राज्यात आता स्थानिक स्वराज्य संस्थांच्या निवडणुकीचे वारे वाहू लागले असतानाच प्रहार जनशक्ती पक्षाचे अध्यक्ष बच्चू कडू यांनी राज्य निवडणूक आयोगावर गंभीर आरोप केला आहे. निवडणूक पारदर्शक राहिलेल्या नाहीत, असा ठाम दावा करत त्यांनी निवडणूक प्रक्रियेवरच प्रश्नचिन्ह उपस्थित केले आहे.
बच्चू कडू म्हणाले, निवडणूक आयोगाच्या कामकाजात पारदर्शकता उरलेली नाही. अचलपूर विधानसभा मतदारसंघात तब्बल 10 हजार मतदारांची नावे वेळेवर कमी झाली आहेत. अशा गोंधळात निवडणुका घेणे म्हणजे जनतेत अधिकच संभ्रम निर्माण करणे आहे. ते पुढे म्हणाले, मतदान हा प्रत्येक नागरिकाचा मुलभूत अधिकार आहे. मात्र माझे मत कुणाला पडले हे मला जाणून घेण्याचाही अधिकार आहे. निवडणूक आयोग ते दाखवू शकत नाही. माझे मत मला मिळाले, हे सिद्ध करण्याची तरतूद आयोगाकडे आहे का? हे आयोगाने स्पष्ट करावे. माझे हे आयोगाला थेट आव्हान आहे.
Chandrashekhar Bawankule : ठाकरेंचे प्रसिद्धीसाठी वक्तव्ये, शेतकऱ्यांसाठी नाही
आमचे मत कोणाला?
‘ईव्हीएम’ आणि ‘व्हीव्हीपॅट’ यावर बोलताना कडू म्हणाले, मतदाराचे मत कोणत्या उमेदवाराला गेले, हे पाहण्याची व्यवस्था सध्याच्या प्रणालीतच नाही. काँग्रेससह महाविकास आघाडी मतपत्रिकेवर निवडणुकीची मागणी करत असली, तरी माझे मत वेगळे आहे. ‘ईव्हीएम’ ठेवा, पण ‘व्हीव्हीपॅट’मधून दिसणारा तो कागद आमच्या हाती यायला हवा. त्यावर सही घेऊन तोच मतपत्रिकेसारखा मतपेटीत टाकता आला, तरच खरी पारदर्शकता राहील.
कडू म्हणाले, पूर्वी मतपत्रिकेत नाव, मतदार क्रमांक आणि सही अशी व्यवस्था होती. आपण प्रत्यक्ष आपले मतदान पाहू शकत होतो. आता ही व्यवस्था संपवली आणि मत हवेत गेले. मत कुणाला पडले हे पाहण्याची सोय नाही, आणि इथेच भाजप जिंकला आहे. हे एक कटकारस्थान आहे. निवडणुकीच्या पार्श्वभूमीवर भाजपवर आरोप करत कडू म्हणाले, शहरांच्या निवडणुका आधी घेऊन हिंदू-मुस्लीम वाद निर्माण करून भाजप विजय मिळवणार आहे. त्याचा परिणाम ग्रामीण भागावर होईल आणि त्यामुळे संपूर्ण महाराष्ट्रात भाजपसाठी अनुकूल वातावरण तयार करण्याची खेळी सुरू आहे.
युतीबाबत विचारले असता कडू म्हणाले, निवडणुकीत कोणत्या पक्षासोबत युती करायची, याचा निर्णय अद्याप घेतलेला नाही. कार्यकर्त्यांशी चर्चा करूनच निर्णय होईल. आतापर्यंत आम्ही आंदोलनात व्यस्त होतो, निवडणुकीसाठी फिरता आले नाही. आम्ही राजकारणात तरबेज नसू, पण शेतकरी म्हणून सर्वांना एकत्र आणण्याचा प्रयत्न नक्कीच करू.
