राज्यात सध्या स्थानिक स्वराज्य संस्थांच्या निवडणुकीची रणधुमाळी सुरू असताना, काँग्रेसला सातत्याने पक्ष गळतीचे धक्के बसत आहेत.
महाराष्ट्राच्या राजकीय रंगमंचावर सध्या जणू काही नवा सिनेमाच रिलीज झालाय. स्थानिक स्वराज्य संस्थांच्या निवडणुकीचे बिगुल वाजल्यानंतर पक्ष बदलण्याचा खेळ जोरात सुरू आहे. या खेळात काँग्रेसचा व्हॉट्सॲप ग्रुप जणू एखाद्या वाळवंटातील पाण्याच्या विहिरीसारखा रिकामा होतोय. रोज एक नवा मेसेज येतो, ‘आजही आपल्या ग्रुपमध्ये काही मेंबर्स शिल्लक आहेत.’ पण हे मेंबर्स कधी कमळ हाती घेतील, याचा अंदाज कुणालाच येत नाही. सुप्रीम कोर्टाच्या आदेशानंतर निवडणुकीचे वातावरण तापले आहे. प्रत्येक पक्ष जोमाने मोर्चेबांधणी करतोय. पण काँग्रेसची अवस्था? अरेरे, ती तर जणू सिनेमातील ‘लास्ट सीन’ मधल्या हिरो सारखा एकटी पडत चाललीय. महायुती सरकार सत्तेत आल्यापासून काँग्रेसच्या नेत्यांची मनं डळमळीत झाली आहेत.
एकेकाळचा हा हाताचा पंजा आता जणू हातच हलवताना दिसतोय. रोज कोणता नवा नेता भाजपच्या कमळाच्या प्रेमात पडतोय, याचीच चर्चा आहे. विदर्भात तर काँग्रेसला एकामागून एक धक्के बसताहेत. आता तर अमरावती जिल्ह्यात काँग्रेसच्या माजी आमदाराच्या सुपुत्रानेही काँग्रेसला ‘टाटा-बाय बाय’ करत भाजपशी साखरपुडा केलाय. अरे, असं वाटतंय की काँग्रेसचा व्हॉट्सॲप ग्रुप आता फक्त ‘गुड मॉर्निंग’ मेसेज आणि ‘पक्ष सोडला’ अशा नोटिफिकेशन्स साठीच उरलाय. अमरावतीच्या राजकीय नाट्यात आता नवा ट्विस्ट आलाय. वरूड-मोर्शी मतदारसंघाचे माजी आमदार नरेशचंद्र ठाकरे यांचे सुपुत्र विक्रम ठाकरे यांनी काँग्रेसचा हात सोडून भाजपच्या कमळाचा हार गळ्यात घातलाय. हा पक्षप्रवेशाचा सोहळा जणू लग्नातल्या मंगलाष्टकासारखा थाटात पार पडला.
काँग्रेसला विदर्भात धक्का
खुद्द राज्याचे महसूल मंत्री आणि भाजपचे माजी प्रदेशाध्यक्ष चंद्रशेखर बावनकुळे यांनी या साखरपुड्याला हजेरी लावली. विक्रम ठाकरे गेल्या काही दिवसांपासून भाजपच्या नेत्यांशी चहापेक्षा जास्त गप्पा मारत होते, असं म्हणतात. गेल्या विधानसभा निवडणुकीत त्यांनी महाविकास आघाडीकडून तिकीट मिळवण्याचा प्रयत्न केला. पण तिकीट न मिळाल्याने त्यांनी अपक्ष लढत दिली. पण आता, जणू काही ‘अपक्ष’ नावाचे स्टार्टअप बंद करून ते थेट भाजपच्या ‘मल्टिनॅशनल कंपनीत’ जॉईन झालेत. काही दिवसांपूर्वी राज्यमंत्री पंकज भोयर यांनी विक्रम ठाकरे यांच्या घरी जाऊन ‘हाय-हॅलो’ केले होते. आता 16 ऑगस्टला, विक्रम ठाकरे यांनी भाजपच्या कार्यकर्त्यांसमोर ‘मी आता तुमचाच’ असं जाहीर करत कमळ हाती घेतले.
सोहळ्याला भाजपचे अनेक बडे नेते आणि कार्यकर्ते उपस्थित होते. सगळ्यांनी मिळून ‘नव्या मेंबरचे स्वागत’ असा बॅनरच लावला होता. विदर्भात काँग्रेसला हा आणखी एक मोठा धक्का मानला जातोय. कारण एकेकाळी काँग्रेसचा बालेकिल्ला असलेल्या या भागात आता कमळं उगवायला लागली आहेत. महाराष्ट्राच्या राजकारणात सध्या जणू व्हॉट्सॲप ग्रुपचे युद्ध सुरू आहे. कोण एका ग्रुपमधून एक्झिट करतं, तर कोण दुसऱ्या ग्रुपमध्ये जॉईन होतं. काँग्रेसच्या ग्रुपचा अ‍ॅडमिन आता हताश होऊन ‘कृपया ग्रुप सोडू नका’ असं सांगत फिरतोय. पण नेते ऐकतच नाहीत. स्थानिक स्वराज्य संस्थांच्या निवडणुकीच्या पार्श्वभूमीवर भाजपने आपली मोर्चेबांधणी इतक्या जोरात सुरू केलीय, की जणू ते निवडणुकीच्या रिंगणात ‘टर्बो मोड’मध्ये उतरलेत. दुसरीकडे, काँग्रेस मात्र ‘लो बॅटरी मोड’मध्ये दिसतेय. आता प्रश्न असा आहे, की काँग्रेसचा हा व्हॉट्सॲप ग्रुप शेवटी रिकामा होणार का? की काही नेते तरी लास्ट सीन पर्यंत टिकून राहणार?
Amravati : पहलगाम हल्ल्यानंतर उफाळले बांगलादेशी स्थलांतरितांचे वारे
