासदार डॉ. श्रीकांत शिंदे यांनी अशा ‘फायर ब्रिगेड’चा वापर केला की, सगळे काही गोडव्यात रुपांतरीत झाले. शिवसेनेचे संपर्क नेते माजी आमदार गोपीकिशन बाजोरिया यांच्यापासून सुरू झालेला हा वणवा आहे.
माजी आमदार गोपीकिशन बाजोरिया यांनी मनमानी सुरू केली होती, असा आरोप त्यांच्या वर होता. त्यामुळे अकोला शिवसेनेत त्यांना विरोध सुरू झाला. मिळणारा सगळा निधी बाजोरिया यांनी आपल्या ले-आऊच्या कामांमध्ये वापरल्याचा सेनेतील काही नेत्यांचा आरोप होता. त्यामुळे बाजोरिया यांना अकोल्याच्या शिवसेनेतून विरोध सुरू झाला. विरोध इतका विकोपाला गेला की, त्यांचा पुतळाही जाळण्यात आला. अशातच बाजोरिया यांनी भाजपमधून नारायणराव गव्हाणकर आणि चंद्रशेखर पांडे यांना ‘इम्पोर्ट’ केले. त्यामुळे छटाकभराच्या जिल्ह्यात चार जिल्हा प्रमुख शिवसेनेला मिळाले.
Akola Shiv Sena : स्थानिक स्वराज्य संस्था निवडणुकीपूर्वी नेत्यांचे मनोमिलन
‘मिसराजी नहीं ना आए’
गव्हाणकर आणि पांडे यांना आणल्यानंतर बाजोरिया यांनी आणखी एक पत्ता बाहेर काढण्याचा प्रयत्न केला. शिवसेना उद्धव ठाकरे गटाचे शहर प्रमुख राजेश मिश्रा हा तो हुकुमाचा एक्का. मिश्रा आणि बाजोरिया यांचे संबंध मधूर आहेत. त्यामुळे मिश्रांसोबत ‘मिले सूर मेरा तुम्हारा’ हे समीकरण करण्याचा बाजोरिया यांनी प्रयत्न केला. पण शिंदे गटातून ‘मिसराजींना’ प्रचंड विरोध झाला. भाजपलाही राजूभय्या सोबत नको आहेत. त्यामुळे त्यांनीही सेठजींच्या विरोधात मोहिम उघडली. अनेक दिवसांपर्यंत अकोल्याच्या शिवसेनेत ही धुसफूस सुरू होती. उठसूठ प्रत्येक जण एकनाथ शिंदे आणि डॉक्टरांना भेटायला जात होता.
बाजोरियांच्या ‘फेव्हरेबल’ मुंबईतील अनेक आकांचीही तक्रार झाली. त्यांच्या विरोधात ‘लेनदेन’चे आरोपही झालेत. त्यामुळं साहेबांनी प्रकरण गंभीरतेने घेतले. अकोल्यात शिवसेनेत लागलेली आग विझविण्यासाठी शिंदे पितापुत्रांनी ‘फायर एक्सटिंग्विशर’चा जोरदार फवारा मारला. त्यामुळे बाजोरियांच्या यांच्या विरोधात आणि त्यांच्या बाजूने ‘उछलकुद’ करणारे सगळेच शांत झालेत. शेजारच्या बुलढाणा जिल्ह्यातून मंत्री प्रतापराव काकांना अकोल्यात लक्ष घालण्याची सूचना करण्यात आली. बाजोरिया यांना सेठ यांनाही कळून गेले की, काही खरे नाही.
Akola Shiv Sena : अकोल्याची सूत्रं ‘काकां’कडे की थेट मुंबईत?
जाणार कुठे?
सद्य:स्थितीत दिल्ली काय अन् अकोल्याच्या गल्लीत काय महायुतीशिवाय पर्यायच शिल्लक राहिलेला नाही. केंद्रात आणि राज्यात सरकार महायुतीचे. त्यामुळे काँग्रेस, राष्ट्रवादी काँग्रेस शरद पवार गट. शिवसेना उद्धव ठाकरे गटात जाऊन काहीच फायदा नाही. अकोल्यातील बाळापूरचे आमदार नितीन देशमुख घसा कोरडा पडेपर्यंत ओरडत आहेत. निधी देत नाही, कामं होऊ देत नाही, असा त्यांचा आरोप आहे. पण फायदा काहीच झाला नाही. अकोला पश्चिममध्ये काँग्रेसचे आमदार साजिद खान पठाण आहे. राज्यात त्यांच्या विरोधातील पक्षाची सरकार आहे. त्यामुळे खान यांची परिस्थितीही निधीच्या बाबतीत ‘खान की सरकार कर रही दाणादाण’ अशी आहे.
पहिल्यांदाच आमदार झाल्याने खान यांना यंदा सगळ्यांची दिवाळी दणक्यात करायची होती. पण खिसा परवानगी देत नव्हता. आता देशात आणि राज्यात काँग्रेसची परिस्थिती अशी आहे की, त्यांना सभेतील खुर्च्यांव क्युआर कोड लाऊन पक्षासाठी ‘कुणी निधी देता का निधी’ असा ‘हात’ पसरण्याची वेळ आली आहे. प्रत्येक आघाडीवर राहुल गांधी खोटे ठरत आहेत. राहुल गांधी यांचा चेहरा निवडणूक जिंकवून देऊ शकत नाही, हे काँग्रेसच्या लक्षात आले आहे. उद्धव ठाकरे यांची आघाडी भाजपने केव्हाच उलथवून टाकली आहे. त्यामुळे आता भाजप, शिवसेना शिंदे गट, राष्ट्रवादी काँग्रेस अजिददादा गटाशिवाय कुठेच जाऊन फायदा नाही, हे सगळ्यांनाच कळले आहे.
चौफेर नुकसान
अति केली तर पक्षातून बाहेरचा रस्ता दिसू शकतो, हे शिवसेना शिंदे गटात सगळ्यांनाच लक्षात आले. त्यामुळे सध्या अकोल्यातील शिवसेनेत फेसासारखे वर आलेले बंड थंड झाले आहे. सगळे शांत झाले आहेत. सेठजींच्या विरोधातील आणि सेठजींच्या गटातील असे सगळेच. आता हे सगळे ’हम साथ साथ है’ म्हणत अकोला महापालिकेच्या निवडणुकीसाठी कामाला लागले आहेत. मात्र संपूर्ण महापालिका काबिज करता येईल, इतके सक्षम चेहरे शिवसेनेजवळ आहेत, असे चित्र नाही. बोटावर मोजण्याइतके चेहरे सेनेकडे आहेत.
नागपुरात लवकरच भाजप प्रदेशाध्यक्ष रवींद्र चव्हाण बैठक घेणार आहेत. या बैठकीत नारायणराव गव्हाणकर, चंद्रशेखर पांडे यांच्यासह सर्व नाराजांना परत घेण्याचा गंभीर विचार होणार आहे. अशात गव्हाणकर, पांडे यांची घरवापसी झाली तर पुन्हा शिवसेनेत जुन्या नेत्यांना ‘अच्छे दिन’ येतील. त्यामुळे गव्हाणकर आणि पांडे यांच्या आयुष्यात पुन्हा ‘कमळ’ फुलावे अशी प्रार्थना सेनेतील नेतेही करीत आहेत. प्रत्येक घरात वादविवाद होत असतात. पक्षांतर्गत मतभेद ही ‘कहानी घर घर की’ झाले आहे. मात्र शिंदे पितापुत्रांनी या वादांवर तोडगा काढत अकोल्याच्या शिवसेनेत नवीन ‘तुलसी’ फुलविण्याचा प्रयत्न केला आहे. त्याचा सुगंध पक्षाला अकोल्यात किती ‘प्राणवायू’ देतो, हे महापालिका निवडणुकीत स्पष्ट होणार आहे.
