शेतकऱ्यांच्या जिवावर बेतलेलं संकट दिवसेंदिवस तीव्र होत आहे. सरकार मात्र औरंगजेबच्या नावाने राजकीय नाटक रचत आहे. अनिल देशमुख यांनी सत्ताधाऱ्यांवर जोरदार हल्लाबोल करत शेतकऱ्यांच्या दुर्लक्षित व्यथांवर सरकारची निष्क्रीयता उघड केली आहे.
राज्यात सध्या शेतकऱ्यांच्या संकटाचा महापूर आलेला असताना, सरकार मात्र औरंगजेबच्या मुद्द्यांवर खेळ मांडत आहे. शरद पवार गटाचे नेते आणि माजी गृहमंत्री अनिल देशमुख यांनी राज्य सरकारवर जोरदार हल्लाबोल करत स्पष्ट शब्दांत आरोप केला की, सरकार जाणूनबुजून शेतकऱ्यांच्या दु:खाकडे दुर्लक्ष करत आहे. त्यांनी सांगितले की, कापूस, सोयाबीन, संत्र्याचे कोसळलेले दर, शेतकऱ्यांच्या आत्महत्या आणि आर्थिक गर्तेत सापडलेली शेती यावर सरकारचे कोणतेही धोरण नाही. पण औरंगजेबच्या कबरीवर मात्र चांगलाच गदारोळ माजवला जात आहे.
राज्यभरातील शेतकरी आज नैसर्गिक आपत्ती, हमीभावाचा अभाव आणि सरकारी धोरणांच्या ढिसाळतेमुळे त्रस्त आहेत. मात्र, सत्ताधाऱ्यांना शेतकऱ्यांचे अश्रू दिसत नाहीत. त्यांना दिसतो तो फक्त आणि फक्त औरंगजेब. देशमुख यांनी सरकारच्या या राजकारणाचा चिरफाड करताना सांगितले की, लोकांचे लक्ष मूळ समस्यांकडून हटवण्यासाठी अशा भावनिक मुद्द्यांचा वापर केला जात आहे.
बळीराजाच्या व्यथा अमूर्त
शेतकऱ्यांना सध्या बाजारात त्यांच्या पिकांचा योग्य दर मिळत नाही. संत्री उत्पादकांनी मोठ्या अपेक्षेने पिके घेतली, पण दर कोसळले. सोयाबीन आणि कापसाला योग्य भाव मिळत नाही, त्यामुळे शेतकरी कर्जाच्या विळख्यात अडकत आहेत. मात्र सरकार त्यावर कोणतेही ठोस पाऊल उचलत नाही. फडणवीस-शिंदे सरकारला औरंगजेबच्या कबरीची चिंता आहे, पण हजारो शेतकऱ्यांच्या आत्महत्या फक्त आकडेवारीच्या खेळात दडपल्या जात आहेत.अनिल देशमुख यांनी सरकारला फटकारत सांगितले की, हे सरकार केवळ धार्मिक आणि भावनिक मुद्द्यांवर लोकांचे लक्ष वेधण्याचा प्रयत्न करत आहे. आणि या नाटकात शेतकऱ्यांचा आवाज हरवत आहे. महागाईने जनता होरपळली आहे, पण सरकारला कोणतीही चिंता नाही.
देशमुख यांनी बजरंग दल आणि इतर उजव्या विचारसरणीच्या गटांनी औरंगजेबच्या कबरीबाबत केलेल्या वक्तव्यावरही टीका केली. हे सगळे समाजात द्वेष पसरवण्यासाठीच आहे. लोकांमध्ये तणाव निर्माण करायचा आणि नंतर त्याच तणावाच्या राजकारणावर सत्ता उपभोगायची, हेच भाजप सरकारचे सूत्र आहे. ते पुढे म्हणाले, शेतकऱ्यांचा मुद्दा सोडवण्यासाठी सरकारकडे वेळ नाही, पण इतिहास उकरून राजकीय स्वार्थ साधण्यासाठी मात्र भरपूर वेळ आहे. आज शेतकरी आक्रोश करत आहेत, कर्जबाजारीपणाने होरपळत आहेत, पण सरकार डोळे झाकून बसले आहे.
राजवटीच्या झोपमोडीसाठी संघर्ष
अनिल देशमुख यांनी सरकारला इशारा दिला की, जर हे सरकार शेतकऱ्यांच्या हितासाठी ठोस निर्णय घेत नाही, तर मोठ्या प्रमाणात आंदोलनं छेडली जातील. शेतकऱ्यांच्या मागण्या पूर्ण होईपर्यंत आम्ही शांत बसणार नाही.राज्यात राजकीय ध्रुवीकरण करत लोकांचे लक्ष हटवण्याचा हा सत्ताधाऱ्यांचा डाव आता जनतेला स्पष्टपणे दिसत आहे. देशमुख यांच्या टीकेनंतर सरकारला आता उत्तर द्यावे लागणार आहे. पण त्याऐवजी ते औरंगजेबच्या नावानेच आणखी काही राजकीय नाट्य रचतील का, हे पाहणे महत्त्वाचे ठरणार आहे.
