प्रहार जनशक्तीचे नेते बच्चू कडू यांनी पुन्हा एकदा शेतकरी कर्जमाफीच्या मुद्यावर सरकारवर ठसठशीत टीका केली आहे.
महाराष्ट्राच्या राजकीय पटलावर शेतकऱ्यांच्या कर्जमाफीचा वादळी मुद्दा गेल्या काही दिवसांपासून धुमाकूळ घालत आहे. शेतकरी कर्जमुक्त होण्याच्या प्रतीक्षेत असताना, त्यांची व्यथा वाढतच चालली आहे. प्रहार संघटनेचे नेते बच्चू कडू यांनी वारंवार या मुद्द्यावर आवाज उठवला असून, त्यांच्या मागण्या अद्यापही हवेतच विरघळल्या आहेत. आता या मुद्द्यावर बच्चू कडू यांनी थेट अर्थमंत्र्यांवर जोरदार हल्ला चढवला आहे. इंदापूर तालुक्यातील भवानीनगर येथे शेतकरी कर्जमुक्ती एल्गार सभेचे आयोजन करण्यात आले होते.
सभेत बच्चू कडू यांनी उपमुख्यमंत्री तथा अर्थमंत्री अजित पवार आणि कृषिमंत्री दत्तात्रय भरणे यांच्यावर सडकून टीका केली. कडू म्हणाले, वित्त खाते तुमच्याकडे असताना तुम्ही म्हणता पैशांचे सोंग जमत नाही. जमत नसेल तर खुर्ची सोडा. कडू यांनी अजित पवारांच्या दादागिरीचा उल्लेख करत म्हटले, सकाळी सात वाजता उठून शपथ घेतली, एवढे सोंग कोणाला जमले? कुठे गेली तुमची दादागिरी? कडू यांनी शक्तिपीठ महामार्गासाठी 85 हजार कोटी रुपयांच्या निधीचा उल्लेख करत प्रश्न उपस्थित केला, आम्ही रस्त्यातील खड्ड्याने मरतोय. दादा हे सोंग कसे जमले तुम्हाला?
Congress : पदवीधर रणांगणात जिल्ह्यानिहाय समन्वयकांची टीम सज्ज
सरकारला घेरण्याची तयारी
कोणाच्या खिशातून पैसा काढला? किती लुटले ते सांगा. शेतकऱ्यांच्या पायघोळ होत असलेल्या व्यथेवर प्रकाश टाकत कडू यांनी म्हटले, माझा शेतकरी पाय घासून मरतोय, त्यासाठी पैसा नाही. तिथे पैशांचे सोंग जमत नसेल तर खुर्ची सोडा. महाराष्ट्रातील शेतकरी वर्ग हा राज्याच्या अर्थव्यवस्थेचा कणा आहे. तरीही त्यांच्या मागण्या दुर्लक्षित होत असल्याचे ते म्हणाले. सभेत उपस्थित शेतकऱ्यांनी कडू यांच्या बोलण्याला जोरदार पाठिंबा दिला. कर्जमाफीच्या मुद्द्यावर सरकारला घेरण्याची तयारी दाखवली.पुढे बोलताना बच्चू कडू यांनी कृषिमंत्री दत्तात्रय भरणे यांच्यावरही निशाणा साधला. ते म्हणाले, कृषिमंत्री शेतकऱ्यांसाठी भांडताना दिसला पाहिजे.
नुसता शेपूट हलवणारा नकोय आम्हाला. मागील कृषिमंत्री माणिकराव कोकाटे यांचा उल्लेख करत कडू म्हणाले, ते ओबडधोबड बोलत होते, ते घरी गेले. भरणे थोडे बरे बोलतात, कमीत कमी चुका तरी करत नाहीत. मात्र, शेपूट हलवणे बंद केले पाहिजे. कडू यांनी कृषिमंत्र्यांना उद्देशून म्हटले, तुम्ही कृषिमंत्री आहात. सबसे ज्यादा ‘भार तुम्हारी तरफ’ है. सर्वात जास्त संख्या शेतकऱ्यांची आहे. यातून त्यांनी शेतकऱ्यांच्या संख्याबळाचा आणि त्यांच्या हक्कांचा मुद्दा उपस्थित केला. महाराष्ट्रातील शेतकरी आजही कर्जाच्या ओझ्याखाली दबलेले आहेत. सरकारच्या धोरणांमुळे त्यांची अवस्था आणखी बिकट झाली आहे, असे कडू यांनी नमूद केले.
