अमरावती महापालिकेत यंदा मित्रपक्ष एकमेकांविरोधात उभे राहणार असून भाजप, राष्ट्रवादी काँग्रेस आणि काँग्रेस यांच्यात रंगतदार राजकीय रणधुमाळी सुरू आहे.
महाराष्ट्रात स्थानिक स्वराज्य संस्थांच्या निवडणुकीची धामधूम जोरात सुरू आहे. प्रत्येक राजकीय पक्षाने कंबर कसली असून, रणनीती आखण्यात कोणतीही कसर बाकी ठेवली नाही. वर्षानुवर्षे रखडलेली महानगरपालिकेची निवडणूक आता मार्गी लागताच, राजकीय वातावरण तापू लागले आहे. प्रभाग रचनेची घोषणा झाल्याने, लवकरच निवडणूक होणार असल्याचे चित्र स्पष्ट झाले आहे. अमरावतीतही महापालिका निवडणुकीचे रंग उधळले जात आहे. अमरावतीत कोणता पक्ष झेंडा फडकवणार, याची उत्सुकता शिगेला पोहोचली आहे. भाजप आणि अजित पवार यांच्या राष्ट्रवादी काँग्रेसमध्ये चुरस तीव्र झाली असताना, महायुतीतील मित्रपक्ष एकमेकांविरुद्ध उभे ठाकण्याची शक्यता आहे.
निवडणुकीत राजकीय डावपेच, वैयक्तिक वैर आणि सत्तेची भूक यांचा संगम पाहायला मिळणार आहे. लोकसभा निवडणुकीत नवनीत राणा यांना पराभवाचा धक्का बसला होता, पण आता त्या आणि त्यांचे पती रवी राणा यांनी महापालिका निवडणुकीत जोरदार मुसंडी मारण्याची तयारी केली आहे. भाजपकडून जास्तीत जास्त जागा मिळवण्याची त्यांची मागणी स्थानिक नेत्यांना खटकत आहे. दुसरीकडे, राष्ट्रवादी काँग्रेसच्या (अजित पवार गट) आमदार सुलभा खोडके आणि संजय खोडके यांनी अमरावतीत पक्षाला नवसंजीवनी दिली आहे. राणा दांपत्य आणि खोडके यांच्यातील वैर सर्वश्रुत आहे. या वैराची धग आता निवडणुकीच्या रणांगणात पेटणार, हे निश्चित. महायुतीत भाजप, अजित पवारांची राष्ट्रवादी आणि एकनाथ शिंदेंची शिवसेना एकत्र असली, तरी अमरावतीत मित्रपक्ष एकमेकांच्या गळ्याला लागण्याची चिन्हे आहेत.
शिवसेनेचा मर्यादित प्रभाव
राणा दांपत्य भाजपच्या तिकिटावर जास्त जागा लढवण्यास उत्सुक असताना, स्थानिक भाजप नेते त्यांना रोखण्यासाठी आटापिटा करत आहेत. दुसरीकडे, खोडके दांपत्याने राष्ट्रवादीला मजबूत आधार दिला आहे. काँग्रेसही शहरात आपली ताकद दाखवण्यास सज्ज आहे. तर शिंदे गट आणि उद्धव ठाकरे यांची शिवसेना फारशी प्रभावी ठरण्याची शक्यता नाही. या साऱ्या घडामोडींमुळे अमरावतीत राजकीय युद्धाचे नवे रंग पाहायला मिळणार आहेत. या रणधुमाळीत आणखी एका नावाने रंगत वाढली आहे, ते म्हणजे बच्चू कडू. महायुतीपासून फारकत घेतल्यानंतर आणि विधानसभा निवडणुकीत पराभव पत्करल्यानंतर बच्चू कडू यांचा राग अनावर आहे. राणा दांपत्याला चेकमेट करण्यासाठी ते जीवाचे रान करू शकतात, असा अंदाज आहे.
कडूंच्या प्रहार जनशक्ती पक्षाची भूमिका या निवडणुकीत निर्णायक ठरू शकते. नवनीत राणा, रवी राणा, सुलभा खोडके, संजय खोडके आणि भाजपचे स्थानिक नेते यांच्यातील राजकीय डावपेच आणि वैयक्तिक वैर यामुळे अमरावतीची ही निवडणूक प्रचंड रंगतदार होणार आहे. अमरावती महापालिका निवडणूक ही केवळ सत्तेची लढाई नसून, राजकीय प्रतिष्ठेचा आणि वैयक्तिक सूडाचा खेळ ठरणार आहे. राणा दांपत्य विरुद्ध खोडके, भाजप विरुद्ध राष्ट्रवादी, आणि बच्चू कडूंचा स्वतंत्र डाव यामुळे ही निवडणूक एका थरारक नाट्यापेक्षा कमी नसेल. कोण जिंकेल आणि कोणाचा पराभव होईल, याचा अंदाज लावणे कठीण आहे. पण एक गोष्ट निश्चित, अमरावतीच्या या राजकीय रणसंग्रामात मतदारांना एक चित्तथरारक लढत पाहायला मिळणार आहे. कोणता पक्ष अमरावतीच्या सत्तेचा झेंडा फडकवणार, याची उत्सुकता आता सर्वांनाच लागली आहे.
Corporation Election : देवाभाऊंच्या मतदारसंघात पुन्हा झिंगझिंग झिंगाट
